Տրվել է ՀՀ կենտրոնական բանկի նախնական հավանությունը Արդշինբանկ ՓԲԸ և Առէկսիմբանկ-Գազպրոմբանկի խումբ ՓԲԸ-ի միացման պայմանագրի կնքմանը

Արմինֆո. Առէկսիմբանկ-Գազպրոմբանկի Խմբի հետ միացման արդյունքում Արդշինբանկը կդառնա Հայաստանում ամենախոշոր բանկը՝ բանկային կապիտալի, ակտիվների և մասնաճյուղային ցանցի առումով։ «Արդշինբանկ» ՓԲԸ-ի ընդհանուր կապիտալը կկազմի մոտ 74 միլիարդ ՀՀ դրամ, ակտիվները կհասնեն մոտ 540 միլիարդ ՀՀ դրամի, իսկ վաճառքի ցանցը բաղկացած կլինի թվով 72 ունիվերսալ մասնաճյուղերից:

Սույն թվականի նոյեմբերի 22-ի որոշմամբ տրվել է ՀՀ կենտրոնական բանկի նախնական հավանությունը Արդշինբանկ ՓԲԸ և Առէկսիմբանկ-Գազպրոմբանկի խումբ ՓԲԸ-ի միացման պայմանագրի կնքմանը: Նշված գործարքի կնքումից հետո «Առէքսիմբանկ-Գազպրոմբանկ Խումբ» ՓԲԸ-ն կմիանա «Արդշինբանկ» ՓԲԸ-ին, որի արդյունքում «Առէքսիմբանկ-Գազպրոմբանկ Խումբ» ՓԲԸ-ի որպես առանձին իրավաբանական անձի գործունեությունը կդադարի և նրա բոլոր իրավունքներն ու պարտականությունները կանցնեն պահպանվող իրավահաջորդ բանկին՝ «Արդշինբանկ» ՓԲԸ-ին: Միացյալ բանկը շուկայում հանդես կգա Արդշինբանկ բրենդի ներքո:

Այս փուլում Արդշինբանկի և Առեքսիմբանկի բոլոր մասնաճյուղերի գործունեության վայրերը և հաղորդակցման միջոցները անփոփոխ են և տեղադրված են համապատասխանաբար ardshinbank.am և areximbank.am ինտերնետային կայքերում:

Արդշինբանկի և Առեքսիմբանկի հաճախորդները սպասարկվում են բնականոն կերպով` կնքված պայմանագրերի շրջանակներում, որոնք կարող են լուծվել` պահպանելով պայմանագրերով նախատեսված կարգը և ժամկետները:

Բանկերի միացումը թույլ կտա միավորել ժամանակակից տեխնոլոգիաները, ծառայությունները և բարձրորակ մասնագետների ջանքերը և զգալիորեն կընդլայնի «Արդշինբանկ» ՓԲԸ-ի հնարավորությունները՝ իր հաճախորդներին առավել լայն տեսականիով որակյալ բանկային ծառայություններ մատուցելու առումով՝ ինչպես կորպորատիվ, այնպես էլ մանրածախ բիզնեսի ոլորտում։

Հիշեցնենք, որ «Ռեգիոն» Ֆինանսական Արդյունաբերական կորպորացիան, որը պատկանում է ռուսաստանցի գործարար Կարեն Սաֆարյանին, ով հանդիսանում է նաև Արդշինբանկի վերջնական շահառուն, 2016 թվականի հոկտեմբերի 7-ին ձեռք է բերել Առէկսիմբանկ-Գազպրոմբանկի խումբ ՓԲԸ-ն: Ընկերությունը հիմնադրվել է 2006թ.-ին և իր հիմնադրման օրվանից մինչ օրս ներդրումային գործունեություն է ծավալում Հայաստանի Հանրապետությունում։

Նշենք, որ «Արդշինբանկը» ՓԲԸ-ն (մինչև 2014-ի նոյեմբերը - Արդշինինվեստբանկ) հիմնադրվել է 2003 թ. Այն ներկայումս ունի 56 մասնաճյուղ և սպասարկման մեկ կետ և ներկայացուցչություն նաև Փարիզում: Իր հիմնական հաշվեկշռային ցուցանիշներով  Արդշինբանկը գտնվում է առաջատարների տասնյակում: «Առէկսիմբանկ-Գազպրոմբանկի խումբ» ՓԲԸ-ն հիմնադրվել է 1998 թ-ին, ունի 16 մասնաճյուղ և մեկ սպասարկման կետ: Մինչև 2016-ի հոկտեմբերի 7-ն Առէկսիմբանկը հանդիսանում էր ռուսական Գազպրոմբանկի դուստրը:

Ըստ ԱրմԻնֆո գործակալության` Հայաստանի Բանկերի Ֆինանսական Վարկանիշի, Արդշինբանկի բաժնետերերն են` «Բիզնես ներդրումների կենտրոն» ՍՊԸ - 97,52%, Արամ Անդրեասյան - 1.57%, Կարեն Սաֆարյան (ՌԴ) - 0.37%, Ռուդիկ Մկրտումյան – 0,27%,  Խաչիկ Զաքարյան  - 0.27%, «Միջազգային բիզնես կենտրոն» ՀՁ - 0.0005%: Արդշինբանկի ընդհանուր կապիտալը 2016 թվականի հոկտեմբերի 1-ին կազմել է 53.03 մլրդ դրամ (3 տեղ), ակտիվները` 442.2 մլրդ դրամ (2 տեղ), վարկային ներդրումները`328.15 մլրդ դրամ (2 տեղ): Բանկը տարվա առաջին 9 ամիսների ընթացքում շուկայի առաջատարն է զուտ շահույթի գծով - 3,4 մլրդ դրամ, տարեկան աճը`52,5%: 2016 թվականի հոկտեմբերի 1-ին Առէկսիմբանկի ընդհանուր կապիտալը կազմել է 20.8 մլրդ դրամ, ակտիվները`90,7 մլրդ դրամ, վարկային ներդրումները` 57,7 մլրդ դրամ, իսկ կուտակված վնասը հասել է մոտ 17 մլրդ դրամի, տարեկան կտրվածքով խորանալով 12 անգամ: