Գագիկ Բեգլարյանը բացառում է չարաշահումները Հյուսիս-Հարավ ավտոմայրուղու շինարարության ներդրումային ծրագրի իրականացման ընթացքում

Արմինֆո. ՀՀ տրանսպորտի և կապի նախարար Գագիկ Բեգլարյանը նոյեմբերի 26-ին, մինչև ՀՀԿ համագումարը, լրագրողների հետ հանդիպման ընթացքում հավաստել է, որ Հյուսիս-Հարավ ավտոմայրուղու շինարարության ներդրումային ծրագրի իրականացման ընթացքում չարաշահումներ և յուրացումներ չեն եղել:

Նրա խոսքով, եթե ՀՀ կառավարությունն աշխատանքների որակի նկատմամբ պրետենզիաների պատճառով նախատեսված 80 մլն.դոլարից 7 մլն.դոլարը իսպանական Corsan Corviam ընկերությունից ետ է վերցնում, ապա այդ փաստը վկայում է այն մասին, որ այստեղ չարաշահումներ չեն եղել:

Պատասխանելով լրագրողների այն նկատողությանը, որ անգամ ներկայիս նախարար Վահան Մարտիրոսյանն է խոսել չարաշահումների մասին, Բեգլարյանը կոչ է արել ինտրիգներ չփնտրել: «Ինտրիգներ մի փնտրեք և պատվերներ մի կատարեք: Ես լսել եմ նախարար Մարտիրոսյանի խոսքերը, նա ասել է, որ նախկին նախարարն աշխատել է բարեխղճորեն»,-նմշել է Բեգլարյանը:

Նշենք, որ հոկտեմբերի 20-ին տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը լրագրողներին հայտնել էր, որ ՀՀ կառավարությունը՝ ի դեմս Տրանսպորտի, կապի և տեղեկատվական տեխնոլոգիաների նախարարության, իրականացնում է Հյուսիս-Հարավ մայրուղու շինարարության արդյունավոտության գնահատում: Ինչպես հայտարարել է նախարարը, տվյալ փուլում գնահատվում է նախագծի արդյունավետությունը. ացկացվում են ինչպես ավտոմայրուղու շինարարության, այնպես էլ ընդհանուր առմամբ «Հյուսիս-Հարավ» ծրագրի ստուգումներ: Միաժամանակ նախարարը հավաստիացրել է, որ իր պաշտոնավարման ընթացքում որևէ չարաշահում չի լինի:

Իսկ նախօրեին երկրի Խորհրդարանում խանարարը տեղեկացրել էր, որ Հայստանը ձեռնամուխ է լինում «Հյուսիս-Հարավ» ճանապարհի Սյունիքի 40 կմ հատվածի շինարարությանը: Ըստ նախարարի, արդեն տեղի է ունեցել մրցույթը, բայց արդյունքները դեռ չեն ամփոփվել: «Հյուսիս-Հարավ ճանապարհային միջանցքի ներդրումային ծրագիր» ՊՈԱԿ գլխավոր գործադիր տնօրեն Արթուր Սարգսյանը հավաստել է, որ «Հյուսիս-Հարավ» տրանսպորտային միջանցքի շինարարարական աշխատանքներն ընթանում են սովորական ռեժիմով, ըստ ժամանակացույցի:

Հիշեցնենք, որ ընթացիկ տարվա հուլիսին կառավարության նիստի ժամանակ ՀՀ նախկին վարչապետ Հովիկ Աբրահամյանը հայտարարել էր, որ իսպանական շինարարական ընկերությունն իսկական չարիք է դարձել «Հյուսիս-Հարավ» ավտոմայրուղու համար: Նրա խոսքով, իրեն հասել են լուրեր, որ ավտոմայրուղու շինարարությունը ձգձգվում է իսպանական ընկերության ֆինանսական պրոբլեմների պատճառով: Նա ընդգծել էր նաև, որ Արարատի ճանապարհը նույնպես մինչ օրս պրոբլեմների մեջ է և սարքվել է անորակ: «Կա՞ն արդյոք պրոբլեմներ այդ ընկերության, և չգիտեմ էլ ում հետ, ասում են փող չկա, զբաղվեք այդ հարցով»,-հանձնարարել էր Աբրահամյանը:

Հիշեցնենք, 556 կիլոմետր ընդհանուր երկարություն ունեցող «Հյուսիս–Հարավե միջանցքը ելք կապահովի դեպի Սև ծով և եվրոպական երկրներ Հայաստանի (Մեղրի–Կապան–Գորիս–Երևան–Աշտարակ–Գյումրի–Բավրա) և Վրաստանի տարածքներով։ 1 մլրդ դոլար արժողությամբ ներդրումային ծրագիրն նպատակաուղղված է Հայաստանի հյուսիսի (Վրաստանի հետ սահմանում) և հարավի (Իրանի հետ սահմանում) կապի ապահովմանը տրանսպորտային այնպիսի հաղորդակցությունների միջոցով, որոնք բավարարում են միջազգային բարձր չափանիշներն ու ելք են ապահովում դեպի համաշխարհային շուկաներ։ Ավտոճանապարհը կունենա բետոնե ծածկույթ: Նախագծի իրագործման համար Հայաստանը 500 մլն դոլարի վարկ է ներգրավել Ասիական զարգացման բանկից: Եվս 150 մլն դոլար կտրամադրի Եվրասիական զարգացման բանկը: Հայկական կողմը նախագծի իրացման համար նաև 60 մլն դոլար է ներգրավել Եվրոպական ներրդումային բանկից: Միջանցքի շինարարությունը նախատեսվում է լիովին ավարտել 2019 թվականին: «Հյուսիս-Հարավ» ծագրի առնչությամբ Հայաստանի կառավարությունը հաշվարկել է 2,5 դոլարի խնայողություն յուրաքանչյուր ուղևորի մեկ ժամվա երթևեկության և 1-ական դոլարի խնայողություն 1 տոննա բեռի փոխադրման 1 ժամվա համար: Ինչպես ակնկալում են Հայաստանի իշխանությունները, ծրագիրը թույլ կտա  ապագայում մեղմել Ադրբեջանի և Թուրքիայի կողմից շրջափակման հետևանքները, ստանձնել տարանցիկ  պետության դեր տարածաշրջանի երկրների բեռանփոխադրումներում, ինչպես նաև միանալ Սևծովյան օղակաձև ավտոմայրուղուն: