Երևանում անցկացվեց «Կանանց սոցիալ-տնտեսական հզորացում Հայաստանում» ծրագրի փակման կոնֆերանսը

Ծրագրում (2013-2016թթ.) ներառված էր Լոռու մարզի 55 համայնք՝ ներգրավելով ավելի քան 1000 մասնակից՝ և՛ կանայք, և՛ տղամարդիկ: Ծրագրի շնորհիվ 38 բիզնես ծրագիր ստացել է դրամաշնորհ՝ ծրագրով նախատեսված 20-ի փոխարեն՝ 16 համայնքների ընդգրկմամբ (Վանաձոր, Տաշիր, Ստեփանավան, Սպիտակ, Արևաշող, Շիրակամուտ, Հարթագյուղ, Ջրաշեն, Օձուն, Ալավերդի, Քարինջ, Ախթալա, Շամլուղ, Շնող, Հաղպատ): 38 բիզնես ծրագրերից 30-ը սկսնակ ձեռներեցներ են: Դրամաշնորհներ տրամադրվել են գյուղատնտեսության, առողջապահության, արտադրության, տուրիզմի, մշակույթի ոլորտներում գործունեություն ծավալող ձեռնարկություններին:

 

«Մենք շարունակում ենք կարևորել կանանց սոցիալ-տնտեսական մասնակցությունը մեր երկրում և շարունակում ենք ծրագրեր իրականացնել այս ուղղությամբ: Հայաստանի երիտասարդ կանանց ասոցիացիայի և ծրագրի շահառու կանանց անունից շնորհակալություն եմ հայտնում բոլոր այն գործընկերներին, ովքեր մասնակցել ու ներդրում են ունեցել «Կանանց սոցիալ-տնտեսական հզորացում Հայաստանում» ծրագրի իրականացման գործում: 

 

Առանձնահատուկ շնորհակալություն եմ հայտնում Եվրոպական միությանը, առանց որի այս ծրագիրն  իրականություն չէր դառնա»,- ասել է Հայաստանի երիտասարդ կանանց ասոցիացիայի նախագահ Լիլիթ Ասատրյանը:

 

«Մենք ընտանիքով պետք է ամիսներ անց տեղափոխվեինք արտասահման՝ մշտական բնակության համար: Սակայն մասնակցեցի ծրագրին, ստացա դրամաշնորհ: Եվ ստացվեց այնպես, որ երեխաներիս կմեծացնեմ այստեղ, Հայաստանում, իմ երկրում, ոչ թե օտարության մեջ: Երկրից մեկնելու մտադրություն այլևս չունենք»,- պատմում էր Լիլիթ Սինդոյանը, ով Վանաձորում ծրագրի շնորհիվ հիմնել է արծաթյա զարդերի ստուդիա: 

 

Կոնֆերանսին մասնակցում էին պետական մարմինների, միջազգային կազմակերպությունների, մասնավոր հատվածի՝ ֆինանսական կազմակերպությունների, մասնավոր բիզնեսների, հանրային ոլորտի՝ միջազգային և տեղական հասարակական կազմակերպությունների ներկայացուցիչներ, ինչպես նաև գործընկեր կազմակերպություններ և ծրագրի շահառուներ: 

 

2013թ. մայիսից «Հայաստանի երիտասարդ կանանց ասոցիացիա» (ՀԵԿԱ) հասարակական կազմակերպության կողմից, Եվրամիության ֆինանսավորմամբ, Լոռու մարզում իրականացվում է «Կանանց սոցիալ-տնտեսական հզորացում Հայաստանում» ծրագիրը: «Կանանց սոցիալ-տնտեսական հզորացում Հայաստանում» ծրագրի նպատակն է` խթանել Լոռու մարզի կանանց սոցիալ-տնտեսական կարողությունների զարգացումը՝ այսպիսով նպաստելով կանանց սոցիալ-տնտեսական իրավիճակի բարելավմանը: 

 

Ծրագրի գործընկերներն են` CISP կազմակերպությունը, Լոռու մարզպետարանը և Վանաձորի քաղաքապետարանը: Ծրագրի շրջանակներում սերտ համագործակցություն է կայացել նաև ՓՄՁ ԶԱԿ Լոռու մասնաճյուղի, Զբաղվածության պետական գործակալության Վանաձորի զբաղվածության տարածքային կենտրոնի հետ: