Ուրբաթ, 12 Օգոստոսի 2016 18:12

Արմինֆո. Ավստրիական զարգացման գործակալության (ԱԶԳ) մշակած չափանիշների համաձայն վերջին ամիսներին ընտրվել է Հայաստանի 16 ֆերմերային տնտեսություն, որոնց ԵՄ կողմից, ԱԶԳ հետ համատեղ, կհատկացվի 2.8 մլն.եվրո ֆինանսավորում`օրգանական գյուղատնտեսության զարգացման նպատակով: Այս մասին այսօր տեղի է ունեցած մամուլի ասուլիսում հայտարարել է ՀՀ գյուղատնտեսության նախարարի տեղակալ Արմեն Հարությունյանը:

Նրա խոսքով, ծրագրի առաջին փուլին ներգրավված են ֆերմերները, որոնք գործունեություն են իրականացնում ագրոհատվածի տարբեր ոլորտներում, մասնավորապես, գինեգործության, բուսաբուծության, մեղրի արտադրության, էկոտուրիզմի և այլ ոլորտներում: Աջակցման շրջանակներում նրանց կտրամադրվի օրգանական սերթիֆիկացում և օրգանական փորձի տարածման հնարավորություն: Ինչպես նշել է Հարությունյանը, երկրորդ փուլը կմեկնարկի այս տարվա հոկտեմբերին, որտեղ սուբսիդիաներ ստացողների թիվը կավելանա մինչև 40, որոնք կարող են պարզեցված կարգով դիմել ֆինանսական օգնության համար:

Ըստ փոխնախարարի, USAID հետ համագործակցության շրջանակներում գերատեսչությունն իրականացնում է մի շարք ծրագրեր, որոնք ուղղված են ձկնային տնտեսություններում ջրային ռեսուրսների արդյւոնավետ օգտագործմանը, որի պիլոտային ծրագիրը նախատեսվում է գործարկել տարեվերջին: Ծրագրի ֆինանսավորումը կկազմի 5.6 մլն.դոլար: Բացի այդ, «ՀՀ գյուղերի զարգացման» ծրոգրով աջակցություն կտրամադրվի 100 սահմանամերձ գյուղերին: Ըստ փոխնախարարի, 4 մլն.դոլար կուղղվի կոոպերատիվների, ոչ մեծ ջերմատների և չիրերի պատրաստման տնտեսություններին:

Շվեյցարիայի զարգացման և համագործակցության գործակալության ֆինասնավորմամբ գյուղատնտեսության ոլորտում կիրականացվեն մի շարք ծրագրեր, մասնավորապես, պտղաբանջարանոցային կուլտուրաների զարգացմանը: Անդրադառնալով ԱՄՆ Միջազգային զարգացման գործակալության (USAID) հետ իրականացվող ծրագրերին`փոխնախարարը հատկապես շեշտել է Հայաստանի ագրարային ոլորտի զարգացմանն ու համայնքների բարեկեցության բարձրացմանն ուղղված «Մաքուր էներգիա և ջուր», «Գործընկերություն` հանուն գյուղական համայնքների բարգավաճման», ինչպես նաև «Գյուղի զարգացման արդի նախաձեռնություն» ծրագրերի արդյունավետությունն ու հաջող ընթացքը:

Եվրամիության հետ համագործակցության շրջանակում հատուկ անդրադարձ է կատարվել «Եվրոպական հարևանության գյուղատնտեսության և գյուղի զարգացման ծրագրով» (ENPARD) 26 միլիոն եվրո արժողությամբ եռամյա ծրագրին, որից 20 մլն-ը` բյուջետային աջակցություն է, 6 մլն-ը` տեխնիկական և իրականացվում է ՄԱԿ-ի կառույցների կողմից: Փախնախարարը նաև տեղեկացրել է, որ երկկողմ համագործակցության շրջանակում նախատեսվում է իրականացնել պիլոտային ծրագրեր հակակարկտային ցանցերի ներդրման և ցրտահարության դեմ պայքարի նոր միջոցների կիրառման ուղղությամբ: