Հայաստանը շուտով կարող է ԵՄ հետ Ընդհանուր ավիացիոն տարածության մասին համաձայնագիր ստորագրել

Արմինֆո. Միասնական եվրոպական երկինքը, հնարավոր է, շուտով բաց լինի Հայաստանի համար: ԵՄ տրանսպորտի, հեռեահաղորդկացման և էներգետիկայի խորհուրդը դեկտեմբերի 1-ի նիստում հավանություն է տվել Հայաստանի հետ օդային տրանսպորտի  մասին համապարփակ համաձայնագրի կնքման շուրջ բանակցությունների սկսմանը:

Ինչպես նշվում է ԵՄ՝ ԱրմԻնֆո ստացված հաղորդագրության մեջ, ընդհանուր ավիացիոն տարածության մասին համապարփակ համաձայնագիրն ուղղված է Եվրոպայում միջազգային կապի որակի բարձրացմանը, բարձրորակ ծառայության ապահովմանը և ուղևորների համար ավելի լայն ընտրության հնարավորության ընձեռմանը: Համաձայնագիրը նաև ԵՄ ավիացիոն ինդուստրիայում մրցունակության բարձրացման նպատակ է հետապնդում:

Հայաստանի հետ փաստաթուղթը Ընդհանուր ավիացիոն տարածության մասին (Common Aviation Area Agreement) համաձայնագրի ձև կունենա, քանի որ Հայաստանն այն երկրներից է, որոնց հետ ԵՄ–ն սերտ հարաբերություններ է կառուցում հարևանության իր քաղաքականության միջոցով:

Հաղորդվում է, որ Խորհրդի նախագահ Արփադ Էրշեկը ողջունել է Հայաստանի հետ բանակցությունների մեկնարկի մասին որոշումը։ Նրա խոսքով՝ համաձայնագիրը կնպաստի զբոսաշրջիկների ակտիվ փոխանակմանը, ավիացիոն շուկայում ավելի ցածր գների սահմանմանը և նոր հնարավորություններ կբացի բիզնեսի համար։ «Համաձայնագիրը Հայաստանի և ԵՄ–ի միջև Արեւելյան գործընկերության համատեքստում համագործակցության հիանալի օրինակ կդառնա»,– ասել է նա։ Հանձնաժողովը բանակցություններ կանցկացնի ԵՄ և դրա անդամ պետությունների անունից:

Նշենք, որ «Միասնական եվրոպական երկնքին» Հայաստանի միանալու ժամկետները մի քանի անգամ հետաձգվել են: 2015 թվականի դեկտեմբերին Բրյուսելում ԵՄ արտաքին գործերի գերագույն ներկայացուցիչ Ֆեդերիկա Մոգերինիի հետ հանդիպման ժամանակ արտգործնախարար Էդվարդ Նալբանդյանը հայտարարել էր ԵՄ հետ ընդհանուր ավիացիոն տարածության շուրջ համաձայնագիր ստորագրելու Հայաստանի պատրաստակամության մասին: Նշվել էր, որ դեկտեմբերին ԵՄ մանդատ կտրամադրի նման համաձայնագրի ստորագրման համար, իսկ 2016 թվականի հունվարին կսկսվեն այդ հարցի շուրջ բանակցություններ: Վերջին ամիսների ընթացքում Երևանը բազմիցս ընդգծել է իր շահագրգռվածությունը բանակցությունների շուտափույթ մեկնարկով: Միաժամանակ հայկական կողմը նշել է,ո ր Հայաստանը մանդատի ձևակերպումը հետաձգելու պատճառ չի տեսնում:

Սահմանված կարգի համաձայն՝ մանդատն ստանալուն պես ԵՀ լիազորված կլինի բանակցություններ սկսել Երևանի հետ: Հայաստանին կտրամադրվի համաձայնագրի նախագիծը, որը, ըստ ԵՄ, կլինի միասնական ավիացիոն տարածությանը միանալու շուրջ բանակցությունների հիմքում: Էկոնոմիկայի փոխնախարարի ասելով, բանակցությունները  տևական չեն լինի,  քանի որ կա բոլոր երկրների հետ համագործակցության հիմնական մոդելային ձևաչափ:

 Եվրոպայի միասնական ավիացիոն տարածությունը համարվում է հորիզոնական համաձայնագիր, այսինքն, այն ինքնըստինքյան ուժի մեջ կմտնի ինչպես ԵՄ, այնպես էլ դրա երկրներից յուրաքանչյուրի համար` առանձին վերցրած: Թռիչքների անվտանգության ապահովմանը և սերտիֆիկացիոն կանոնակարգերին զուգընթաց, փաստաթղթով նախատեսվում է Հայաստանի օտարերկրյա փոխադրողների և Հայաստանյան փոխադրողների դեպի Եվրոպայի երկրներ չվերթների սահմանափակումների վերացում: Դա թույլ կտա ավելի լավ պայմաններով Հայաստան ներգրավել եվրոպական ավիաընկերություններին, մասնավորապես` բյուջետայիններին: Ազատականացումը նաև կապահովի միջազգային մակարդակով բարեխիղճ մրցակցություն` պետական աջակցության և ստանդարտների կարգավորման համամդրման միջոցով: Դա նշանակում է ինտեգրում եվրոպական ավիացիոն շուկայում: Աջակցություն հայ գործարարների ելքին արտաքին շուկաներ, վերածում կարևոր տարանցիկ երկրի` օդային փոխադրումների ոլորտում: «Արևելյան գործընկերությանե անդամ երկրներից միասնական ավիացիոն տարածությանը միացել են Մոլդովան, Վրաստանն ու Ուկրաինան: Ընդհանուր եվրոպական ավիացիոն տարածությանը միանալը Հայաստանին թույլ կտա դուրս գալ անվտանգ ու կայուն օդային տարածք: