Դեսպան. Իրանցի մասնագետները Հայաստանում կքննարկեն Իրան-Հայաստան ե/ու նախագծի իրականացումը

Արմինֆո. Իրանցի մասնագետները հրավիրվել են Հայաստան՝ Իրան-Հայաստան երկաթուղու կառուցման նախագծի շուրջ քննարկումներ անցկացնելու նպատակով, մայիսի 26-ին լրագրողներին հայտնել է Հայաստանում ԻԻՀ դեսպան Սեյեդ Քազեմ Սաջադին «Պարսից գրականություն և պատմություն՚ գիտաժողովի բացման ժամանակ:

Խոսելով վերջերս Հայաստանի, Վրաստանի, Իրանի և Ռուսաստանի էներգետիկայի նախարարների հանդիպման մասին՝ Քազեմ Սաջադին հույս է հայտնել, որ նման հանդիպումների միջոցով կհաջողվի բարձրացնել Իրան-Հայաստան երկաթուղու կառուցման նախագծի իրականացման նկատմամբ իրանական կողմի հետաքրքրությունը:

Հիշեցնենք, որ 2014 թվականի դեկտեմբերին «Հարավկովկասյան երկաթուղիներ՚ ՓԲԸ-ի գլխավոր տնօրեն Վիկտոր Ռեբեցը հայտարարել էր, որ «Հարավկովկասյան երկաթուղիները՚ նախատեսում է հանդես գալ Իրան-Հայաստանի երկաթգծի օպերատոր: Իրան-Հայաստանի երկաթգծի կառուցման մասին խոսակցությունները են գնում արդեն մի քանի տարի: Այն թույլ կտա հայկական կողմին այլընտրանքային ճանապարհով էներգառեսուրսների և այլ ապրանքների փոխադրումներ իրականացնել ՝ ապահովելով մուտք դեպի արտաքին աշխարհ:

2012 թ. մայիսին հայկական և իրանական կողմը կոնցեսիոն համաձայնագիր են ստորագրել, ըստ որի` քննարկվել են տեխնիկատնտեսական հիմնավորումներն ու նախագծման, շինարարության և նախագծի ֆինանսավորման հիմնական խնդիրները։ Հայաստանի և ՙՌասիա ՖԶԷ՚ ներդրումային ընկերության միջև իրականացված համագործակցության շնորհիվ մշակվել է ՙՀարավային երկաթուղի՚ նախագծի իրականացման տեխնիկական հիմնավորումը։ Նախագծի արժեքը գնահատվում է 3.5 մլրդ դոլար։ Հայաստանի տարածքում երկաթուղու ընդհանուր երկարությունը կկազմի 305 կմ։ Այն կունենա 19.6 կմ ընդհանուր երկարության 86 կամուրջ և 102 կմ ընդհանուր երկարության 60 թունել։ Շինարարությունը, ծրագրի համաձայն, կավարտվի 2022 թվականին։