Արմինֆո. ՀՀ գյուղփոխնախարար Ռոբերտ Մակարյանը նոյեմբերի 18-ին ընդունել է կաթնամթերքի արտադրության ոլորտի ընկերութոյւններին: Ինչպես հաղորդում է գերատեսչության մամուլի ծառայությունը, հանդիպման պատճառն «Աշտարակ կաթ» ընկերության գործունեության դադարեցումն է, ինչպես նաև դրա հետևանքով առաջացած պրոբլեմները:
«Ինչպես գիտեք, «Աշտարակ կաթ» ընկերությունը, որն զբաղեցնում է Հայաստանի կաթի շուկայի զգալի մասը, այսօր հայտարարել է ծանր ֆինանսական վիճակի մասին, և ֆերմերների նկատմամբ ունի պարտքեր: Անհրաժեշտ է քայլեր ձեռնարկել, որպեսզի մթերմումները չդադարեն, իսկ ֆերմերներն ստեղծված իրավիճակից չտուժեն»,-նշել է փոխնախարարը:
Նա հավելել է, որ պրոբլեմն արագ լուծման կարիք ունի, քանի որ այն չկարգավորելու դեպքում հաջորդ տարվա գարնանը և ամռան ամիսներին կաթի արտադրության ծավալների աճի կապակցությամբ կարող են առաջանալ մթերումների հետ կապված լուրջ պրոբլեմներ: Փոխնախարարը կոչ է արել լրացուցիչ կաթ մթերելիս թույլ չտալ գների իջեցում:
Հանդիպման մասնակիցները տեղեկացրել են, որ իրենց ընկերութոյւնները պատրաստ են կտարել լրացուցիչ մթերումներ, իսկ ավելցուկի առաջացման դեպքում կազմակերպել փոշի կաթի և պանրի արտադրություն: Նրանք ընդգծել են պետական վերահսկողության ուժեղացման կարևորությունը ներմուծվող ապրանքների վրա, ինչն էական աջակցություն է ցուցաբերում հայրենական արտադրողներին, միաժամանակ բարձրացնելով նրանց մրցունակային հնարավորությունները: Ի պատասխան փոխնախարարը հավաստել է, որ կառավարությունն անհրաժեշտ քայլեր է ձեռնարկում ոչ միայն կաթի, այլ նաև գյուղատնտեսության ոլորտի մյուս արտադրությունների նկատմամբ, խնդիր դնելով ներմուծվող ապրանքները փոխարինել հայրենականով:
Հիշեցնենք, որ նախօրեին ՀՀ խորհրդարանի պատգամավոր Միքայել Մելքումյանը քննադատեց գործադիրի սպասողական դիրքորոշումն «Աշտարակ կաթ» ընկերության հարցում: Նրա խոսքով, ընկերությունը զբաղեցնում է հանրապետության կաթնամթերքի շուկայի 40%-ը, որի գործոնեության դադարեցումը կբերի նրան, որ շուկայում կմնան 2 խոշոր խաղացողներ, որոնց ընդհանուր մասնաբաժինը շուկայում կհասնի 80%-ի: Նա նշել էր նաև, որ ընկերության մոտ 600 աշխատողների հայտնվել են գործազրկության եզրին, չխոսելով 4-5 հազար ֆերմերների մասին, որոնցից ընկերությունը գնում է կաթը:
Իսկ ՀՀ տնտեսական զարգացման և ներդրումների նախարար Սուրեն Կարայանը նշել է, որ իր կողմից ղեկավարվող գերատեսչությունը հետևում է իրավիճակին, կապված «Աշտարակ կաթ» ընկերության կալանքի տակ վերցված հաշիվների հետ: «Մենք հանդիպումներ ենք ունեցել ինչպես ընկերության ներկայացուցիչների, այնպես էլ կրեդիտորների հետ: Նախարարությունը վերլուծում է ստեղծված իրավիճակը: Բայց քանի որ ներկայումս ընկերությունը հանդիսանում է գործող սուբյեկտ, ես չէի ցանկանա անել հայտարարություններ, որոնք կարող են վնասել նրան»,-ասել է Կարայանը: «Ուզում եմ հավաստել, որ պետության իրավասւոյթունների շրջանում կձեռնարկվեն բոլոր անհրաժեշտ գործողությունները»,-ասել է Կարայանը:
Նշենք, որ ըստ Արմինֆո-ի տվյալների, «Աշտարակ կաթ» ընկերությունը մատակարարների հանդեպ ունի միլիոնավոր դրամի պարտքեր և արդեն մի քանի օր պարապուրդի մեջ է: Շատ աշխատակիցներ արդեն հեռացել ենաշխատանքից, չստանալով վերջին ամիսների աշխատավարձերը: Շրջանառվում են լուրեր, որ շուտով ընկերությունը կարող է պաշտոնապես հայտարարել է սնանկության մասին: