Ուրբաթ, 4 Նոյեմբերի 2016 12:46

Արմինֆո. ՀՀ հանրային ծառայությունները կարգավորող հանձնաժողովը, հաշվի առնելով 2017թ. փետրվարի 1-ից մինչև 2018թ. փետրվարի 1-ն ընկած ժամանակահատվածի համար կանխատեսվող էլեկտրական էներգիայի (հզորության) արտադրության, ներկրման և արտահանման հաշվեկշիռը, «Գազպրոմ Արմենիաե ՓԲԸ-ի ներկայացրած հայտի արդյունքում՝ ջերմային կայաններին վաճառվող բնական գազի սակագնի հնարավոր փոփոխությունը, էլեկտրաէներգետիկական համակարգում գործող ընկերությունների ֆինանսատնտեսական գործունեության վրա ազդող այլ գործոնների փոփոխությունները և, հիմք ընդունելով «Էներգետիկայի մասինե ՀՀ օրենքի 22-րդ հոդվածի 5-րդ և 6-րդ մասերը, իր նախաձեռնությամբ սկսում է էլեկտրաէներգետիկական համակարգի ընկերությունների կողմից էլեկտրական էներգիայի արտադրության և ծառայությունների մատուցման, ինչպես նաև վերջնական սպառողներին վաճառվող էլեկտրաէներգիայի սակագների վերանայման գործընթաց:

Ավելի վաղ ԱրմԻնֆո-ն հայտնել էր, որ Կարգավորող մարմինը մտադիր է սեփական նախաձեռնությամբ էլեկտրաէներգիայի սակագնի վերանայման գործընթաց նախաձեռնել: Ինչպես և գազի դեպքում, ՀԾԿՀ-ն խոստանում է արտոնյալ պայմաններ սահմանել սոցիալապես անապահով խավերի համար:

 

ՀԾԿՀ Սակագնային քաղաքականության վարչության պետ Գարեգին Բաղրամյանի խոսքով, սակագնի հերթական նվազումը պակաս շոշափելի կլինի սպառողների համար, քան անցած վերանայման արդյունքում էր: ԱրմԻնֆո-ի ճշգրտող հարցին, թե հնարավոր է արդյոք խոսել սակագնի իջեցման մասին առնվազն վերջին վերանայման սահմաններում՝ 2,58 դրամ կամ 5,9%՝ Հանձնաժողովի ներկայացուցիչը հայտարարել է, որ չի կարծում, թե դրա համար բավարար ռեսուրս կա: ՙՀնարավոր է, արտոնությունից օգտվողների համար սակագնի ավելի մեծ իջեցման մասին որոշում կայացվի, բայց չեմ կարծում, թե մնացածների համար նման նվազում հնարավոր է՚,- նշել է Բաղրամյանը՝ ավելացնելով, որ սակագնի նվազման ավելի զգալի մասշտաբների մասին խոսել չենք կարող: Ինչպես հայտարարել են ՀԾԿՀ-ում, ինչպես և նախորդ անգամ, կան գործոններ, որոնց առջև պաշտոնյաններն անզոր են: Չնայած այն բանին, որ հաջորդ տարի ԱԷԿ-ի աշխատանքը կդադարեցվի ավելի կարճ ժամանակահատվածով, նախնական հաշվարկներով՝ 2-3 ամիս, հերթական անգամ ԱԷԿ արտադրած էժան էլեկտրաէներգիան ավելի թանկով փոխարինելու անհրաժեշտութուն կառաջանա: Պետք չէ մոռանալ նաև, որ սակագնում ներառված են նաև ժամանակացույցի համաձայն վարկերի սպասարկման և մարման առնչությամբ հաշվարկները /ՀԲ $30 մլն վարկ/, որոնք ներգրավվել են, մասնավորապես, էներգահամակարգի արդիականացման համար, հիշեցրել են ՀԾԿՀ-ում: 

Նշենք, որ 2016 թ. հունիսի 24-ին ՀՀ հանրային ծառայությունները կարգավորող հանձնաժողովը որոշել է սպառողներին վաճառվող էլեկտրական էներգիայի սակագները նվազեցնել 2.58 դրամով: Ըստ ՀԾԿՀ որոշման, 2016 թվականի օգոստոսի 1-ից 1 կվտ/ժ դիմաց ցերեկային սակագինը կլինի 46,20 դրամ` ներկայիս 48,78 դրամի փոխարեն, իսկ գիշերային սակագինը`36,20 դրամ` ներկայիս 38,78 դրամի փոխարեն: Այսօր Հանրային ծառայությունները կարգավորող հանձնաժողով է ստացվել գազի նոր սակագնի վերաբերյալ «Գազպրոմ Արմենիա» ՓԲԸ հայտը: Այնուամենայնիվ, Հայաստանում գազի և էլեկտրաէներգիայի սակագները շարունակում են ամենաբարձրը մնալ տարածաշրջանում: