Գերմանական կողմը պատրաստակամություն է հայտնել դրամաշնորհային միջոցներ տրամադրել Հայաստանում գյուղատնտեսության ապահովագրության ներդրման համար

Արմինֆո. Տարածաշրջանում Հայաստանի վարկանիշի բարձրացման համար առավել կենսական են արդյունավետ կառավարման սկզբունքների ներդրումը, կոռուպցիայի դեմ համակարգված պայքարը, իշխանության միասնականությունը, ինչպես նաև արդարության սկզբունքների պահպանումը: Այդ մասին ՀՀ ֆինանսների նախարարությունում Ֆինանսական և տեխնիկական համագործակցության հայ-գերմանական հանձնաժողովի հերթական նիստի շրջանակներում հայտարարել է Հայաստանի Հանրապետությունում Գերմանիայի Դաշնության արտակարգ և լիազոր դեսպան Մաթիաս Քիսլերը:

Ինչպես ԱրմԻնֆո-ին հայտնել են ՀՀ ֆինանսների նախարարության մամուլի ծառայությունում, նիստի ընթացքում քննարկվել են Գերմանիայի Դաշնային Հանրապետության կողմից Հայաստանի Հանրապետությանը տրամադրվող վարկային և դրամաշնորհային միջոցների հաշվին իրականացվելիք ծրագրերը, մասնավորապես՝ Վերականգնման վարկերի բանկի (KfW) կողմից ֆինանսավորվելիք հետագա հատկացումները, որոնք ներառում են ՀՀ Կենտրոնական բանկի գերմանահայկական հիմնադրամի կողմից վերաֆինանսավորվող գյուղատնտեսության ոլորտի աջակցության և փոքր ու միջին ձեռնարկություններում էներգաարդյունավետության ծրագրերի շարունակական փուլերը, Վանաձորի կոշտ թափոնների կառավարման ծրագիրը և այլն:

ՀՀ ֆինանսների նախարարի տեղակալ Արմեն Հայրապետյանը, ողջունելով ներկաներին, նշել է, որ հայ-գերմանական միջկառավարական համագործակցությունը ունի երկարամյա, արդյունավետ պատմություն, որը լավ հիմք է հետագա փոխհամագործակցության ընդլայնման և զարգացման համար:

Հայաստանի Հանրապետությունում Գերմանիայի Դաշնության արտակարգ և լիազոր դեսպան Մաթիաս Քիսլերը ընդգծել է բանակցությունների ձևաչափի դրական ուղղվածությունը՝ հիշեցնելով, որ Գերմանիայի Դաշնությունը Հայաստանի Հանրապետության ամենախոշոր ֆինանսական դոնորներից մեկն է, որը կարևորում է տարածաշրջանի կայունությունն ու տնտեսական աճը:

Դեսպանի խոսքով՝ տարածաշրջանում Հայաստանի վարկանիշի բարձրացման համար առավել կենսական են արդյունավետ կառավարման սկզբունքների ներդրումը, կոռուպցիայի դեմ համակարգված պայքարը, իշխանության միասնականությունը, ինչպես նաև արդարության սկզբունքների պահպանումը:

Նիստի ընթացքում քննարկվել են Հայաստանում առաջին անգամ գյուղատնտեսության ապահովագրության ներդրման համակարգի հարցը, որի շրջանակներում գերմանական կողմը պատրաստակամություն է հայտնել դրամաշնորհային միջոցներ տրամադրել:

Օրակարգային էին նաև տարածաշրջանային դրամաշնորհային միջոցներով այլ ծրագրերի ֆինանսավորման հարցեր, ինչպիսիք են` «Կովկասի բնության հիմնադրամին աջակցությանե, «Հարավային Կովկասում կենսաբազմազանության համալիր կառավարմանե, «Հարավային Կովկասում տեղական ինքնակառավարմանե ծրագրերը և այլ կարևոր նախագծեր:

Հիշեցնենք, որ սեպտեմբերի վերջին գյուղատնտեսության նախարար Իգնատի Առաքելյանը հաղորդել էր, որ Հայաստանի համայնքներից մեկում նախատեսվում է իրականացնել գյուղատնտեսական ապահովագրության պիլոտային ծրագիր: «Եթե այն իրեն արդարացնի, ապա կգտնվեն ֆերմերների բոլոր խնդիրների լուծումները՝ կապված հակակարկտային կայանների աշխատանքի, վնասատուների և այլնի հետ»,-հայտարարել էր նախարարը՝ հավելելով, որ ապահովագրությունը կարող է փրկօղակ հանդիսանոլ ֆերմերների համար: Միաժամանակ նախարարը դժվարացել է ծրագրի ներդրման ժամկետներ նշել՝ ասելով, որ տվյալ փուլում հարցը քննարկվում է միջազգային կազմակերպությունների հետ՝ այդ նպատակների համար միջոցներ ներգրավելու նպատակով:

Հիշեցնենք, որ դեռ 2011 թվականի մարտին նախկին վարչապետ Տիգրան Սարգսյանը հայտարարել էր, որ Հայաստանում գյուղատնտեսական ապահովագրության ներդրումը նպատակահարմար չէ, քանի որ Հայաստանի ագրոարդյունաբերական հատվածը հիմնականում կազմված է ոչ մեծ գյուղացիական ֆերմաներից, իսկ ֆերմերները չեն վճարի ապահովագրական վճարներ: Այնուամենայնիվ, Հայաստանում և Վրաստանում ագրոապահովագրության հայեցակարգի մշակման նպատակով KfW-ն հատկացրեց 400 հազար եվրո: 2014 թվականի վերջին գյուղնախարար Սերգո Կարապետյանը հայտարարեց, որ 2015 թվականին նախարարությունը, «Ինգո-Արմենիաե ապահովագրական ընկերության հետ համատեղ, նախատեսում է Վայոց Ձորում իրականացնել խոշոր եղջերավոր անասունների ապահովագրության պիլոտային նախագիծ, քանի որ այդ մարզում ավարտվել է խոշոր եղջերավոր անասունների գույքագրումը: Սակայն, 2015 թվականի նոյեմբերին «Ինգո-Արմենիաե ապահովագրական ընկերության գործադիր տնօրեն, ներկայիս առողջապահության նախարար Լևոն Ալթունյանն ԱրմԻնֆո-ին հայտարարեց, որ ծրագիրը դադարեցվել է: Նրա խոսքով, ընկերությունն այդ թեմային կվերադառնա, երբ «այդ ոլորտում ի հայտ կգա կոմերցիա և տնտեսապես հիմավորված գործունեություն: Հակառակ պարագայում, դա գործունեություն է, որով պետք է զբաղվեն գիտահետազոտական ինստիտուտները»: