Չորեքշաբթի, 20 Ապրիլի 2016 16:35

Արմինֆո. Հայաստանում միջուկային նոր էներգաբլոկի շինարարության շուրջ բանակցությունները երբեք չեն դադարել: Այս մասին ապրիլի 20-ին Երևանում կայացած ճեպազրույցում հայտարարել է «Ռոսատոմ» ՊԸ գլխավոր տնօրենի առաջին տեղակալ Կիրիլ Կոմարովը:

Նրա խոսքով, ռուսական և հայկական կողմերն այս նախագծի շուրջ գտնվում են մշտական երկխոսության մեջ: Տեխնոլոգիական տեսանկյունից, շարունակել է Կ.Կոմարովը, գոյություն ունի Մեծամորի ԱԷԿ-ի հարթակի վրա նոր միջուկային էներգաբլոկ կառուցելու հնարավորությունը: Առանցքային հարցն այն է, որ այդ շինարարության համար անհրաժեշտ է ապահովել որոշակի պարամետրեր, որոնք բլոկին թույլ կտան գործել տնտեսապես արդյունավետ: Առաջին հերթին խոսքը գնում է սպառման ծավալների մասին հանրապետությունում, ինչպես նաև հզորությունները հարևան երկրներին փոխանցելու հնարավորության մասին: «Մենք համատեղ աշխատում ենք այդ նախագծի վրա, և եթե հայտնվի «հնարավորությունների պատուհան», ապա մենք հաճույթով կիրականացնենք այդ նախագիծը»,-ընդգծել է Կ.Կոմարովը, հիշեցնելով, որ նոր միջուկային էներգաբլոկի շինարարության վերաբերյալ միջկառավարական համագործակցության համաձայնագիրն ստորագրված է և շարունակում է գործել: «Հենց որ գործընկերների հետ հասկանանք, որ նախագծի իրականացման համար առկա են բոլոր տնտեսական հիմքերը, իհարկե, կաշխատենք իրականացնել այդ նախագիծը»,- ասել է «Ռոսատոմ» ՊԸ գլխավոր տնօրենի առաջին տեղակալը:

Նշենք, որ 2010 թ. օգոստոսի 20-ին Ռուսաստանն ու Հայաստանն ստորագրեցին տեխնիկական և ֆինանսական համագործակցության համաձայնագիր, Հայաստանում ԱԷԿ-ի նոր էներգաբլոկ կառուցելու նպատակով: Սկզբնական շրջանում նախատեսվում էր կառուցել 1060 մեգավատ հզորությամբ էներգաբլոկ: Ռուսական կողմը պատրաստ էր նույնիսկ ֆինանսավորել աշխատանքի 20% -ը: Ավելին, նոր միջուկային էներգաբլոկի կառուցման նպատակով ստեղծվեց հայ-ռուսական «Մեծամորէներգոատոմ» ՓԲԸ-ն, իսկ շինարարության նախագծի կառավարումը վստահվեց է ավստրալիական Warley Parsons միջազգային կոնսորցիումին: Բայց հետագայում, պայմանավորված  ձգձգումներով և 5 մլրդ. դոլարի ֆինանսական միջոցների բացակայությունով, ՀՀ կառավարությունն ընդունեց ատոմակայանի երկրորդ էներգաբլոկի շահագործման ժամկետը երկարաձգելու մասին որոշում: Իսկ նոր էներգաբլոկի շինարարության հարցին կարող են վերադառնալ 2018 թվականին: