Չորեքշաբթի, 6 Հուլիսի 2016 11:53

Արմինֆո. Արդշինբանկի և Սևծովյան առևտրի և զարգացման բանկի (ՍԱԶԲ) միջև ստորագրվեց թվով երրորդ վարկային պայմանագիրը, որով Հայաստանում փոքր և միջին ձեռնարկությունների (ՓՄՁ) վարկավորմանը կհատկացվի եւս 10 մլն ԱՄՆ դոլար: Ինչպես ԱրմԻնֆո-ին հայտնել են բանկի մամուլի ծառայությունից, ծրագրի շրջանակներում Արդշինբանկը տրամադրելու է վարկեր իր հաճախորդներին սկսած տարեկան 11% տոկոսադրույքից:

 

ՓՄՁ ոլորտը հանդիսանում է Հայաստանի տնտեսության զարգացման, արտահանման խթանման և աշխատատեղերի ստեղծման համար կարևոր բաղկացուցիչ և այդ պատճառով Արդշինբանկի ռազմավարական զարգացման հիմքում ընկած է ՓՄՁ ոլորտում մատչելի վարկավորման խթանումը, նշվում է բանկի հաղորդագրության մեջ: Ըստ ԱրմԻնֆո գործակալության` Հայաստանի բանկերի ֆինանսական վարկանիշի, 2016 թվականի առաջին եռամսյակում Արդշինբանկը ՓՄՁ վարկավորման ծավալներն ավելացրել է մոտ 2 անգամ, մինչև 39.2 մլրդ դրամ, կտրուկ տեղ գրավելով առաջատարների հնգյակում: Բանկի վարկային պորտֆելում ՓՄՁ վարկերը կազմել են 12,4%, տարեսկզբի 7%-ի փոխարեն: Բանկի ընդհանուր վարկային պորտֆելը տարեկան կտրվածքով ավելացել է 26%, 2016-ի ապրիլի 1-ին կազմելով 315,1 մլրդ դրամ (ակտիվների 68.3%-ը), և այդ ցուցանիշով բանկը երկրորդն է համակարգում: Բանկն ունի 55 մասնաճյուղ, զբաղեցնելով 3-րդ տեղը շուկայում, ընդ որում, մասնաճյուղերից 13-ը գտնվում է Երևանում, 36-ը` Հայաստանի մարզերում և 6-ը` ԼՂՀ-ում: Բանկը միակ մասնավոր կազմակերպությունն է Հայաստանում, որը եվրապարտատոմսեր է թողարկել միջազգային ֆինանսական շուկայում և շնորհված վարկանիշներ ունի երկու միջազգային վարկանիշային գործակալությունների կողմից (Moody's և Fitch), Հայաստանի երկրի վարկանիշի մակարդակով:

 

Սևծովյան առևտրի և զարգացման բանկը (ՍԱԶԲ) միջազգային ֆինանսական կազմակերպություն է, որը հիմնադրվել է Սևծովյան տարածաշրջանի տասնմեկ երկրների կողմից: ՍԱԶԲ-ը խթանում է տնտեսական զարգացումը և տարածաշրջանային համագործակցությունը` իր անդամ երկրների պետական և մասնավոր հատվածի նախագծերի իրականացման համար տրամադրելով վարկեր, վարկային գծեր, երաշխիքներ, ինչպես նաև իրականացնելով ներդրումներ կապիտալում և առևտրի ֆինանսավորում: