Փորձագետ. Քաղաքական կայունությունը շատ կարևոր է ներդրողների համար

Արմինֆո. Քաղաքական կայունությունը շատ կարևոր է ներդրողների համար, ԱրմԻնֆո-ի թղթակցի հետ զրույցում ասել է քաղաքագետ Դմիտրի Ռադիշևսկին:

Քաղաքագետի խոսքով, ներդրումների ներհոսքի համար կարևոր է ներդրումների անվտանգության ապահովումը: Ներդրողները մտավախություն ունեն այն առնչությամբ, թե արդյոք Ադրբեջանի հետ հարաբերությունների սրացում կլինի, և այդ մտավախությունները ցրելու համար անհրաժեշտ են քաղաքական գործընթացներ, քանի որ արևմտյան ներդրողները ցանկանում են տեսնել Ղարաբաղի շուրջ քաղաքական գործընթացի շարունակում, այլ ոչ թե՝ հակամարտության սրացումը:  ՙԲոլորն էլ հասկանում են, որ խնդիրը խորը պատմական արմատներ ունի, և այն հնարավոր չէ արագ լուծել: Այնուամենյանիվ, նրանք ցանկանում են տեսնել այն սառեցված վիճակում և որոշակի կայունություն: Դրա համար քաղաքական գործիչները պետք է երկխոսություն վարեն, ինչը կարող է հանգստացնել ներդրողներին՝ ազդակ հաղորդելով նրանց, որ Հայաստան կարելի է գալ, քանի որ վաղը պատերազմ չի սկսվի՚,- հայտարարել է քաղաքագետը:

Դմիտրի Ռադիշևսկին համոզված է, որ Բաքվի շահերից չի բխում հակամարտության սրման մշտական գործընթացը, քանի որ Ադրբեջանի իշխանությունները գիտակցում են, որ դա ազդում է երկրի ներդրումային անվտանգության վրա: Այս առումով, փորձագետի խոսքով, գործընթացը երկկողմանի է, և կարևոր է Ղարաբաղի շուրջ կայունության պահպանման շուրջ քաղաքական գործընթացը:

Ըստ ՀՀ Ազգային վիճակագրական ծառայության տվյալների, ԱՄՆ-ից Հայաստանի տնտեսության իրական հատվածին ուղղված զուտ ներդրումների հոսքը 2016 թվականի հուլիսի 1-ին (I կիսամյակում) կազմել է 564,2 մլն դրամ, ընդ որում, ՕՈՒՆ-ի միայն բացասական ցուցանիշը հասել է 1.2 մլրդ դրամի: Միացյալ Նահանգներից ներդրումները հիմնականում ուղղվել են ՏՏ ոլորտին, ֆինանսական միջնորդությանը, զբոսաշրջությանը և էներգետիկ համալիրին: Իսկ ընդհանուր ներդրումների զուտ ներհոսքը Հայաստանի տնտեսության իրական հատվածում նույն ամսաթվով կազմել է մինուս 16.9 մլրդ դրամ,ընդ որում, միայն ՕՈՒՆ գծով զուտ հոսքը դեպի տնտեսության իրական հատված կազմել է  դրական 16,6 մլրդ դրամ (նախորդ տարվա, համապատասխանաբար`81.9 մլրդ դրամի և 30.7 մլրդ դրամի համեմատ): Նշենք, որ արդեն ավելի քան երկու տարի վիճակագրական տվյալներում, մեթոդաբանության վերանայման հետևանքով, ներդրումների վերաբերյալ տվյալներում չի նշվում ներհոսքի և արտահոսքի բացարձակ արժեքը, այլ միայն բերվում է այդ ցուցանիշների սալդոն: (ՀՀ դրամի հաշվարկային փոխարժեքը 2016 թվականի հուլիսի 1-ին կազմել է 476.68 դրամ / $ 1):