Վլադիմիր Բրեդով. Հայկական ԱԷԿ-ի 2-րդ բլոկի շահագործման ժամկետի երկարաձգման նախագիծն անհրաժեշտ է իրականացնել ռեկորդային կարճ ժամկետներում

Արմինֆո. Հայկական ԱԷԿ-ի 2-րդ բլոկի շահագործման ժամկետի երկարաձգման նախագիծը, որը պետք է իրականացվեր 10 տարում, այժմ նախատեսվում է իրականացնել ռեկորդային կարճ ժամկետում: Այս մասին Հայաստանի Ճարտարագիտական համալսարանի ուսանողական և դասախոսական կազմի հետ հանդիպման ընթացքում մայիսի 18-ին հայտարարել է ռուսական կողմից նախագծի ղեկավար Վլադիմիր Բրեդովը:

Նրա խոսքով, նախագիծը, որը պետք է իրականացվեր մինչև 2019 թվականի ավարտը, լիարժեք սկսեց իրականացվել 2015 թվականի հունիսից: Փաստորեն, մնացել է 4.5 տարի, որի ընթացքում պետք է իրականացվեն մեծ ծավալով աշխատանքներ: Այս առումով նախատեսվում է կիրառել ՌԴ փորձը, որտեղ նման նախագծերի իրականացման համար նախատեսվում է 10-12 տարի: Ըստ էության, շարունակել է նախագծի ղեկավարը, խոսքը գնում է Ռուսաստանը փորձը Հայաստանը տեղափոխելու մասին: Ընթացիկ տարում կավարտվի հիմնական սարքավորումների, շինությունների, կոնստրուկցիաների հետազոտումը: Արդեն հետազոտվել է 4500 միավոր: Սարքավորումները թանկ են և կպատրաստվեն 16-36 ամիսների ընթացքում: Հետևաբար, աշխատանքները կիրականացվեն զուգահեռ ռեժիմով, ինչն արտացոլված է միջկառավարական համաձայնագրում: Համալիր հետազոտություններն այժմ ընթանում են արագացված ժամանակացույցով: Մասնավորապես, նախատեսվում է առաջնահերթ կարգով փոխարինել 1147 միավոր սարքավորում, ևս 1749 միավոր ենթակա է հետազոտման:

Նա նաև նշել է, որ արդեն կազմվել է առաջնահերթ սարքավորումների ցանկը, ինչպես նաև արդիականացման աշխատանքների օրակարգը: Արդեն հավաքվել է խոշոր սարքավորումների մոտ 40 դիրք, որոնք պետք է փոխարինվեն: «Ժամանակացույցները կողմերն ստորագրել են և ներկայացված են «Ռուսատոմ Սերվիս»-ի կայքում, և կողմերից յուրաքանչյուրը կարող է վերահսկել այդ ժամանակացույցի կատարումը»,-նշել է Վ.Բրեդովը: Նա հավելել է, որ նախագիծը կառավարող «Ռուսատոմ Սերվիս» ընկերությունը նպատակ ունի ծրագրին ներգրավել առավելագույն թվով սարքավորումներ մատակարարների, որոնց համար արդեն անցկացվել է 2 դասընթաց` տուրբինային սարքավորումների և գեներատորների գծով:

Հիշեցնենք, որ նախագիծն իրականացվում է Ռուսաստանի 270 մլն.դոլար վարկի և 30 մլն. դոլար դրամաշնորհի միջոցներով: Վ.Բրեդովը նշել է, որ ծրագրի հիմնական բաղադրիչներից է Հայկական ԱԷԿ-ի 2-րդ բլոկի անվտանգության բարձրացումը: Օրինակ, Կոլայի ԱԷԿ-ում նման ծրագրի իրականացման արդյունքում հաջողվեց կայանի անվտանգությունը բարձրացնել 50 անգամ: Նախագիծը կրում է նաև սոցիալական բնույթ: ԱԷԿ-ի բացակայության պայմաններում էլեկտրաէներգիայի սակագինը Հայաստանում կազմում էր 9.92 դրամ 1 կՎտ/ժամի դիմաց, իսկ արդիականացումից հետո սակագինը կավելանա ընդամենը 2.5 դրամով: Նախագիծի իրաիկանացումը գտնվում Հայաստանի և Ռուսաստանի կառավարությունների մշտական հսկողության ներքո: Օրինակ, Հայաստանում ստեղծվել է միջգերատեսչական ներդրումային կոմիտե, որի քննարկման են ներկայացվում գնումների փաստաթղթերը և հստատվում: Իսկ հաստատման գործընթացը բավականին բարդ է, պահանջում է մանրազնին վերլուծություն: Մինչև 2016 թվականի սեպտեմբերը կավարտվի ներդրումային նախագծի կազմումը, որը կքննարկի կոմիտեն: Սակայն, միևնույն ժամանակ, սեղմ ժամկետներն ստիպում են արդեն հիմա քայլեր ձեռնարկել սարքավորումների պատվիրման և մատակարարման ուղղությամբ: Օրինակ, 2018 թվականին անհրաժեշտ է փոխել տուրբոագրեգատը, ինչի համար պահանջվում է 24 ամիս: Դրա համար էլ արդեն հիմա տեղի են ունենում մրցույթներ`մատակարարին ընտրելու նպատակով: Իսկ դա շատ կարևոր է գնումների ողջ գործընթացի թափանցիկությունն ապահովելու համար, որին ակտիվորեն ներդրավվում են նաև հայկական ընկերությունները: Մասնավորապես,  «Արմատոմ» ընկերությունը հաղթել է արդյունաբերական սեյսմիկ պաշտպանության սարքավորումների մատակարարման մրցույթում: