Երկուշաբթի, 24 Հոկտեմբերի 2016 17:41

Արմինֆո. Եվրամիությունը համար մեկ դոնորն է Հայաստանի համար: ՀՀ-ում տարբեր ծրագրերի ֆինանսական աջակցության ավելի քան 50%-ը բաժին է ընկնում ԵՄ-ին: Տարեկան կտրվածքով այդ թիվը կազմում է շուրջ 50 մլն եվրո, և Հայաստանի անկախացումից ի վեր ԵՄ-ն ավելի քան 500 մլն եվրո է ուղղել այդ նպատակով, հոկտեմբերի 24-ին մամուլի ասուլիսի ժամանակ այդ տվյալներն է ներկայացրել է Հայաստանում ԵՄ պատվիրակության ղեկավար Պյոտր Սվիտալսկին՝ ազդարարելով «ԵՄ-ն բիզնեսի համար՚ խորագրով միջոցառումների շարքի մեկնարկը:

 

Դեսպանի խոսքով, ֆինանսական աջակցության հիմնական մասը տրամադրվում է բյուջետային աջակցման տեսքով, ինչը Հայաստանի բարձր վարկանիշի հիանալի ցուցանիշ է՝ երկրի ֆինանսների կառավարման, հաշվետվողականության առումով: Ինչպես նշել է Սվիտալսկին, հնարավոր է, հանրության շրջանում կարծիք կա, թե ԵՄ-ն տրամադրվող միջոցների արդյունավետության առնչությամբ ՙհետադարձ կապ՚ չունի: Մինչդեռ, նրա խոսքով, ԵՄ-ն ծախսվող դրամաշնորհային միջոցների գնահատման կոշտ մեթոդաբանություն ունի:

 

ԵՄ դեսպանը, հիմնվելով սեփական ուսումնասիրությունների վրա, հայտարարել է, որ ԵՄ կողմից, օրինակ, կրթական ոլորտին ուղղված միջոցները հասցեական բնույթ են կրել, և արդյունքն ակնհայտ է: Մյուս կողմից, ինչպես նշել է նա, երիտասարդները, ավարտելով ուսումնական հաստատությունները, առանց աշխատանքի են մնում: Եվ այս առումով, նրա խոսքով, ստացվում է, որ կատարված աշխատանքի վերջնական արդյունքը բավարար անվանել չի կարելի: Ելնելով այս իրողություններից՝ ԵՄ պատվիրակության ղեկավարը ԶԼՄ-ներին կոչ է արել մասնակցել ԵՄ կողմից իրականացվող ծրագրերի արդյունավետության գնահատմանը և հանդես գալ այս առնչությամբ հստակ առաջարկներով:

 

Ինչպես հաղորդվել է, Հայաստանում Եվրոպական միության պատվիրակության ղեկավար, դեսպան Պյոտր Սվիտալսկին և ՀՀ տնտեսական զարգացման և ներդրումների նախարարի առաջին տեղակալ Գարեգին Մելքոնյանը այսօր հայտարարեցին Հայաստանում EU4Business՝ «ԵՄ-ն բիզնեսի համարե խորագրով մեկշաբաթյա միջոցառումների շարքը Երևանում տեղի ունեցող Արևելյան գործընկերության անդամ երկրների Բիզնեսի զարգացմանը նվիրված 8-րդ ժողովի բացման ժամանակ: Հոկտեմբերի 24-ից 28-ը անցկացվելիք EU4Business՝ «ԵՄ-ն բիզնեսի համարե խորագրով միջոցառումները կներկայացնեն ԵՄ աջակցությունը՝ ուղղված փոքր և միջին ձեռնարկատիրություններին (ՓՄՁ-ներին): Տեղի կունենան նաև մի շարք այլ միջոցառումներ` ուղղված մասնավոր-հանրային հատվածների միջև երկխոսության խթանմանը՝ ի շահ Արևելյան գործընկերության երկրներում և Հայաստանում գործող բիզնեսների: Ներկայումս իրականացման գործընթացում է օժանդակության բազմաոլորտ բյուջետային ծրագիրը, որի արժեքը կազմում է 45 մլն.եվրո. արդարադատության ոլորտին կուղղվի 29 մլն եվրո, գյուղի և գյուղական համայանքների զարգացմանը` 25 մլն եվրո, մարդու իրավունքների պաշտպանությանը` 12 մլն եվրո: Լրացուցիչ բանակցություններ են ընթանում նաև որակավորման և նոր աշխատատեղերի ստեղծման նպատակով իրականացվելիք ծրագրի մեկնարկի շուրջ, որի արժեքը կկազմի 15 մլն եվրո, ինչպես նաև բանակցվում է պետական ֆինանսների կառավարման քաղաքականության կատարելագործման`10 մլն եվրո գումարով և քաղաքացիական հասարակության բարեփոխումների գծով 5 մլն եվրո գումարով ծրագրերի շուրջ: