Արմինֆո. Ռուսաստանի Կենտրոնական բանկը կարող է ընդլայնել վճարային քարտերի ազգային համակարգի (ՎՔԱՀ) և Բելառուսի, Ղազախստանի, Հայաստանի ու Ղրղզստանի վճարային համակարգերի միջև համագործակցության մասին համաձայնագիրը: Այս մասին «Իզվեստիա» պարբերականին պատմել է ՎՔԱՀ վարչության նախագահ Վլադիմիր Կոմլևը:
Նրա խոսքով, համաձայնագրի ընդլայնման հարցով աշխատանքներ են ընթանում Բելառուսի «Բելքարտ», Հայաստանի «Արմենիան քարդ», Ղազախստանի «Տենգրի քարդ» և Ղրղզստանի «Էլքարդ» համակարգերի հետ: «Հայկական վճարային համակարգի հետ հարցն արդեն գտնվում է գործնական հարթությունում: Իսկ մնացած երկրների վճարային համակարգերի հետ պատրաստվում ենք քննարկմումներին, իսկ հետագայում` ճանապարհային քարտերի ստեղծմանը»,-պարզաբանել է ՎՔԱՀ ներկայացուցիչը:
2016 թվականի նոյեմբերին ՎՔԱՀ-ը նախատեսում է հանդիպումներ անցկացնել ԵԱՏՄ երկրների ազգային վճարային համակարգերի և ազգային բանկերի ներկայացուցիչների հետ:
«Անհրաժեշտ է ավարտին հասցնել իրավաբանական և պայմանագրային հարցերը, որպեսզի փոխկապակցվեն բոլոր շահերը: Յուրաքանչյուր վճարային համակարգ ունի իր սեփական սակագնային քաղաքականությունը: Եթե մենք խոսում ենք համակարգերի ինտեգրման մասին, ուրեմն պետք է լինի միասնական սակագնային քաղաքականություն»,-պատմել է Կոմլևը պարբերականին:
Նշենք, որ հունիսի 3-ին Երևանում ստորագրվել է «Armenian Card» ՓԲԸ և «ՎՔԱՀ» ԲԸ (НСПК, ռուսաստանյան «Мир» վճարային համակարգի օպերատոր) միջև մտադրությունների մասին համաձայնագիրը: Կողմերը պայմանավորվել են ապահովել «ArCa»a և «Мир» վճարային քարտերի փոխադարձ սպասարկումը իրենց մասնակիցների վճարային ենթակառուցվածքներում:
Նշենք, որ Armenian Card ՓԲԸ-ն հիմնադրվել է 2000 թվականին: 2001 թվականից Armenian Card-ը հանդես է գալիս որպես պրոցեսինգային կենտրոն, տեղական ArCa քարտերից բացի իրականացնելով նաև միջազգային MasterCard Worldwide քարտերի թողարկում և էկվայրինգ, Visa Int. քարտերի էկվայրինգ, ունենալով Member Service Provider (MasterCard) և Third Party Processor (Visa Int.) կարգավիճակ: 2010 թվականին Armenian Card-ը սկսեց հանդես գալ նաև որպես American Express (Third Party Processor) միջազգային քարտերի պրոցեսինգային կենտրոն: Ներկայումս ընկերության բաժնետերերն են ՀՀ Կենտրոնական բանկը և Հայաստանի 17 առևտրային բանկեր, սակայն ArCa համակարգի անդամ են հանդիսանում գործնականում բոլոր բանկերը, իրականացնելով վճարային քարտերի թողարկում և/կամ էկվայրինգ: 2013 թվականի փետրվարի սկզբին Armenian Card-ն ամբողջովին արդիականացրեց ծրագրային ապահովումը, համապատասխանեցնելով այն միջազգային ստանդարտներին, Հայաստանի ինտերնետ և շարժական վճարների շուկայի զարգացման համար բացելով նոր ժանակաշրջան: 2014 թվականի վերջին ընկերությունը հայտարարեց 3DSecure տեխնոլոգիայի ներդրման մասին:
Ըստ ԱրմԻնֆո գործակալության`«Հայաստանի բանկերը քարտային բիզնեսում» վերլուծական տեղեկագրի, Հայաստանի պլաստիկ քարտերի շուկայում 2016 թվականի հուլիսի 1-ի դրությամբ եղել է 1,8 մլն քարտ, այդ թվում`45% - Visa (784.2 հազար), 30% - ArCa (534.4 հազար), 22% - MasterCard (392.2 հազար): Մնացած 3%-ը (45.5 հազ. քարտ) կազմում են մյուս միջազգային քարտերը (HSBC, American Express, Diners Club): 2016 թվականի առաջին կիսամյակում պլաստիկ գործարքների ծավալը կազմել է 655.5 մլրդ դրամ, այդ թվում`85.7 մլրդ դրամ կազմել է անկանխիկ քարտային գործարքների ծավալը: 2016-ի հուլիսի 1-ին Հայաստանում եղել է 6630 POS-թերմինալ և 1511 բանկոմատ:
Ալեքսեյ Մելնիկով. ՀԿԵ-ն թողունակության բավականին լուրջ պաշար ունի
Հայաստանում դոլարային հիփոթեքի արգելքը՝ սպառողի շահերի պահապան թե բանկային շահերի լոբբինգ. Կարեն Զաքարյան
ԵԱՏՄ երկրներ ավտոմեքենա վաճառելիս ՊԵԿ-ի տեղեկանքները չեղարկվել են
Հայաստանի տնտեսությունն անառողջ է. տնտեսագետն առաջարկում է առկա խնդիրների լուծման եղանակներ
ԱԶԲ պատվիրակությունն այցելել է Հյուսիս-Հարավ ճանապարհային միջանցքի Սիսիան-Քաջարան հատված
Հայաստանի բանկերի միության խորհրդի նախագահ է ընտրվել Մհեր Անանյանը