Արմինֆո. Սույն թվականի հունիսի 10-ին Ամերիաբանկն իր ներդրումային կառավարիչ responsAbility Investments AG ընկերության միջոցով հաջողությամբ տեղաբաշխել է 20 մլն ԱՄՆ դոլար ընդհանուր ծավալով պարտքային արժեթուղթ լյուքսեմբուրգյան չորս ներդրումային ֆոնդերի միջև:
Ինչպես ԱրմԻնֆո գործակալությանը տեղեկացվել է Ամերիաբանկի մամուլի ծառայությունից, Արժեթղթերի տեղաբաշխումից ձեռք բերված միջոցներն ուղղվելու են Հայաստանում փոքր և միջին ձեռնարկությունների վարկավորմանը, վերականգնվող էներգետիկայի և էներգաարդյունավետության ծրագրերի ֆինանսավորմանը:
Աղբյուրի համաձայն, այս ֆինանսավորումը կնպաստի ՓՄՁ-ների գործունեության հետագա ընդլայնմանն ու զարգացմանը, մրցունակության բարձրացմանը, նոր աշխատատեղերի ստեղծմանը: Վերականգնվող էներգետիկային և էներգաարդյունավետության ծրագրերին ուղղված ֆինանսավորումը կխթանի ոլորտի կայուն զարգացումը, կնպաստի երկրում էներգախնայողության ապահովմանը:
Նշվում է, որ զարգացող երկրների շուկաներում ներդրումներ իրականացնող այդ ֆոնդերը բարձր են գնահատել Ամերիաբանկի վարկային վարկանիշը, միջազգային կապիտալի շուկայում ունեցած հեղինակությունը, բարձր ֆինանսական ցուցանիշները, ճկուն բիզնես-մոդելը, կորպորատիվ կառավարման օրինակելի համակարգը, ինչպես նաև գործարքի ռիսկայնության ցածր մակարդակը, ինչի արդյունքում ձեռք են բերել Բանկի պարտքային արժեթղթերը մեծ ծավալով:
Իր հերթին, Ամերիաբանկը բարձր է գնահատում responsAbility Investments AG ընկերության հետ այս նոր գործընկերական հարաբերությունների ստեղծումը, որն էական նշանակություն կունենա տվյալ ոլորտների և ամբողջ ազգային տնտեսության զարգացման համար:
Նշենք, որ «Ամերիաբանկ» ՓԲԸ Հայաստանի դինամիկ զարգացող բանկերից է և դասվում է երկրի ամենակայուն և խոշոր ֆինանսական հաստատությունների շարքին: Այն Հայաստանում առաջին ներդրումային բանկն է և սկսած 2007թ-ից` տրամադրում է նորարարական բանկային ծառայությունների լայն տեսականի: Ամերիաբանկն ամբողջական լուծումներ է տրամադրում կորպորատիվ, մանրածախ և ներդրումային բանկինգի ոլորտներում, ինչպես նաև շարունակում է ներդրումներ կատարել առաջատար տեխնոլոգիաներում և հաճախորդների սպասարկման համակարգում: Ամերիաբանկը հատուկ մրցանակներն են` Euromoney-ից (2014 թ., 2012 թ., 2011 թ.), Global Finance-ից (2015 թ., 2013 թ., 2012 թ.), The Banker/FT-ից (2015 թ., 2013 թ., 2010): Ամերիաբանկը Հայաստանի բանկային համակարգի առաջատարն է նաև ակտիվների, վարկերի, պարտավորությունների, ինչպես նաև ժամկետային և ցպահանջ ավանդների չափերով: Բանկի կապիտալին ՎԶԵԲ ներգրավումով Ամերիաբանկը շուկայի առաջատարն է նաև կանոնադրական կապիտալի չափերով: Բանկի բաժնետերերը են` Ameria Group CY Ltd - 80% և ՎԶԵԲ - 20%:
Նշենք, որ responsAbility Investments AG ընկերությունն աշխարհի՝ զարգացման ուղղված ներդրումների ոլորտում ակտիվների կառավարման առաջատար ընկերություններից է, որն առաջարկում է մասնագիտացած ներդրումային լուծումներ մասնավոր և ինստիտուցիոնալ ներդրողների համար: Ընկերության ներդրումային գործիքները ներառում են պարտքային և փայատիրական ֆինանսավորում զարգացող շուկաների չցուցակված ընկերությունների համար: Ներկայում responsAbility ընկերության կառավարման ներքո գտնվում են 3 մլրդ ԱՄՆ դոլարի ակտիվներ, որոնք ներդրված են ավելի քան 90 երկրի շուրջ 520 ընկերություններում: 2003թ. հիմնադրված ընկերության գլխամասը գտնվում է Ցյուրիխում: Ընկերությունը նաև մասնաճյուղեր ունի Բանգկոկում, Ժնևում, Հոնկոնգում, Լիմայում, Լյուքսեմբուրգում, Մումբայում, Նայրոբիում, Օսլոյում և Փարիզում:
Ալեքսեյ Մելնիկով. ՀԿԵ-ն թողունակության բավականին լուրջ պաշար ունի
Հայաստանում դոլարային հիփոթեքի արգելքը՝ սպառողի շահերի պահապան թե բանկային շահերի լոբբինգ. Կարեն Զաքարյան
ԵԱՏՄ երկրներ ավտոմեքենա վաճառելիս ՊԵԿ-ի տեղեկանքները չեղարկվել են
Հայաստանի տնտեսությունն անառողջ է. տնտեսագետն առաջարկում է առկա խնդիրների լուծման եղանակներ
ԱԶԲ պատվիրակությունն այցելել է Հյուսիս-Հարավ ճանապարհային միջանցքի Սիսիան-Քաջարան հատված
Հայաստանի բանկերի միության խորհրդի նախագահ է ընտրվել Մհեր Անանյանը