Չորեքշաբթի, 6 Հուլիսի 2016 18:38

Արմինֆո. 2016թ.-ի հուլիսի 06-ին  «ԱՐԱՐԱՏԲԱՆԿ» ԲԲԸ-ի անվանական արժեկտրոնային պարտատոմսերը ցուցակվել և ընդգրկվել են ՆԱՍԴԱՔ ՕԷՄԷՔՍ Արմենիայի պարտատոմսերի երկրորդային (Bbond) ցուցակում: Ինչպես ԱրմԻնֆո գործակալությանը տեղեկացվել է Բորսայի մամուլի ծառայությունից, այդ պարտատոմսերը ցուցակման պահից թույլատրվել են նշված պարտատոմսերով հասցեական առևտուրը և ռեպո գործարքների կնքումը: Պարտատոմսերը (ISIN - AMARBKB2BER6) բորսայում կշրջանառվեն ARBKB2B բորսայական հապավմամբ:

Աղբյուրի համաձայն, ԱՐԱՐԱՏԲԱՆԿԻ պարտատոմսերի 11-րդ թողարկումը ներառում է 1 մլն. դոլար ծավալով 40,000 անվանական, արժեկտրոնային պարտատոմս` յուրաքանչյուրը 25 ԱՄՆ դոլար անվանական արժեքով, արժեկտրոնի 7.0% տոկոսադրույքով և 36 ամիս շրջանառության ժամկետով: Հատկապես դոլարային պարտատոմսերիկ թողարկումը պայմանավորված է արտարժույթով արժեթղթերի նկատմամբ ներդրողների բարձր պահանջարկով, պարզաբանել են բանկում: Այս էմիսիայի շրջանակներում ապրիի 20-ին թողարկվել է 40 հազար ոչ փաստաթղթային պարտատոմս, յուրաքանչյուրը 25 ԱՄՆ դոլար անվանական արժեքով: Արժեկտրոնների վճարները նախատեսված են ըստ եռամսյակների: Բանկի արտարժույթով պարտատոմսերի առաջին տեղաբաշխումը տեղի է ունեցել հունիսի 6-17-ը, իսկ շրջանառության ժամկետն ավարտվում է 2018 թվականի հունիսի 18-ին:

Ինչպես ավելի վաղ ԱրմԻնֆո գործակալությանը տեղեկացրել էր ԱՐԱՐԱՏԲԱՆԿԻ փոխտնօեն Դավիթ Հարությունյանը, 2015 թվականին Արարատբանկի պարտատոմսերով իրականացվել է 130 գործարք, 219 մլն.դրամ կամ 1 մլն.դոլար ընդհանուր ծավալով:

«Մեկ տարի առաջ, եթե դիտում ենք NASDAQ OMX ARMENIA Բորսայի ընդհանուր շրջանառության դինամիկան, գործարքների 58%-ն իրականացվել է մեր բանկի պարտատոմսերով, իսկ ընթացիկ տարում մեր մասնաբաժինն առաջին ամիսներին արդեն կազմել է 2%: Սա վկաում է այն մասին, որ արժեթղթերի բորսայում իրականացվող յուրաքանչյուր երկրորդ թողարկումն իրականացնում է Արատարատբանկը: Իմ կարծիքով, սա բանկի հետևողական գործունեության արդյունքն է, որով ապահովվում է իրացվելիությունն արժեթղթերի շուկայում»:

Նշենք, որ 2007 թվականին ԱՐԱՐԱՏԲԱՆԿՆ առաջին անգամ կորպորատիվ պարտատոմսերի շուկա էր դուրս եկել 250 մլն դրամ ծավալով: Առաջին թողարկման տարեկան տարեկան եկամտաբերությունը կազմեց 8%, շրջանառության ժամկետը`1 տարի: Երկրորդ թողարկման շրջանակներում թողարկման ծավալը կազմեց 400 մլն դրամ, տարեկան եկամտաբերությունը` 9%, շրջանառության ժամկետը` 1.5 տարի: Երրորդ թողարկման ծավալը կազմեց 250 մլն դրամ, տարեկան եկամտաբերությունը` 10%, շրջանառության ժամկետը` 1.5 տարի: 2011-ին տեղի ունեցած չորրորդ թողարկման ծավալը կազմեց 250 մլն դրամ, եկամտաբերությունը` 12%: Հինգերորդ թողարկումն արտարժույթով էր (2012 թ.), որի ծավալը կազմեց 1 մլն դոլար, եկամտաբերությունը`9%: Վեցերորդ թողարկումը (2013), բանկը թողարկեց արտարժույթով, $ 1 մլն.ծավալով, 3 տարի ժամկետով, եկամտաբերությունը` 8.5%: Յոթերորդ թողարկումը (2013), թողարկվեց 400 մլն դրամ ծավալով, շրջանառության ժամկետը` 3 տարի, տարեկան եկամտաբերությունը`13%: Ութերորդ թողարկումն արտարժութային էր, ծավալը` $ 1 մլն, շրջանառության ժամկետը` 4 տարի, եկամտաբերությունը` 8%: Բանկի 9-րդ թողարկումը կազմված էր 2 մլն.դոլար ծավալով արտարժութային արժեկտրոնային պարտատոմսերից, 3 տարի շրջանառության ժամկետով: 10-րդ թողարկումը (2015) կազմված էր 2 մլն.դոլար ծավալով արտարժութային արժեկտրոնային պարտատոմսերից, 2 տարի շրջանառության ժամկետով: Ներկայումս բորսայում շրջանառվում են ԱՐԱՐԱՏԲԱՆԿԻ կորպորատիվ պարտատոմսերի հինգ թողարկումները (6-10):

Ըստ ԱրմԻնֆո գործակալության` Հայաստանի բանկերի ֆինանսական վարկանիշների, Արարատբանկի ակտիվները 2016 թ. ապրիլի 1-ին կազմել են 130.7 մլրդ.դրամ, որոնց կառուցվածքում արժեթղթերին ուղղված ներդրումները կազմել են ավելի քան 11% կամ 14.2 մլրդ.դրամ: Բանկի պարտավորությունները նույն օրվա դրությամբ կազմել են 108 մլրդ դրամ, ընդհանուր կապիտալը` 22.7 մլրդ.դրամ: 2016 թվականի առաջին եռամսյակը բանկը եզրափակել է 176.8 մլն դրամ զուտ շահույթով, տարեկան աճը` 2.7 անգամ: Առաջին եռամսյակի արդյունքներով բանկի ROA և ROE ցուցանիշները համապատասխանաբար կազմել են`0.52% և 3.33%, տեղ զբաղեցնելով առաջատարների տասնյակում: Ըստ վերջին տվյալների, Արարատբանկի մեծամասնական բաժնետերերն են` «Ֆլեշ» (նախագահ` Բարսեղ Բեգլարյան) ընկերությունը` 64.24%, ՎԶԵԲ-ը`25%+1 բաժնետոմս և բելգիական Rural Impulse Fund II-ը`10%: (ՀՀ դրամի փոխարժեքը 31.03.2016 թ. կազմել է 480.79 դրամ/դոլար):