Ա.Ջավադյան. Արգենտինայի ազգային բանկի նախագահի այցը կնպաստի երկկողմանիորեն հարաբերությունների ամրապնդմանը

Արմինֆո. Հունիսի 22-ին ՀՀ կենտրոնական բանկի նախագահ Արթուր Ջավադյանն ընդունել է Արգենտինայի ազգային բանկի նախագահ Կառլոս Մելքոնյանի գլխավորած պատվիրակությանը:

Ինչպես ԱրմԻնֆո գործակալությանը տեղեկացվել է ՀՀ ԿԲ մամուլի ծառայությունից, ողջունելով հյուրերին՝ Արթուր Ջավադյանը հույս է հայտնել, որ բանկի պատվիրակության այցն առիթ կծառայի արդյունավետ գործակցության մեկնարկի համար և կնպաստի մեր երկրների տնտեսությունների միջև երկկողմանիորեն շահավետ հարաբերությունների ամրապնդմանը:

ԿԲ նախագահը նշել է, որ ՀՀ կենտրոնական բանկը միշտ խրախուսել է օտարերկրյա ինստիտուցիոնալ ներդրողների մուտքը Հայաստանի ֆինանսական շուկա՝ քաջ գիտակցելով շուկայի մասնակիցների և արտերկրյա գործընկերների միջև փոխգործակցության կարևորությունը:

Հյուրերի խնդրանքով ՀՀ կենտրոնական բանկի նախագահը ներկայացրել է ՀՀ ֆինանսական համակարգի ներկա վիճակը, խոսել վերջինիս ցուցանիշների մասին:

Արգենտինայի ազգային բանկի նախագահ Կառլոս Մելքոնյանը շնորհակալություն է հայտնել ընդունելության համար և գոհունակություն հայտնել արգենտինացի գործարարների կողմից ՀՀ-ում կատարված ներդրումների առնչությամբ:

Կառլոս Մելքոնյանը պատրաստակամություն է հայտնել հնարավորինս նպաստել երկու երկրների ֆինանսական ոլորտների միջև կապերի ամրապնդմանը, ներդրումների ներգրավմանը, ինչպես նաև արտերկրում Հայաստանի ներկայացմանը:

ԿԲ ղեկավարության հետ հանդիպումից հետո Կառլոս Մելքոնյանը հանդիպել է Հայաստանում արգենտինական ներդրումներ իրականացրած ընկերությունների և Հայաստանի ֆինանսական շուկայի ներկայացուցիչների հետ, որի ընթացքում քննարկվել են ՀՀ-ում ներդրումների հնարավորություններին, երկրի ներդրումային գրավչությանը, մակրոտնտեսական զարգացումներին վերաբերող հարցեր:

Նշենք, որ նախորդ օրը Արգենտինայի ազգային բանկի նախագահը հանդիպել էր ՀՀ նախագահի և վարչապետի հետ:

Ըստ ՀՀ Ազգային վիճակագրական ծառայության տվյալների, հայաստանում արգնտինյան համախառն ներդրումների ծավալը 2016 թվականի ապրիլի 1-ին կազմել է 288.2 մլրդ դրամ, կամ $ 599,4 մլն (տարեկան աճը`25,9%), որից 155.4 մլրդ դրամը կամ $ 323,2 մլն - ՕՈՒՆ (տարեկան աճը` 9,2%): Արգենտինան իր ներդրումները Հայաստանում ուղղում է գյուղատնտեսության և օդային տրանսպորտի ոլորտներին: Հայաստանում օտարերկրյան ներդրումների ընդհանուր ծավալում Արգենտինան գտնվում է 5-րդ տեղում: