Չորեքշաբթի, 28 Սեպտեմբերի 2016 20:46

Արմինֆո. ՀՀ գյուղատնտեսության նախարար Իգնատի Առաքելյանն այսօր աշխատանքային այց է կատարել Վայոց ձորի մարզ` խաղողի մթերման գործընթացին առնչվող խնդիրները տեղում քննարկելու նպատակով:

Ինչպես ԱրմԻնֆո գործակալությանը տեղեկացվել է ՀՀ գյուղատնտեսության նախարարության տեղեկատվության և հասարակայնության հետ կապերի բաժնից, նախարարի առաջին կանգառն Աղավնաձոր համայնքում էր, որտեղ նա հանդիպել է խաղողագործների հետ: Հանդիպմանը ներկա էին մարզպետ Հարություն Սարգսյանը, ՀՀ գյուղատնտեսության նախարարի տեղակալ Ռոբերտ Մակարյանը, ՀՀ տարածքային կառավարման և զարգացման նախարարի տեղակալ Կարեն Իսախանյանը, «Վեդի Ալկո» ընկերության սեփականատեր Մանվել Ղազարյանը:

«Վեդի Ալկոն» իր բոլոր պարտավորություններն  առաջիկայում ամբողջությամբ կկատարի: Սակայն անհրաժեշտ է   խաղողի մթերումների խնդրին համակարգային լուծում տալ և այս իրավիճակից համատեղ ուժերով ելքեր գտնել, որպեսզի ամեն տարի չբախվենք նույն հարցի հետ»,-իր խոսքում նշել է նախարար Առաքելյանը:

Նախարարի խոսքով` վերամշակողը պետք է կարողանա մրցակցային գներով մտնել շուկա, իսկ դրա համար անհրաժեշտ է, որպեսզի գյուղմթերքն էժան լինի:  Այս համատեքստում նախարարն ընդգծել է, որ անհրաժեշտ է քայլեր ձեռնարկել բերքատվության բարձրացման և խաղողի ինքնարժեքի իջեցման ուղղությամբ: Նա առաջարկել է սերտորեն համագործակցել մասնավոր ներդրողների և ԳԱՄԿ-երի հետ` այգիներում նորագույն տեխնոլոգիաներ ներդնելու և մշակությունն առավել արդյունավետ կազմակերպելու նպատակով: Նախարարը տեղեկացրել է աղավնաձորցիներին, որ նախորդ տարվա խաղողի մթերումների դիմաց վճարումների կատարման խնդիրը կառավարության աջակցությամբ լուծվել է, և գյուղացիներն առաջիկայում կստանան իրենց գումարները: «Մենք գիտակցում ենք, որ սա գյուղացու համար օրվա հացի խնդիր է, դուք ամբողջ տարին հողին նվիրված աշխատել եք, այսօր ունեք բազմաթիվ պարտքեր, ուստի  կառավարությունը միջամտել է խնդրին:  

Որպես լուծման տարբերակ` Իգնատի Առաքելյանը նաև առաջարկել է  աղավնաձորցիներին քննարկել  միավորվելու միջոցով գինու արտադրության փոքր գործարան հիմնելու հնարավորությունը` ընդգծելով, որ պետությունը պատրաստ է աջակցել, բիզնես ծրագիր կազմել և ներդրողներ գտնել:

Հիշեցնենք, որ «Վեդի Ալկո» ընկերությունը անցյալ տարվա բերքի դիմաց ֆերմերներին պարտք է մնացել 140 մլն.դրամ, ինչի կապակցությամբ էլ Վայոց Ձորի Աղավնաձոր գյուղի բնակիչները կազմեկրեպ էին բողոքի ակցիա: Ի դեպ, դա առաջին ակցիան չէր: Մեկ ամիս առաջ նախորդ վարչապետ Հովիկ Աբրահամյանը նույնպես խոստացել էր լուծել պրոբլեմը, բայց խնդիրը չի լուծվել:

Ըստ ԱրմԻնֆո գործակալության` Հայստանի Ձեռնարկությունների Ռենկինգի, «Վեդի Ալկո» ՓԲԸ զուտ շահույթը 2015 թվականին կազմել է 77.7 մլն դրամ, տարեկան կտրվածքով ավելանալով 3,2 անգամ և դուրս գալով վնասից: Վաճառքից ստացված հասույթը հաշվետու տարում նվազել է 35%, մինչև 1,7 մլրդ դրամ, իսկ վաճառքի ինքնարժեքը`42%, մինչև 1,1 մլրդ դրամ, ինչի արդյունքում համախառն շահույթը կազմել է 585.3 մլն դրամ, տարեկան անկումը`9%: Իրացման ծախսերը 2015-ին նվազել են գրեթե 3 անգամ, մինչև 71,7 մլն դրամ: Ընկերության ակտիվները նվազել են 12,2%, մինչև 4,3 մլրդ դրամ:

Ըստ ՀՀ Ազգային վիճակագրական ծառայության տվյալների, 2016 թվականի հունվար-օգոստոսին գյուղատնտեսական արտադրանքի արտադրության ընդհանուր ծավալը կազմել է 509.9 մլրդ. դրամ ($ 1.1 մլրդ), տարեկան կտրվածքով այս ցուցանիշն աճել է 4,1%, տնտեսական ակտիվության 2,4% աճի պայմաններում: