ՍՊԱՍՎԱԾ ԱԿՏԻՎՈՒԹՅՈՒՆ ՎԱՆԱՁՈՐԻ ՏԵԽՆՈԼՈԳԻԱԿԱՆ ԿԵՆՏՐՈՆՈՒՄ (VTC)․ «ՌՈՍՏԵԼԵԿՈՄԻ» ՀՈՎԱՆԱՎՈՐՈՒԹՅԱՄԲ ԱՆՑԿԱՑՎԵՑ «ԲԱՐՔԵՄՓ»  ՉԿՈՆՖԵՐԱՆՍԸ

Արմինֆո. «Ռոստելեկոմի» աջակցությամբ նոյեմբերի 6-ին «Վանաձորի տեխնոլոգիական կենտրոնում» (VTC) անցկացվեց «Բարքեմփ» ոչ ֆորմալ Կոնֆերանսը (Չկոնֆերանսը)՝ նվիրված Տեղեկատվական տեխնոլոգիաներին, Համացանցին և Նոր մեդիաներին առնչվող թեմաների։

«Նոր տեխնոլոգիաներն արդեն իսկ ներխուժել են առօրյա և մեզանից  յուրաքանչյուրն իր մասնակցությունը կարող է ունենալ դրանց զարգացման գործում՝ ներկայանալով ու իր գաղափարները կիսելով նման կոնֆերանսների և չկոնֆերանսների շրջանակներում։ «Ռոստելեկոմի» տեխնոլոգիաները նորագույններից են, որովհետև մենք կարևորում ենք յուրաքանչյուր նոր լուծում, նոր տեխնոլոգիա և նոր գաղափար։ Այստեղ՝ Վանաձորի տեխնոլոգիական կենտրոնում, այդ ամենն իրագործելու համար անհրաժեշտ է միայն ցանկություն և ձգտում։ Սա արդեն իսկ իրողություն է և  VTC-ն իր գործիքակազմով հնարավորություններ են ստեղծվում բազմաթիվ տեխնոլոգիական գաղափարների և լուծումների զարգացման համար։ Համոզված եմ՝ այսօր մեզ բոլորիս սպասվում է արդյունավետ և հետաքիր օր «Բարքեմփի» շրջանակներում։ Ես անգամ մի քանի քննարկումներ առանձնացրել եմ ինձ համար և կմասնակցեմ»,-կոնֆերանսի պաշտոնական բացմանը մասնակիցներին ողջունեց «Ռոստելեկոմի» գլխավոր տնօրեն Հայկ Ֆարամազյանը։

«Բարքեմփի» շրջանակներում ներկայացվեցին «մասնակցային» աշխատանքային սեմինար-միջոցառումներ, որոնք բաց էին յուրաքանչյուրի համար և ֆորմատին համաձայն չկար հանդիսատես և բոլորը մասնակից էին։

Վանաձորում ծրագրի անցկացման նպատակն էր նպաստել քաղաքային էլեկտրոնային հասարակության ձևավորմանն ու զարգացմանը, ինչպես նաև երիտասարդների ներգրավվածությանը տեխնոլոգիաների զարգացման գործում։ Կարևոր էր ստեղծել համապատասխան միջավայր և հնարավորություններ հանրության ակտիվ շերտերի և մասնագիտական խմբերի տեղեկատվական գիտելիքների բարձրացման ու հմտությունների զարգացման համար՝ միևնույն ժամանակ նպաստելով տեղեկատվական և մեդիա ոլորտներում գործող անհատների և ընկերությունների միջև փոխգործակցությանը։

Առավել ուշագրավ էր կազմակերպչական աշխատանքը, որում ներգրավված էին ինչպես գործընկերներ «Ձեռնարկությունների ինկուբատոր հիմնադրամը» (EIF) և «Վանաձորի տեխնոլոգիական կենտրոնը» (VTC), հովանավոր հայաստանյան «Ռոստելեկոմը», այնպես էլ աջակիցները՝ «Բարքեմփ Երևանի» և «Բարքեմփ Գյումրու» թիմերը:

Կազմակերպիչների թիրախում էին Նոր մեդիայում, Ինտերնետ, Տեղեկատվական և Բարձր տեխնոլոգիաներում ներգրավված գործարարներ, ընկերությունների ղեկավարներ և մասնագետներ, ծրագրավորողներ, դիզայներներ, դասախոսներ, ուսանողներ, բլոգերներ, լրագրողներ, առցանց հրատարակիչներ, ցանցի ակտիվ դեմքեր ու պարզապես հետաքրքրասեր մարդիկ, այսինքն՝ բոլոր նրանք, ովքեր ստեղծում են նոր սերնդի համաշխարհային սարդոստայնը։

Ի՞նչ է Բարքեմփը (անգլ. BarCamp).

ԲարՔեմփ են անվանում Տեղեկատվական տեխնոլոգիաների, Ինտերնետի և Նոր մեդիաների թեմաներով չկոնֆերանսները։ Այն 2005թ.-ից մասնակիցների կողմից կազմակերպվող ոչ-ֆորմալ կոնֆերանսների միջազգային ցանց է (ոչ ֆորմալ և կոնֆերանս բառերի միաձուլումից (անգլերեն unConference=unformal+conference)):

Այդ կոնֆերանսներն իրենցից ներկայացնում են «մասնակցային» աշխատանքային սեմինար-միջոցառումներ, որոնք բաց են բոլոր ցանկացողների համար ու ողջ փիլիսոփայությունը նրանում է, որ կարող են ընդհանրապես չլինել հատուկ հրավիրված բանախոսներ:

ԲարՔեմփը ամենամասնակցային ֆորմատի միջոցառումներից է. մասնակիցներն են նախաձեռնում, կազմակերպում ու անցկացնում միջոցառումը, մասնակիցներն իրենք են բերում ներկայացվելիք թեմաներն ու նյութերը, իրենք են զեկուցումներն անում ու քննարկում դրանք։ Ելույթները կատարվում են բաց ու անկաշկանդ միջավայրում։ Հիմնական կարգախոսներից մեկն էլ այն է, որ չկան հանդիսատեսներ, բոլորը մասնակից են:

Մթնոլորտը հետաքրքիր է այնքանով, որ ԲարՔեմփի մասնակիցները հետևում են ելույթներին և միաժամանակ լուսաբանում ու մեկնաբանում են միջոցառումը համացանցում: Մասնակիցները նաև «քվեարկում են ոտքերով»: Այսինքն, եթե թեման հետաքրքրական չէ, նրանք ազատ կարող են լքել այդ լսարանն ու տեղափոխվել այլ սրահ՝ լսելու զուգահեռ ընթացող մեկ այլ ելույթ:

Բավական ժամանակ է աշխարհում իրականացվում են նաև այս ֆորմատին համապատասխան այլ թեմատիկ ուղղությամբ քեմփեր, ինչպես օրինակ՝ առողջապահության, իրավունքի, կրթության, տրանսպորտի, սոցիալական հարցերի և այլնի շուրջ:

Հայաստանում առաջին Բարքեմփ անցկացվել է 2009թ.-ին Երևանում: Այս տարի տեղի ունեցավ թվով 8-րդը: Եթե 2009-ին մասնակիցները 400-ն էին, ապա 2016-ին նրանց թիվն անցավ 2500-ից (կայքը՝ http://www.barcamp.am/):

Անցկացման կարգը

Հակառակ ավանդական կոնֆերանսների՝ այստեղ մեծ օրակարգը ձևավորվում է մասնակիցների կողմից և վերջնական տեսք է ստանում միայն միջոցառման բացումից րոպեներ առաջ: Մասնակիցները ցուցատախտակի վրա՝ ըստ ժամերի դասավորում են իրենց զեկուցումների թեմաները։

***

«ՌՈՍՏԵԼԵԿՈՄ», «ՋԻԷՆՍԻ-ԱԼՖԱ» ՓԲԸ (www.rtarmenia.am)

2012թ. դեկտեմբերից ՀՀ-ում հեռահաղորդակցության ոլորտի առաջատար օպերատորներից մեկը՝ՋԻԷՆՍԻ-ԱԼՖԱ ՓԲԸ-ն հաջողությամբ մատուցում է ինտերնետ հասանելիության և ֆիքսված հեռախոսակապի ծառայություններ Rostelecom ապրանքանիշի ներքո:

2013թ. սեպտեմբեր ամսից ընկերությունը «ՀԻԲՐԻԴ ՍՈԼՅՈՒՇՆԶ» ընկերության հետ համատեղ մատուցում է նոր սերնդի Այփի հեռուստատեսության ծառայությունը ևս։ 2015թ․ սեպտեմբերին ընկերությունը ներկայացրել է լիովին նոր Սմարթ հեռուստատեսությունը, որն առանձնանում է իր նորարարական լուծումներով և հնարավորություններով։

«Ռոստելեկոմի» ցանցը Հայաստանում կառուցված  է օպտիկա-մանրաթելային մալուխով, որի երկարությունը կազմում է ավելի քան 3000 կմ` ծածկելով ՀՀ տարածքի 80%-ը:

Իրանի և Վրաստանի օպերատորների միջոցով «Ռոստելեկոմի» ցանցը փոխկապակցված  է տարածաշրջանի հիմնական մայրուղային ցանցերի և տրաֆիկի փոխանակման խոշորագույն կենտրոնների հետ:

Ընկերության կորպորատիվ հաճախորդների ցանկում են խոշորագույն ձեռնարկություններ ու բանկեր, ՀՀ կառավարությունը և պետական մարմիններ, հեռահաղորդակցության ընկերություններ և միջազգային կազմակերպություններ:

Գերժամանակակից տեխնոլոգիաների կիրառումը ընկերությանը հնարավորություն է տալիս լիովին բավարարել ժամանակակից բաժանորդի կարիքները՝ տարածվելով և ծառայությունների հասանելիությունն ապահովելով ՀՀ ողջ տարածքով:

2014թ.-ից ընկերությունը բնակչությանը ծառայություններ է մատուցում Երևան քաղաքի Կենտրոն, Էրեբունի, Նուբարաշեն, Աջափնյակ, Դավիթաշեն, Մալաթիա-Սեբաստիա, Նոր Նորք և Ավան, Արաբկիր վարչական շրջաններում և Աբովյան, Չարենցավան, Հրազդան, Վանաձոր, Գյումրի, Աշտարակ, Մեծամոր, Արմավիր, Մասիս, Արտաշատ, Արարատ, Սևան, Դիլիջան, Իջևան, Կապան, Մարտունի, Ալավերդի և Քաջարան քաղաքներում: Նշված բոլոր քաղաքներում գործում են վաճառքի և սպասարկման սրահներ:

***

«Ռոստելեկոմ» ԲԲԸ-ն (www.rostelecom.ru)  Ռուսաստանի և Եվրոպայի հեռահաղորդակցության ոլորտի խոշորագույն և դինամիկ զարգացող ընկերությունների խումբ է, որը ծառայություններ է մատուցում ոլորտի բոլոր սեգմենտներում Ռուսաստանի ողջ տարածքով:

Ընկերությունը առաջատար դիրք է գրավում ինտերնետի հասանելիության և վճարովի հեռուստատեսության ծառայությունների ռուսաստանյան շուկայում. Ինտերնետ հասանելիության ծառայությունից օգտվողների թիվը գերազանցում է 10.9 մլն-ը, իսկ վճարովի հեռուստատեսությանը՝ 7.7 մլն-ը:

«Ռոստելեկոմ» ԲԲԸ-ն առաջատարն է ռուսաստանյան պետական կառույցների  և բոլոր մակարդակների կորպորատիվ հաճախորդներին մատուցվող հեռահաղորդակցության ծառայությունների շուկայում:

Ընկերությունը առաջատար դիրքեր ունի նաև Էլեկտրոնային կառավարության համար ինովացիոն լուծումների, ամպային տեխնոլոգիաների կիրառման, առողջապահության, կրթության, անվտանգության, կենցաղ-կոմունալ ծառայությունների ոլորտներում: Ընկերության կայուն ֆինանսական վիճակը հաստատվում է վարկանիշային աղյուսակներում գրաված դիրքերով՝  Fitch Ratings գործակալությունն այն գնահատում է վարկանիշային աղյուսակի "BBB-" մակարդակում, իսկ Standard&Poor’s գնահատմամբ այն "BB+" է: