Հայաստանում վարկերի անվերադարձելիության պատճառով դժվար կացության մեջ հայտնված ֆերմերների խնդիրների լուծման մեխանիզմներ են մշակվում

Արմինֆո. ՀՀ կառավարությունը հանրապետության Կենտրոնական բանկի հետ միասին վարկերի անվերադարձելիության պատճառով դժվար կացության մեջ հայտնված ֆերմերների խնդիրների լուծման մեխանիզմներ է մշակվում: Այդ մասին դեկտեմբեր 7-ին խորհրդարանի ամբիոնից հայտարարել է գյուղատնտեսության նախարար Իգնատի Առաքելյանը՝ պատասխանելով ՀԱԿ խմբակցության պատգամավոր Լևոն Զուրաբյանի հարցին:

Լևոն Զուրաբյանն ընդգծել է, որ ներկայումս ֆերմերների ամբողջ բանակ է ձևավորվել, որոնց թիվը տասնյակ հազարի է հասնում, ովքեր դժվար կացության մեջ են հայտնվել, քանի որ 24% շատ բարձր տոկոսադրույքով առևտրային բանկերից վարկեր են ներգրավել, սակայն ցրտահարության և կարկուտի պատճառով ի վիճակի չեն մարել պարտքերը: Մինչդեռ գյուղացիները գրավադրել են իրենց գույքը, ինչի հետևանքով դատական գործընթացներ են սկսվել: Պատգամավորը կառավարությանը կոչ է արել լուծել խնդիրը:

Իգնատի Առաքելյանն իր հերթին նշել է, որ խնդրի մասին զեկուցվել է վարչապետին, ով հանձնարարել է Կենտրոնական բանկի հետ համատեղ քննարկել և մշակել խնդրի լուծման մեխանիզմներ: Նախարարն ընդգծել է, որ ներկայումս բանակցություններ են տարվում գերմանական KfW բանկի հետ՝ ագրոապահովագրության պիլոտային ծրագիր իրականացնելու շուրջ, ինչի շնորհիվ հնարավոր կլինի որոշ չափով լուծել այդ հարցը:

Ավելի վաղ, պատասխանելով գյուղատնտեսական ապահովագրության ներդրման մասին ԱրմԻնֆո-ի հարցին, գյուղնախարար Իգնատի Առաքելյանը հայտարարել էր, որ նախաձեռնությունը ներառված է կառավարութան ծրագրում: Նրա խոսքով, նախատեսվում է պետության և գերմանական բանկի համամասնական մասնակցությունը: «Առաջարկի հավանության արժանանալուց հետո կործարկվի պիլոտային ծրագիրը, և, հնարավոր է, ներդրվի արդեն հաջորդ տարվանից»,-նշել է նա:

Հիշեցնենք, որ սեպտեմբերի 29-ին, լրագրողների հետ զրույցում, գյուղատնտեսության նախարար Իգնատի Առաքելյանը հաղորդել էր, որ Հայաստանի համայնքներից մեկում նախատեսվում է իրականացնել գյուղատնտեսական ապահովագրության պիլոտային ծրագիր: «Եթե այն իրեն արդարացնի, ապա կգտնվեն ֆերմերների բոլոր խնդիրների լուծումները՝ կապված հակակարկտային կայանների, վնասատուների և այլ բաների հետ»,-հայտարարել էր նախարարը, հավելելով, որ ապահովագրությունը կարող է փրկօղակ հանդիսանալ ֆերմերների համար:

Նշենք, որ Հայաստանում գործող ապահովագրական օրենսդրությունը թույլ է տալիս ներդնել գյուղատնտեսական ապահովագրության հետևյալ տեսակները՝ բերքի ապահովագրություն, կենդանիների ապահովագրություն, ինչպես նաև գյուղատնտեսական շինությունների ապահովագրություն: