Նախարար. Հանքարդյունաբերությունը Հայաստանի տնտեսության կարևոր հենասյուներից է և արտահանման կառուցվածքում ամենամեծ տեսակարար կշիռ ունեցող հատվածը

Արմինֆո. Հանքարդյունաբերությունը Հայաստանի տնտեսության կարևոր հենասյուներից է և արտահանման կառուցվածքում ամենամեծ տեսակարար կշիռ ունեցող հատվածը; Այդ մասին նոյեմբերի 16-ին Երևանում կենսունակ հանքարդյունաբերության խնդիրներին նվիրված գործարար համաժողովի ժամանակ հայտարարել է ՀՀ տնտեսական զարգացման և ներդրումների նախարար Սուրեն Կարայանը:

Ինչպես նշել է Կարայանը, այն էական դեր է խաղում Հայաստանի ողջ տնտեսության զարգացման գործում: «Հայաստանի Հանրապետության կառավարությունը մեծ նշանակություն է տալիս ներդրումային միջավայրի գրավչության բարձրացմանը: Այդ նպատակով կիրառվում է «բաց դռների» քաղաքականություն` բացառելով որևէ սահմանափակում ներդրումային գործունեության նկատմամբ: Իրականացվում են գործարար և ներդրումային միջավայրի շարունակական բարեփոխումներ: Մշակվել և գործողության մեջ են դրվել զարգացման մի շարք ոլորտային քաղաքականություններ` ուղղված հատկապես արդյունաբերության, տեղեկատվական տեխնոլոգիաների զարգացմանը, արտահանման դիվերսիֆիկացմանը, արտաքին շուկաների ընդլայնման», - նշել է ՀՀ տնտեսական զարգացման և ներդրումների նախարարը:

Նշենք, որ 2016 թ. հունվար-սեպտեմբերին, 2015-ի նույն ժամանակահատվածի համեմատ, հանքարդյունաբերության և բաց հանքավայրերի շահագործման ոլորտում արձանագրվել է 13.7% աճ (նախորդ տարվա աճը`40.5%)՝ մինչև 188.4 մլրդ դրամ: 2015 թ. հունվար-դեկտեմբերին լեռնահանքային ճյուղի ծավալը կազմել է 221,2 մլրդ դրամ՝ 50,4% տարեկան աճով:

ՕՈւՆ զուտ հոսքը լեռնահանքային ճյուղ 2016 թ. առաջին կիսամյակում կազմել է 15545 մլրդ դրամ՝  2015 թ. նույն ժամանակաշրջանի մինուսային 6909 մլրդ դրամի փոխարեն: