ՎՏԲ24-ի ղեկավարը բարձր է գնահատում երկրում ներդրումային մթնոլորտն աշխուժացնելու ուղղությամբ ՀՀ նոր կառավարության ձգտումը

Արմինֆո. ՎՏԲ24-ի ղեկավար Միխայիլ Զադորնովը բարձր է գնահատում երկրում ներդրումային մթնոլորտն աշխուժացնելու ուղղությամբ ՀՀ նոր կառավարության ձգտումը: Այսօր Երևանում կայացած մամուլի ասուլիսում Զադորնովն ընդգծել է, որ ըստ վիճակագրական տվյալների, ինչպես նաև մյուս չափանիշների, Հայաստանի տնտեսությունն արդեն հատել է եկամուտների կրճատման, սպառման սեղմման և ներդրումներին պատրաստ չլինելու ցածրագույն կետը: «ՎՏԲ-Հայաստան Բանկը դա տեսնում է ամեն ամիս, սկսած ապրիլից, մանրածախ վարկերի տրամադրման աճից: Դա բացարձակ հստակ նշան է, որ տնտեսության աճ տեղի կունենա – մարդիկ կդադարեն սեղմել իրենց սպառումը և պատրաստ կլինեն իրենց վրա վերցնել նոր պարտքեր»,-ասել է ռուսաստանցի բանկիրը:

ՎՏԲ24-ի ղեկավարը նշել է, որ նման աշխուժացում զգացվում է նաև Ռուսաստանում, փետրվար ամսից: «Մենք հասկանում ենք, որ գտնվում ենք տնտեսական ընդհանուր տարածությունում, և եթե Ռուսաստանում տեղի ունենա պահանջարկի աշխուժացում, ապա, իհարկե, դա դրականորեն կանդրադառնա թե արտահանման, և թե պահանջարկի վրա, այդ թվում նաև Հայաստանում»,-նշել է նա:

Զադորնովը տեղեկացրել է, որ այսօր նախատեսված է իր հանդիպումը ՀՀ վարչապետ Կարեն Կարապետյանի հետ: Դրական գնահատելով նոր վարչապետի առաջին քայլերը, ՎՏԲ24-ի ղեկավարն ընդգծել է. «Մենք հասկանում էինք, որ Հայաստանի տնտեսական քաղաքականությունում անհրաժեշտ են փոփոխություններ, և նոր կառավարության ձևավորումն ըստ էության նշան է, որ այդ փոփոխությունները տեղի կունենան: Դա հնչեցվեց նաև այն մանդատից, որը հանրապետության նախագահը տվեց նոր վարչապետին: Մենք տեսնում ենք, որ նոր կառավարությունը ձևավորվում է բիզնեսով զբաղվող մարդկանցից: Եվ մենք կարող ենք հույս ունենալ, որ բիզնեսից եկած մարդիկ կառավարության աշխատանքներ կներմուծեն ավելի ճկուն մոտեցումներ, որոնք պատասխանում են ներդրողների, ինչպես նաև նրանց շահերին, ովքեր պատրաստվում են այստեղ կառուցել իրենց բիզնեսը: Մենք հաճախ ենք մեր կառավարությանը քննադատում ներդրումային անբարենպաստ մթնոլորտի համար, և տեսնում ենք, որ ՀՀ վարչապետի խնդիրը բարենպաստ ներդրումային մթնոլորտի ստեղծումն է, այդ թվում նաև նոր կառավարության ձևավորման ճանապարհով»: Զադորնովն ընդգծել է, որ որոշ նոր նախարարներ քաջ հայտնի են ՎՏԲ խմբին, քանի որ նախկինում համագործակցել են ՎՏԲ-Հայաստանի հետ, և նրանց նշանակումը շատ դրական է գնահատվում բանկի կողմից:  Ավելին, ըստ Զադորնովի,այն, որ նոր վարչապետը պաշտոնավարման այսքան կարճ ժամկետում հասցրեց հանդիպել բանկիրների հետ և նրանց հետ քննարկել իրավիճակը, խոսում է բանկային հատվածի հետ շատ կարևոր հակադարձ կապ ստեղծելու նրա ձգտումների մասին:

Բանկիրը նշել է նաև, որ ներկայումս ՎՏԲ Խումբն ավարտում է հաջորդ 3 տարիների ռազմավարության ձևավորումը, այդ թվում նաև ՎՏԲ-Հայաստան Բանկի համար: «Մեզ համար շատ կարևոր է հասկանալ, թե ինչի հետ կարող ենք կապել մեր հույսերը և իմանալ այն առաջնահերթությունները, որը կունենա նոր կառավարությունը, թե որտեղ է թաքնված ՎՏԲ-Հայաստան Բանկի և ՀՀ կառավարության միջև համագործակցությունը և ինչ ոլորտներ կարող են զարգանալ առաջիկա 3 տարիներին»,-ասել է Զադորնովը: Նա ընդգծել է, որ գոհ է բանկի մանրածախ բիզնեսի զարգացումից Հայաստանում, միաժամանակ ընդգծելով դրան նոր իմպուլս տալու անհրաժեշտությունը, «քանի որ դա մեր հիմնական հաղթաձին է շուկայում, և մենք մեր առջև խնդիր կդնենք գրավել շուկայի էական հատվածը` ինչպես վարկավորման, այնպես էլ բնակչությունից միջոցների ներգրավման առումով»:

Սակայն, որպես Հայաստանի բանկային համակարգի զարգացման նոր արգելակ, Զադորնովը նշել է երկրի դատա-կատարողական համակարգի անկատարությունը: Նա ընդգծել է, որ այն կատարելագործման, ավելի շատ անկախության, ինչպես նաև գործերի քննարկման ու որոշումների կայացման ժամկետների կրճատման կարիք ունի:

Ըստ ԱրմԻնֆո գործակալության` Հայաստանի բանկերի Ֆինանսական Վարկանիշի, ՎՏԲ-Հայաստան Բանկն իր հիմնական ցուցանիշներով ավանդաբար գտնվում է Հայաստանի բանկային համակարգի առաջատարների շարքում: 2016 թվականի հուլիսի 1-ի դրությամբ բանկի ընդհանուր կապիտալը կազմում է 41.2 մլրդ դրամ (5-րդ տեղ), ակտիվները` 278.3 մլրդ դրամ (4-րդ տեղ), վարկային ներդրումները`186,4 մլրդ դրամ (5-րդ տեղ), ֆիզիկական անձանց ժամկետային ավանդները` 92 մլրդ դրամ (4-րդ տեղ), իրավաբանական անձանց ցպահանջ պարտավորությունները`39.7 մլրդ դրամ (3-րդ տեղ): Կորպորատիվ վարկավորման գծով բանկն զբաղեցնում է հինգերորդ տեղը`107,4 մլրդ դրամ է, իսկ մանրածախի գծով`3-րդ տեղը - 78.8 մլրդ դրամ: Իր մասնաճյուղերի ցանցով ՎՏԲ-Հայաստան Բանկը հանդիսանում է շուկայի անվիճելի առաջատարը`67 մասնաճյուղ, իր ներկայությունն ապահովելով երկրի բոլոր մարզերում: ՎՏԲ-Հայաստան ՓԲԸ-ն միջազգային ՎՏԲ Ֆինանսական Խմբի մասնակից է դարձել 2004 թվականի ապրիլին: