Արմինֆո. «Ջրային տնտեսության պետական կոմիտեի հետ մեր հնգամյա համագործակցությունը թույլ է տալիս լավատեսությամբ նայել ապագային և գոհոնակությամբ՝ արդեն արված և ընթացիկ աշխատանքներին՚,- այս մասին ՋՏՊԿ նախագահ Արսեն Հարությունյանի հետ հանդիպման ժամանակ ասել է Ֆրանսիական զարգացման գործակալության կայուն զարգացման բաժնի ներկայացուցիչ Վաչե Փափազյանը:
Ներկայացնելով գործակալության իրականացրած աշխատանքները՝ Վ. Փափազյանը հատկապես շեշտել է Կապսի և Վեդիի ջրամբարների շինարարության հետ կապված նախագծերը. «Հայաստանի կառավարության խնդրանքով մենք ձեռնամուխ եղանք Վեդիի ջրամբարի շինարարության գործին, որը հնարավորություն կտա պահեստավորել շուրջ 200 մլն խմ ջուր և ոռոգելի դարձնել 3200 հա հավելյալ հողատարածք, ինչը գյուղատնտեսության զարգացման գործում զգալի նշանակություն կարող է ունենալ: Հետևելով նորանշանակ նախագահի գործունեությանը, կարող եմ գոհունակությամբ ասել, որ մեր մոտեցումները համընկնում են՝ հատկապես պետական սուբսիդավորման նվազեցման և ոռոգելի հողատարածքների ավելացման վերաբերյալ՚,- ասել է Վ. Փափազյանը:
ՋՏՊԿ նախագահ Արսեն Հարությունյանը նշել է, որ ջրային տնտեսության ոլորտում սպասվող կառուցվածքային փոփոխությունների հիմնական նպատակը կոռուպցիոն ռիսկերի նվազեցումն է, ինչպես նաև՝ ենթակառուցվածքների աշխատանքի արդյունավետության բարձրացումը. «Ուզում եմ նշել, որ որևէ կառուցվածքային փոփոխություն, որ կլինի համակարգում, ինքնանպատակ չի լինի: Մեր բոլոր ջանքերն ուղղված են լինելու աշխատանքի արդյունավետության բարձրացմանը և նոր դաշտ մտնողների աջակցությանը: Մեր առաջնային խնդիրներից մեկը խորհրդային տարիներին ոռոգվող և այսօր անտերության մատնված հողատարածքները կրկին գործածության մեջ դնելն է: Մենք պետք է օգտագործել գյուղոլորտի զարգացման յուրաքանչյուր հնարավորություն՝ գյուղացու բեռը թեթևացնելու և նրա համար դաշտը գրավիչ դարձնելու համար: Գյուղացին պետք է տեսնի, որ հողը կարող է բիզնես դառնալ իր համար՝ ապահովելով ոչ միայն իր ընտանիքի բարեկեցությունը, այլև՝ ողջ երկրի՚ ,- ասել է Ա. Հարությունյանը՝ ավելացնելով, որ հաջորդ կարևորագույն խնդիրը, որն այսօր լուծման կարիք ունի, էներգախնայողությունն է:
Հիշեցնենք, որ նախօրեին վարչապետ Կարեն Կարապետյանի հետ հանդիպման ժամանակ Հայաստանում Ֆրանսիայի արտակարգ և լիազոր դեսպան Ժան-Ֆրանսուա Շարպանտիեին հայտարարել է, որ Զարգացման ֆրանսիական գործակալությունը շարունակելու է ակտիվ ներդրումային գործունեությունը ՀՀ-ում ենթակառուցվածքների բարելավման ուղղությամբ և պատրաստվում է իրականացնել շուրջ 40 մլն դոլարի ծրագրեր: Նա ընդգծել է նաև, որ ֆրանիսական մի շարք ընկերություններ շահագրգռված են Հայաստանում գործունեություն ծավալելու հարցում և այդ ուղղությամբ իրականացվում են համապատասխան աշխատանքներ:
Ինչպես ավելի վաղ հաղորդվել էր, Զարգացման ֆրանսիական գործակալությունը, Վեդու ջրամբարի ֆինանսավորման նպատակով, Հայաստանին կտրամադրի 75 մլն եվրո վարկ՝ 20 տարի մարման ժամկետով, որից 6-ն` արտոնյալ: Հունվարի 27-ին համապատասխան վարկային համաձայնագիր են ստորագրել ՀՀ ֆինանսների նախկին նախարար Գագիկ Խաչատրյանը, Զարգացման ֆրանսիական գործակալության Ասիայի գծով վարչության փոխտնօրեն Ժան-Կլոդ Պիրեսը և Հայաստանում Ֆրանսիայի արտակարգ և լիազոր դեսպան Ժան Ֆրանսուա Շարպենտիեն:
Հավելենք, որ Վեդու ջրամբարի ամբարտակի և օժանդակ կառույցների մանրամասն նախագիծն արդեն պատրաստ է, իսկ շինարարությունն սկսելու համար անհրաժեշտ փաստաթղթերի նախապատրաստման աշխատանքները կավարտվեն 2016 թվականի հոկտեմբերին: Նախատեսվում է կառուցել 85 մ բարձրությամբ և 29 մլն խմ տարողությամբ ամբարտակ, ինչի արդյունքում կհաջողվի իրականացնել 3,2 հազար հա տարածքի ոռոգում: Շինարարական աշխատանքները կտևեն ընդհանուր առմամբ մոտ 4 տարի: