Երեթշաբթի, 13 Սեպտեմբերի 2016 14:40

Արմինֆո. Սեպտեմբերի 20-ին՝ ժամը 00:00-ին, ՀԱԷԿ-ի աշխատանքը կդադարեցվի՝ պլանային-նախազգուշական վերանորոգման /ՊՆՎ/ նպատակով: Այդ մասին հայտնել է կայանի գլխավոր տնօրեն Մովսես Վարդանյանը: Նրա խոսքով, կայանի աշխատանքը կդադարեցվի 61 օրով, նախատեսվում է ԱԷԿ-ը շահագործման մեջ մտցնել նոյեմբերի 20-ին: Պլանային-նախազգուշական աշխատանքների ընթացքում մի շարք միջոցառումներ կիրականացվի ՙՌուսատոմ սերվիս՚ ընկերության հետ համատեղ՝ ՀԱԷԿ-ի №2 էներգաբլոկի շահագործման ժամկետի երկարացման ծրագրին խիստ համապատասխան:

 

Կայանի տնօրենի խոսքով, մասնագետներին սպասվում է հսկայական ծավալի աշխատանք, մասնավորապես՝ կիրականացվի ռեկատորի կորպուսի լիակատար զննում: ՙԸնթացիկ տարում հիմնականում կանցկացվեն ստուգիչ աշխատանքներ: Կարևոր է համոզվել, որ կայանի սարքավորումը հետագա շահագործման համար անհրաժեշտ ռեսուրս ունի՚,- ընդգծել է Մովսես Վարդանյանը:

 

Նախատեսված միջոցառումների ավարտից հետո ԱԷԿ ղեկավարությունը մտադիր է դիմել Միջուկային անվտանգության կարգավորման պետական կոմիտե՝ հետագա աշխատանքի թույլտվություն ստանալու նպատակով:

ՊՆՎ աշխատանքի մի մասը կիրականացվի ռուսական վարկի միջոցների հաշվին: ՊՆՎ ավարտից հետո կկազմվի ՀԱԷԿ-ի №2 էներգաբլոկի շահագործման ժամկետի 10 տարով երկարացման ծրագրի վերջնական տարբերակը: Վարդանյանը հիշեցրել է նաև, որ 10 տարի ժամկետով երկարացման վերաբերյալ որոշում կայացրել է երկրի կառավարությունը, թեև կայանում տեղադրվելիք նոր սարքավորումը նախատեսված է 30 տարվա համար: Նրա խոսքով, 2026 թվականին կրկին բլոկի շահագործման ժամկետի երկարացման հնարավորություն կառաջանա, բայց արդեն՝ նվազագույն ծախսերով: Գլխավոր տնօրենը նշել է, որ 2016 թվականի սեպտեմբերին ՀԱԷԿ երկրորդ էներգաբլոկի շահագործման ժամկետը կկազմի 30 տարի, և անհրաժեշտ աշխատանքներից հետո տեսականորեն կայանը կարող է էլեկտրաէներգիա արտադրել ևս 30 տարի:

ՙԲայց քանի որ կառավարությունը սահմանել է10 տարի ժամկետ, հիմնավորումներ են կատարվում 10 տարվա համար՚,- ընդգծել է գլխավոր տնօրենը՝ նշելով, որ ծրագրի շրջանակներում կփոխարինվեն տուրբինները, գեներատորները, տրանսֆորմատորները, կոնդեսատորները, պոմպերը: Արդյունքում կայանի ՕԳԳ-ն կբարձրանա 40-50 մեգավատտով, ինչը թույլ կտա, առանց վառելիքի լրացուցիչ ծավալների, լրացուցիչ 400 մլն կՎտ/ժ էլեկտրաէներգիա արտադրել:

Ռուսական վարկի սպասարկման նպատակով ԱԷԿ-ը 2020 թվականից հետո մտադիր է դիմել կարգավորող մարմնին՝ կայանի համար սակագնի բարձրացման խնդրանքով: Բայց եթե հաջողվի միջոցներ տնտեսել և 200 մլն դոլարի ծրագիր իրականացնել, սակագնի բարձրացման անհրաժեշտությունն ինքնըստինքյան կվերանա: Իսկ վարկի սպասարկումնը կիրականացվի լրացուցիչ մեգավատտերի հաշվին: ՙԲայց, ամենայն հավանականությամբ, սակագինն, այնուամենայնիվ, կբարձրանա, և տեղի կունենա դա 2020 թվականից հետո՚,- նշել է գլխավոր տնօրենը: