ՔԱԳՎ ներկայացուցիչը հավաստիացնում է. ՙՊոբեդա՚-ի ցածր գները չեն նշանակում թռիչքների անվտանգության ցածր մակարդակ

Արմինֆո. Գյումրի-Մոսկվա չվերթի համար սահմանելով 10 հազար դրամ սակագին՝ ՙՊոբեդա՚ ռուսական լոուքոսթերը հավատարիմ կմնա բյուջետային ավիաընկերության քաղաքականությանը, որը ոչ մի կերպ ուղևորների անվտանգության վրա չի անդրադառնա, այսօր մամուլի ասուլիսի ժամանակ լրագրողներին հայտարարել է Քաղաքացիական ավիացիայի գլխավոր վարչության օդային փոխադրումների կարգավորման վարչության պետ Աննա Չոբանյանը:

Չոբանյանի խոսքով, ավիափոխադրումների հայաստանյան շուկա բյուջետային ավիաընկերություններ ներգրավելու հետ կապված ծրագրերը մեկնարկել են դեռ 2013 թվականի վերջին, երբ Հայաստանը միացավ ՙԲաց երկնքի՚ քաղաքականությանը: Ինչպես խոստովանել է  ՔԱԳՎ ներկայացուցիչը, երկար ժամանակ չէր հաջողվում հաջողության հասնել և միայն հիմա է հնարավորություն առաջացել աշխատել ռուսական ՙՊեբեդա՚-ի հետ, որը հայտարարել է նոյեմբերի վերջից Գյումրիի ՙՇիրակ՚ օդանավակայանից թռիչքներ իրականացնելու պատրաստակամության մասին: ՙՏվյալ պահին հաղորդվում է, որ շաբաթական 3 անգամ թռիչքներ կիրականացվի դեպի Մոսկվա: Սակայն, փաթեթը ենթակա է լրամշակման, քանի որ վերջնական հայտ չկա ավիաընկերությունից: Ակնկալում ենք ինչպես թռիչքների հաճախականության, այնպես էլ ուղղությունների ավելացում՚,- հայտարարել է Չոբանյանը:

999 ռուբլի գինը վերաբերում է յուրաքանչյուր չվերթում մի քանի տոկոս տոմսերին, նշել է Չոբանյանը՝ ընդգծելով, որ դա ֆիքսված գին չէ: Միաժամանակ վերին գնային շեմը, ինչպես նշել է նա, չպետք է չափազանց բարձր լինի, եթե ընկերությունը հանդես է գալիս որպես բյուջետային, և սահմանված սակագները հեռու կլինեն դասական ավիաընկերությունների գներից:  Ելնելով դրանից, ինչպես պարզաբանել է նա, ընկերությունը կտնտեսի սնունդի, ուղեբեռի, սպասարկման մակարդակի, բայց ոչ մի դեպքում անվտանգության մակարդակի հարցում: ՙՉի կարող այնպես լինել, որ որևէ ավիաընկերություն սերտիֆիկատ ստանա՝ առանց ավիաթռիչքների անվտանգության պատշաճ որակի ապահովման՚,- հայտարարել է ՔԱԳՎ ներկայացուցիչը:

Ինչպես ավելի վաղ հաղորդվել էր, Ռոսավիացիան «Պոբեդա՚լոուքոսթերին («Աէրոֆլոտ՚ խմբի անդամ) տրամադրել է Մոսկվայից Գյումրի թռիչքներ իրականացնելու թույլտվություն: Թռիչքներ կիրականացվեն շաբաթական 7 անգամ: Հայաստանի քաղաքացիական ավիացիայի գլխավոր վարչության պաշտոնական հաղորդագրության համաձայն, ռուսական ավիաընկերության հետ պայմանավորվածություն է ձեռք բերվել նոյեմբերի վերջից շաբաթական 3 անգամ Գյումրու «Շիրակ՚ օդանավակայանից դեպի Մոսկվայի «Վնուկովոե օդանավակայան, ինչպես նաև, հետադարձ ուղղությամբ թռիչքներ իրականացնել:

Ավիաընկերության ավիատոմսերի սակագները լինելու են սկսած 10.000 դրամից:

Սեպտեմբերի 20-ին, ելույթ ունենալով ՀՀ խորհրդարանում, վարչապետ Կարեն Կարապետյանը հայտարարեց Գյումրիի օդանավակայանը գործարկելու ծրագրերի մասին: Նրա խոսքով, այդ նպատակով գործադիրը բանակցում է մի շարք լոուքոսթերների հետ: