Հայէկոնոմբանկը բաժնետոմսերի նոր թողարկում իրականացնելու նպատակով հայտ է ներկայացրել ՀՀ Կենտրոնական բանկին

Արմինֆո.Հայէկոնոմբանկը բաժնետոմսերի նոր թողարկում իրականացնելու նպատակով հայտ է ներկայացրել ՀՀ Կենտրոնական բանկին: Ինչպես ԱրմԻնֆո գործակալությանը տեղեկացվել է Բանկից, IPO-ն նախատեսվում է սկսել հունիսին: Բանկի բաժնետոմսերի բաժանորդագրությունը, հավանաբար, կընթանա մինչև նոյեմբերի սկիզբը: Բանկը մտադիր է իրականացնել բաժնետոմսերի նոր թողարկում` 5 000 011 400 դրամ ծավալով: Մեկ բաժնետոմսի անվանական արժեքը կազմում է 2500 դրամ:

Հիշեցնենք, որ վերջերս ՀՀ ԿԲ տվեց իր նախնական դրական եզրակացությունը` Հայէկոնոմբանկի և ԲՏԱ Բանկի միավորման առնչությամբ, ինչի արդյունքում միավորված Հայէկոնոմբանկի ընդհանուր կապիտալը կազմեց 26 մլրդ.դրամ, գործարքի հաշվին ավելանալով 4 մլրդ.դրամով: Հիշեցնենք, որ ՀՀ ԿԲ որոշմամբ 2017 թվականից Հայաստանի բանկերի նվազագույն նորմատիվային ընդհանուր կապիտալը պետք է կազմի 30 մլրդ. դրամ:

Ինչպես ԱրմԻնֆո-ի թղթակցի հետ զրույցում հաղորդել է «Հայէկոնոմբանկ» ԲԲԸ վարչության նախագահ Արմեն Նալջյանը, ներկայումս բանկն ունի նաև 200 մլն.դրամի զուտ շահույթ, բայց թե այդ գումարից որքա՞նը կուղղվի կապիտալի համալրմանը, իսկ որքանը`դիվիդենտների վճարմանը, կորոշեն բաժնետերերը:

Խոսելով բաժնետոմսերի նոր թողարկման մասին, Նայջյանը նշել է, որ անցյալ տարվա IPO արդյունքում բանկի կանոնադրական կապիտալն ավելացավ 4 մլրդ.դրամով, մի քանի անգամ ավելացնելով նաև բաժնետերերի թիվը, իսկ բանկը հուսով է ընթացիկ տարում կապիտալն առնվազն հասցնել նորմատիվային գումարին: «Մեր հիմնական մաժորիտար բաժնետերերն արդեն պատրաստակամություն են հայտնել համալրել պակասող գումարը, եթե լինի դրա անհրաժեշտությունը»,-ընդգծել է բանկի ղեկավարը: Նա ընդգծել է, որ նորմատիվային կապիտալի հետագա համալրման անհրաժեշտությունը չի խոչընդոտի ակտիվ դիվիդենտային քաղաքականությանը, քանի որ, լինելով հրապարակային բանկ, Հայէկոնոմբանկն իր կորպորատիվ քաղաքականության շրջանակներում պետք է վճարի դիվիդետներ, որոնց չափերը կսահմանվեն բաժնետերերի ընդհանուր ժողովում:

Նալջյանը հաղորդել է, որ բանկը զուգահեռաբար աշխատանքներ է իրականացնում մի շարք եվրոպական ինստիտուցիոնալ ներդրողների հետ, մի շարք հանդիպումներ է անցկացրել վերջերս Լոնդոնում կայացած ՎԶԵԲ (Բանկի բաժնետոմսերի 11.05%-ի փայատերը-Խմբ) տարեկան ժողովի շրջանակներում: «Ներդրողները պատրաստակամություն հայտնեցին աջակցել մեր բանկի զարգացմանը, համարժեք գնահատելով երկրի ռիսկը ներկայիս տնտեսական ճգնաժամի պայմաներում»,-ընդգծել է բանկիրը: Այնուամենայնիվ, նա հիշեցրել է SYMBIOTICS SA (Շվեյցարիա) և MICRO, SMALL & MEDIUM ENTERPRISES BONDS S.A. ֆինանսական կառույցների հետ վերջերս Հայէկոնոմբանկի կողմից կնքված 10 մլն.դոլարի վարկային պայմանագրի մասին` ՓՄՁ զարգացման նպատակով, ինչը խոսում է բանկի նկատմամբ միջազգային խաղացողներևի վստահության մասին: Այդ մասին է վկայում նաև բանկի համագործակցությունը եվրոպական ներդրումային հիմնադրամներից մեկի հետ, որը ներկայոմս իրականացնում է due diligence ընթացակարգ, մտադրոթյուն ունենալով դառնալ բանկի մաժորիտար բաժնետերերից մեկը: Պատասխանելով Հայաստանի բանկային համակարգի միավորման գործընթացում բանկի նոր միավորումների հնարավորության մասին հարցին, Նալջյանն իր սեփական տեսակետն է հայտնել միավորման և միաձուլման հնարավոր գործարքների (M&A) նկատմամբ ծայր աստիճան զգուշություն ցուցաբերելու առումով: «Այդ հարցում մենք պետք է լինենք շատ պահպանողական: Կոնսոլիդացիան օգտակար է, բայց գործընթացը`վտանգավոր: Ես ասում եմ այդ մասին, քանի որ ակտիվների որակով մեր բանկը համարվում է լավագույններից մեկը, և մենք ինքներս էլ ենք իրականացնում այն խաղացողների due diligence-ը, ովքեր դիմել են մեզ: Կարծում եմ, որ ներկայումս միավորման և միաձուլման գործընթացները պարունակում են բազմաթիվ ռիսկեր: Ժամանակակից ճգնաժամային M&A պրակտիկայում քիչ չեն դեպքերը, երբ առողջ բանկերը, գերագնահատելով սեփական հնարավորությունները և ճիշտ չգնահատելով ռիսկերը, կուլ են տալիս փոքրներին և հետագայում իրենց համար ստեղծում մեծ պրոբլեմներ»,-եզրափակել է զրուցակիցը:

Նալջյանը տեղեկացրել է, որ Հայէկոնոմբանկ ռազմավարոթյունը ճգնաժամի պայմաններում ենթադրում է խոշոր վարկառուների վարկավորման նկատմամբ ավելի պահպանողական մոտեցում, քանի որ այդ ոլորտոմ են կուտակվում չվերադարձի հետ կապված հիմնական պրոբլեմները: «Մենք, այնոամենայնիվ, մեր ունիվերսալության շրջանակներում կշարունակենք վարկավորել մեր ստուգված հաճախորդներին և կշարունակենք աշխատանքները փոքր և միջին բիզնեսի ֆինանսավորման ուղղությամբ, քանի որ այդ հատվածը համարում ենք ավելի առողջ»,-նշել է բանկի ղեկավարը:

Հիշեցնենք, որ Հայէկոնոմբանկը հանդիսանում է Հայաստանի հնագույն բանկերից մեկը և ստեղծվել է ԽՍՀՄ բանկային համակարգի վերակառուցման արդյունքում, հանդիսանալով Բնակսոցբանկի իրավահաջորդը: Գրանցվել է ՀՀ Կենտրոնական բանկում` որպես Բաց Բաժնետիրական Ընկերություն (Գրանցում թիվ 1): 1997 թվականին Հայէկոնոմբանկի մեծամասնական վերահսկող բաժնետեր դարձան Սուքիասյանների ընտանիքի անդամները: 2004-ին, բանկը պայմանագիր ստորագրեց ՎԶԵԲ- հետ, ներգրավելով բանկին իր սեփական կապիտալում` 25% + 1 մասնաբաժնով: Ներդրումային ժամանակահատվածի ավարտով ՎԶԵԲ-ն սկսեց կրճատել իր մասնաբաժինը, հասցնելով այն 15%-ի: 2016 թվականի ապրիլի 1-ի դրությամբ բանկի բաժնետերերն են` ՎԶԵԲ - 11,05%, Սուքիասյան Սարիբեկ - 25.9%, Սուքիասյան Խաչատուր`14,38%, Սուքիասյան Ռոբերտ - 14,97%, Էդուարդ Սուքիասյան 11.18%:

Ըստ ԱրմԻնֆո գործակալության`Հայաստանի բանկերի Ռենկինգի, ՀԱՅԷԿՈՆՈՄԲԱՆԿ-ի ակտիվները 2016-ի ապրիլի 1-ին կազմել են 108,2 մլրդ դրամ (տարեկան աճը`23.8%), այդ թվում, վարկային ներդրումները`60.4 մլրդ.դրամ (տարեկան աճը` 20%), ընդհանուր պարտավորությունները` 88.5 մլրդ դրամ (տարեկան աճը`15.8%): Բանկն ունի 40 մասնաճյուղ, որից 19-ը գտնվում է Երևանում, 20-ը Հայաստանի մարզերում, իսկ 1–ը` Ղարաբաղում: