Արմինֆո. ՀՀ հանրային ծառայությունները կարգավորող հանձնաժողովը սեփական նախաձեռնությամբ կվերանայի էլեկտրաէներգետիկ համակարգի ընկերությունների կողմից էլեկտրաէներգիայի արտադրման և վերջնական սպառողին համապատասխան ծառայությունների մատուցման գործող սակագները:
Ինչպես ԱրմԻնֆո գործակալությանը տեղեկացվել է ՀԾԿՀ մամուլի ծառայությունից, ՀՀ հանրային ծառայությունները կարգավորող հանձնաժողովը, հաշվի առնելով 2016թ. օգոստոսի 1-ից մինչև 2017թ. օգոստոսի 1-ն ընկած ժամանակահատվածի համար կանխատեսվող էլեկտրաէներգիայի (հզորության) արտադրության, ներկրման և արտահանման հաշվեկշիռը, «Գազպրոմ Արմենիա» ՓԲԸ-ի ներկայացրած հայտի արդյունքում՝ ջերմային կայաններին վաճառվող բնական գազի սակագնի հնարավոր փոփոխությունը, «Հայաստանի էլեկտրական ցանցեր» ՓԲԸ-ի գործող սակագներում նախորդ տարիներին կուտակված վնասի փոխհատուցման համար միանվագ ներառված գումարի նվազեցման անհրաժեշտությունը, էլեկտրաէներգետիկական համակարգում գործող ընկերությունների ֆինանսատնտեսական գործունեության վրա ազդող մի շարք այլ գործոնների փոփոխությունները և, հիմք ընդունելով «Էներգետիկայի մասին» ՀՀ օրենքի 22-րդ հոդվածի 5-րդ և 6-րդ մասերը, իր նախաձեռնությամբ սկսում է էլեկտրաէներգետիկական համակարգի ընկերությունների կողմից էլեկտրաէներգիայի արտադրության և ծառայությունների մատուցման, ինչպես նաև վերջնական սպառողներին վաճառվող էլեկտրաէներգիայի սակագների վերանայման գործընթաց:
Ինչպես հայտարարվել էր ավելի վաղ, «Գազպրոմ-Արմենիա» ընկերությունը ՀՀ Հանրային ծառայությունները կարտգավորող հանձնաժողովին էր ներկայացրել ներքին սպառողի համար գազի սակագների իջեցման հայտը: Ինչպես ԱրմԻնֆո գործակալությանը տեղեկացվել էր ՀԾԿՀ մամուլի ծառայույթունից, հաշվի առնելով հարցի սոցիալական մեծ նշանակությունը, որոշումը կընդունվի հնարավորինս սեղմ ժամկետներում: Ապրիլի 26-ին «Գազպրոմ Արմենիա» ՓԲԸ հաղորդագրության մեջ առաջարկվում է, որպեսզի մինչև 10 հազար խմ սպառող շարքային բաժանորդների համար գազի ամսական սակագինը 156 դրամից իջեցվի մինչև 146.7 դրամ`1000 խմ գազի դիմաց, իջեցում է նախատեսվում նաև խոշոր սպառողների համար: Ընդ որում, 10 հազար խմ-ից ավել գազ սպառողների համար առաջարկվում է սակագինը 276.98 դոլարից իջեցնել մինչև 257.56 դոլար (նախորդ ամսվա 25-ի փոխարժեքով), ներառյալ ԱԱՀ:
Նշենք, որ ըստ ՀՀ «Էներգետիկայի մասին» օրենքի, Հանձնաժողովը սակագինը վերանայում (վերահաստատում կամ փոփոխում) և որոշում է կայացնում լիցենզավորված անձի վերանայման հայտի փաթեթն ընդունելուց հետո՝ 90-օրյա ժամկետում: 10-օրյա ժամկետում տեղի է ունենում ներկայացված փաստաթղթերի ստուգումը: Հանձնաժողովը սեփական նախաձեռնությամբ կարող է վերանայել գործող սակագինը և սահմանել նոր սակագին` իր կողմից հաստատված ընթացակարգի համաձայն` ելնելով լիցենզավորված անձի տնտեսական գործունեության արդյունքներից, ներդրումային ծրագրերի և սպառողներին մատուցվող ծառայությունների որակի նկատմամբ ներկայացված պահանջների կատարումից:
Հիշեցնենք, որ Հայաստանը և Ռուսաստանը պայմանավորվել են հանրապետություն մատակարարվող գազի գինն իջեցնել մինչև 150 դոլար 1000 խմ դիմաց: Պայմանավորվածությունը ձեռք է բերվել ՌԴ վարչապետ Դմիտրի Մեդվեդևի Հայաստան կատարված այցի ընթացքում: Ինչպես լրագրողներին հայտնել է ՀՀ վարչապետ Հովիկ Աբրահամյանը, երկու երկրների կառավարություններն արդեն ստորագրել են համապատասխան փաստաթուղթը: Բայց նա դժվարացել է պատասխանել հարցին, թե արդյոք գազի գինը կիջնի հայ սպառողի համար: «Այդ հարցը ենթակա է լրացուցիչ քննարկման՚,-հայտարարել է վարչապետը: Նշենք, որ ներկայումս ռուսական գազի գինը սահմանին կազմում է 1000 խմ դիմաց 165 դոլար: Սակայն, սպառողը օգտագործած 1000 խմ գազի դիմաց վճարում է 318 դոլար, իսկ ամսական 10 հազար խմ և ավելի սպառողները` 277 դոլար: