Պաշտոնյաները խոսում են Հայաստանի թեթև արդյունաբերության արտադրանքի արտահանման 60% աճի մասին

Արմինֆո. Հայաստանի թեթև արդյունաբերության արտադրանքի արտահանումն աճել է 60%-ով, այսօր Հայաստանի թեթև արդյունաբերության ոլորտին նվիրված՝ «Թեթև արդյունաբերության միջազգային համաժողով, ցուցահանդես, նորաձևության օրեր» խորագիրը կրող միջոցառմանը հայտնել է ՀՀ տնտեսական զարգացման և ներդրումների նախարարության Արդյունաբերության զարգացման վարչության պետ Արմեն Եգանյանը:

ՙՎերջին ժամանակներս թեթև արդյունաբերության արտադրանքի արտահանման աճի դրական միտումներ են նկատվում, սակայն դա բավարար չէ: Դեռ շատ աշխատանք կա կատարելու ոլորտի առաջխաղացման համար, մասնավորապես՝ անհրաժեշտ է նոր գործիքակազմի ներդնում և զարգացման ավելի ագրեսիվ քաղաքականության իրականացում՚,- նշել է նա: Ընդգծելով նման միջոցառումների անցկացման կարևորությունը՝ Ա. Եգանյանը նշել է, որ թեթև արդյունաբերության ոլորտում կառավարության ռազմավարական ծրագրի շրջանակներում առաջին հերթին կիրականացվեն աշխատանքներ՝ ուղղված արտադրողների մրցունակության, արտադրանքի որակի, կադրերի որակավորման բարձրացմանը և այլն:

ՙՍիգնում՚ ընկերության տնօրեն Նիկա Մանուկովան իր  հերթին, պատասխանելով ԱրմԻնֆո-ի թղթակցի հարցին, նշել է, որ Հայաստանում սուր է դրված ոչ թանկ հումքի մատակարարման խնդիրը: ՙԲոլորը խոսում են, որ մենք օգտագործում ենք միայն թուրքական հումք, սակայն ոչինչ չի ձեռնարկվում մեր արտադրողների համար ոչ այնքան թանկ հումք գտնելու համար, որոնք մրցունակ կդարձնեն վերջիններիս ինչպես ներքին, այնպես էլ արտաքին շուկաներում՚,- ընդգծել է նա՝ ավելացնելով, որ հատուկ ուշադրություն պետք է դարձնել նաև թեթև արդյունաբերության ոլորտում կադրերի պատրաստմանը: Ն. Մանուկովան նշել է, որ այդ ուղղությամբ աշխատանքներ են տարվում ՙԱտեքս՚ նորաձևության կենտրոնի աջակցությամբ ՄԱԿ-ի Արդյունաբերական զարգացման կազմակերպության ծրագրի շրջանակներում, սակայն դրանք համակարգված չեն իրականացվում: ՙՀայաստանում համաժողովն անցկացվում է առաջին անգամ, և մենք հուսով ենք, որ այն Հայաստանի և այլ երկրների արտադրողների միջև գործարար կապերի հաստատման արդյունավետ հարթակ կհանդիսանա՚,- ասել է նա:

ՄԱԿ-ի ներկայացուցիչ, Հայաստանում թեթև արդյունաբերության զարգացման ծրագրի ղեկավար Անահիտ Սիմոնյանը նույնպես ոլորտի առջև ծառացած կարևորագույն խնդիրներից մեկը համարել է կադրերի պատրաստումը: Միաժամանակ նա ուշադրությունը հրավիրել է ոլորտի վերականգնման նկատմամբ արտադրողների վստահության բացակայության վրա: ԱրմԻնֆո-ի թղթակցի հետ զրույցում Ա. Սիմոնյանը նշել է, որ ՄԱԿ-ի հիշյալ ծրագիրը, որն ուղղված է տեքստիլ արտադրության զարգացմանը, Հայաստանում իրականացվում է արդեն 2 տարի, ինչի արդյունքում հաջողվել է ստեղծել 4 հավաքածու՝ ներկայացնելով դրանք միջազգային հարթակում: Ծրագրի ֆինանսավորումը, ինչպես նշել է նա, իրականացվել է ՌԴ կողմից՝ $1 մլն չափով: ՙԾրագրի իրականացման երկրորդ փուլում մտադիր ենք ներառել կոշիկի և աքսեսուարների արտադրողներն՚,- ավելացրել է Սիմոնյանը:

Հիշեցնենք, որ ՙԹեթև արդյունաբերության միջազգային համաժողով, ցուցահանդես, նորաձևության օրեր՚ նախագիծն  առաջին անգամ է անցկացվում Հայաստանում:Նախագծի կազմակերպիչներն են՝ «Ատեքս՚ նորաձևության կենտրոնը, «Սիգնում՚ ընկերությունը և Ուրալի առևտրաարդյունաբերական պալատը:

ՀՀ տնտեսական զարգացման և ներդրումների նախարարության տվյալների համաձայն, Հայաստանի թեթև արդյունաբերության ոլորտը տարվա առաջին 8 ամիսներին ցույց է տվել զգալի աճ`հագուստի արտադրությունն աճել է 32%, կոշիկի և կաշվե իրերի արտադրությունը` 26%: Անկում է արձանագրվել միայն տեքստիլի ոլորտում՝ 6%: Միևնույն ժամանակ այդ ժամանակահատվածում 60% աճել է արտահանման ծավալը, իսկ միայն կոշիկի արտահանումը` 126%: Այնուամենայնիվ, առայժմ արտահանման հիմնական ծավալը գնում է Եվրոպա, ինչը, ըստ անկախ փորձագետների, կապված է տոլինգային սխեմաներով արտադրանքի հետ: Միևնույն ժամանակ, ինչպես նշել են նախարարությունում, դիտվում է թեթև արդյունաբերության արտադրանքի արտահանման վերակողմնորոշում եվրոպական շուկաներից դեպի ռուսաստանյան շուկաներ:

Նշենք, որ խորհրդային շրջանում Հայաստանի տեքստիլ-տրիկոտաժի ֆաբրիկաներում աշխատում էր ավելի քան 120 հազար մարդ: Այսօր նրանց թիվը 20 անգամ նվազել է: Մինչդեռ հայկական շուկայում կոշիկի և տեքստիլ-տրիկոտաժե ապրանքների ներմուծման բաժինն առայժմ գերազանցում է 90%-ը: