Արմինֆո. Ըստ նախնական տվյալների, «Հայաստանի էլեկտրական ցանցեր» ՓԲԸ շահույթը 2016 թվականին կկազմի շուրջ 15 մլրդ դրամ: Սեպտեմբերի 14-ին լրագրողների հետ հանդիպմանն այդ մասին հայտարարել է ՀԷՑ գլխավոր տնօրեն Կարեն Հարությունյանը:
Նրա ասելով, ընթացիկ տարվա առաջին կիսամյակում նույնպես ընկերության շահույթը հավասար էր 15 մլրդ դրամի, ինչը չի կարելի համարել գերշահույթ, քանի որ ընկերության կողմից վաճառվող էլեկտրաէներգիայի սակագնի բարձրացումից հետո ողջ շահույթը նախատեսվում էր ուղղորդել ժամկետանց պարտավորությունների մարմանը: Ինչպես և ծրագրված էր, ընկերության մարժան բարձրացել է մինչև 23,5 մլրդ դրամ, բարձրացել է նաև վճարումների հավաքագրման մակարդակը: Արդյունքում` ընկերությունը լիովին կատարել է իր բոլոր պարտավորություններն արտադրող օբյեկտների հանդեպ: «Մենք այլևս ժամկետանց պարտավորություններ չունենք», - նշել է Կ .Հարությունյանը, միևնույն ժամանակ հավելելով, որ կարիք չկա հեռուն գնացող հետևություններ կատարել առաջին կիսամյակի հաջողություններից: Առաջին կիսամյակում Հայաստանում, որպես կանոն, դիտվում է ջրառատություն, և հիդրոէներգետիկ օբյեկտները ոչ թանկարժեք էլեկտրաէներգիայով նպաստում են շահույթի ստացմանը: Սակայն երկրորդ կիսամյակում նման ջրառատություն չի լինի, մի շարք փոքր ՀԷԿ-եր կամ, ընդհանրապես, էլետրաէներգիա չեն արտադրի, կամ կտրուկ կնվազեցնեն արտադրության ծավալները: Ավելին, փոքր ՀԷԿ-երի զարգացումը հիդրոռեսուրսների արդյունավետ օգտագործման տեսանկյունից իրեն սպառել է: Ինչ վերաբերում է ՀԱԷԿ-ին, ապա, ինչպես հիշեցրել է գլխավոր տնօրենը, կայանի ավելորդ պարապուրդի արդյունքում ցանցերի վնասը կազմել է շուրջ 5 մլրդ դրամ: Սեպտեմբերի 20-ից կայանը 40 օրով կանգնեցվում է պլանային-նախազգուշական վերանորոգման: Որպես արդյունք` ընկերությունն ստիպված է լինելու, կամ, ձեռք բերել ամենաթանկ էլեկտրաէներգիան Հրազդանի ՋԷԿ-ից, կամ` այն մատակարարել Իրանից` համապատասխան ռեժիմների առկայության դեպքում: Առաջին կիսամյակի արդյունքների վրա ազդած ևս մեկ գործոն է կորուստների նվազումը: Կորուստների մեկ տոկոս կրճատումն ընկերությանը լրացուցիչ 1,3 մլրդ դրամ շահույթ է տալիս, ինչին հաջողվել է հասնել նաև գործառնական ծախսերի կրճատման շնորհիվ, ծախսերի առավել արդյունավետ կառավարմամբ: «Յուրաքանչյուր ընկերություն պետք է ձգտի շահույթ ստանալ, սակայն ՀԷՑ-ը երբեք գերշահույթ չի ստանա», - նշել է գլխավոր տնօրենը, հավելելով, որ լիցենզիային համապատասխան, ողջ գերշահույթը պետք է ուղղորդվի հանրապետության ողջ էներգետիկ հատվածի ռեսուրսի հզորացմանը:
Սարգիս Խաչատրյան. Մեր գործունեությունն ուղղված է լինելու հաճախորդների փորձառության բարելավմանը
Բիզնեսի թվայնացման հիմնախնդիրը, ո՞ր հանգրվանում է Հայաստանը
Գևորգ Մանթաշյան. Բարձր տեխնոլոգիական արդյունաբերության նախարարությունը հետևողական աշխատանք է տանում Հայաստանում ստարտափների կայացման ուղղությամբ
Bank of Georgia-ն հայտարարել է 303.6 մլն դոլարով "Ամերիաբանկի" ձեռք բերման շուրջ նախնական համաձայնության մասին