Ուրբաթ, 9 Սեպտեմբերի 2016 17:01

Արմինֆո. Հայաստանում ԱԷԿ-ի N2 էներգաբլոկի շահագործման ժամկետի երկարացման նախագծի նկատմամբ հետաքրքրության աճ է նկատվում: Այդ մասին հայտարարել է ՙՌուսատոմսերվիսի՚ գլխավոր տնօրեն Եվգենի Սալկովը՝ պատասխանելով ԱրմԻնֆո-ի հարցին:

Նրա խոսքով, այդ հետաքրքրությունը դրսևորվել է նաև ծրագրի իրականացման աշխատանքային խմբի չորրորդ նիստի ընթացքում: ՙՆիստի աշխատանքին մասնակցել են բազմաթիվ հավանական մասնակիցներ՚,- նշել է գլխավոր տնօրենը՝ ավելացնելով, որ ՙՌոսատոմն՚ իր կողմից պատրաստ է մեթոդաբանական օգնություն ցուցաբերել իր հայ գործընկերներին գնումների ընթացակարգերի կազմակերպման հարցում: Գլխավոր տնօրենը հայտնել է, որ ՙՌոսատոմի՚ երկու էլեկտրոնային հարթակներում արդեն համապատասխանաբար 34 և 15 հայկական ընկերություն է գրանցվել: Նրանք, իհարկե, անմիջապես միջուկային էներգետիկայի հետ կապված չեն: ՙԲայց մենք կշարունակենք զբաղվել նախագծի հանրայնացմամբ, որպեսզի հայկական ընկերությունների թիվն անշեղորեն ավելանա: Պետք է  նաև հասկանալ, որ այդ նույն ընկերությունները կարող են նաև դուրս գալ ռուսական շուկա, որտեղ մասշտաբային նախագծեր են իրականացվում  միջուկային էներգետիկայի ոլորտում: Բացի այդ, նախագծեր կան նաև ջերմային էներգետիկայի, միջուկային բժշկության ոլորտում՚,- ընդգծել է Եվգենի Սալկովն՝ ավելացնելով, որ Հայաստանը, լինելով Եվրասիական տնտեսական միության անդամ, կարող է լրացուցիչ արտոնություններ ստանալ:

Եվգենի Սալկովը նշել է, որ ՀԱԷԿ արդիականացման ծրագրի համար սարքավորումների գնումներն իրականացվում են՝ ՙՌոսատոմի՚ միասնական ճյուղային ստանդարտի համաձայն: Խոսքը վերաբերում է համակարգին, որի հիման վրա ՙՌոսատոմն՚ իրականացնում է իր կարիքների համար բոլոր գնումները: Համակարգը լավագույններից մեկն է Ռուսաստանում, քանի որ այն թափանցիկ է և արդյունավետ: ՙՄեր հիմնական խնդիրն իրական մրցակցային պայմանների ստեղծումն է՝ հրավիրելով առավելագույն քանակությամբ մասնակիցների, ինչը հնարավորություն կտա գտնել կայանի համար լավագույն պայմաններ առաջարկած մատակարարին՚,- նշել է Սալկովը՝ ավելացնելով, որ գինը միակ չափորոշիչը չէ, քանի որ որակյալ պետք է լինեն սարքավորումը և ծառայությունները:

Մեծամորի մոտ գտնվող ՀԱԷԿ-ը, որը միակն է տարածաշրջանում, շահագործման էր հանձնվել 1980 թվականին և կանգնեցվել էր 1989 թվականի մարտին` Սպիտակի երկրաշարժից հետո: ՀԱԷԿ-ը վերագործարկվել է 1995 թվականի նոյեմբերին` հանրապետությունում սուր էներգետիկ ճգնաժամի առնչությամբ: Կայանի երկու էներգաբլոկները զինված են ռուսական առաջին սերնդի ВВЭР-440 ռեակտորներով: Առաջին բլոկն այժմ կանգնեցված է: Կայանին բաժին է ընկնում էլեկտրաէներգիայի արտադրության մինչև 40%-ը: Փորձագետների գնահատականների համաձայն, կայանի շահագործման ռեսուրսն ասպառվում է 2016 թվականին: Այժմ աշխատանքներ են իրականացվում կայանի շահագործման ժամկետը մինչև 2027 թիվը երկարաձգելու համար: Նախագծի իրագործման համար նախորդ տարվա վերջին Մոսկվայում ստորագրվել է պայմանագիր, որի համաձայն, ռուսական կողմը կայանի շահագործման ժամկետի երկարաձգման համար Հայաստանին 270 մլն դոլարի վարկ կտրամադրի` 15 տարվա ընացքում մարման պայմանով` 3%  տարեկան տոկոսադրույքով: Բացի այդ, նույն նպատակների համար Ռուսաստանի Դաշնությունը 30 մլն դոլարի դրամաշնորհ կտրամադրի Հայաստանին: Երկրի էլեկտրամատակարարման խնդիրը կարող է լուծել միայն նոր բլոկի կառուցումը, որը Հայաստանի վրա կնստի 5 մլրդ դոլար: