Վարդան Բոստանջյանը 2016 թվականին Հայաստանում կանխատեսում է զրոյական տնտեսական աճ

Արմինֆո. Հայաստանն ընթացիկ տարին կեզրափակի տնտեսական աճի զրոյական ցուցանիշով: Նման կանխատեսումով է հանդես եկել ՀՀ նախակին պատգամավոր, տնտեսագետ Վարդան Բոստանջյանը դեկտեմբերի 7-ին կայացած մամուլի ասուլիսում:

«Ազգային վիճակագրական ծառայությունը, կիրառելով զանազան մոտեցումներ և մեթոդներ, արձանագրել է այնպիսի ցուցանիշներ, որոնք վրա հիմնվելով կարելի է խոսել տնտեսական բարենպաստ իրավիճակի մասին: Ու հանկարծ տնտեսական ակտիվությունը 3.5%-ից ընկնում է մինչև 0.4%: Ստացվում է, որ նախորդ հաշվարկները չէին արտացոլում իրական պատկերը»,-հայտարարել է նա: Նա նշել է, որ ներկայիս իշխանությունները մտադիր են հանրությանը ներկայացնել իրական վիճակը, հենվելով տնտեսական ծանր իրավիճակի մասին վարչապետի վերջերս կատարած հայտարարության վրա, ինչը շատերին է մտահոգել: «Տնտեսական ակտիվության մասին արձանագրված վերջին տվյալները խոսում են միայն այն մասին, որ մենք սկսել ենք փնտրել ճշմարտությունը: Ոչ միայն ես, այլ շատերն են ողջունում նոր կառավարությանա այդ մոտեցումը»,-հայտարարել է նա:

Միջազգային կազմակերպությունների կողմից կանխատեսված 3.2% տնտեսական աճը, ըստ փորձագետի, իրատեսական չէ: Ունենալով առևտրի շրջանառության աննշան ծավալներ, նման ցուցանիշներ հնարավոր է արձանագրել միայն ստվերի և կոռուպցիայի դեմ արդյունավետ պայքարի դեպքում, նշել է նա: Անդրադառնալով Հայաստանի տնտեսական բարձր ցուցանիշների մասին ՀՀ և ՌԴ ղեկավարների հայտարարությանը, փորձագետը նշել է. «Հալվա ասելով բերանդ չի քաղցրանա»: Ստեղծված շրջանակներում, ըստ փորձագետի, տնտեսական աճի մասին խոսելը պարզապես «անհամեստություն» է, հաշվի առնելով մի շարք այլ գործոններ, որոնք ազդարարում են բոլորովի այլ պատկերի առկայության մասին:

Այս համատեքստում Բոստանջյանը նշել է բյուջեի թերի կատարումը, որն արդեն կազմել է 80 մլրդ.դրամ, և իր կանխատեսումներով, մինչև տարեվերջ այդ ցուցանշը կհասնի 100 մլրդ.դրամի: Ըստ փորձագետի, 2017 թվականի բյուջեն պետք է լինի ավելի իրատեսական և զգույշ, հաշվի առնելով, որ այնտեղ նախատեսված չէ աշխատավարձերի, կենսաթոշակների և նպաստների բարձրացում: «Բյուջեի նախագծի քննարկումն ԱԺ-ում վկայում է այն մասին, որ հաջորդ տարի ստիպված կլինենք ավելի սեղմել մեր գոտիները, բայց կարծում եմ, որ պետք է ստեղծվեն նաև նախադրյալներ, որոնք կնպաստեն տնտեսական լճացումից երկրի դուրս գալուն»,-ասել է նա:

Պատասխանելով ԱրմԻնֆո գործակալության հարցին, Բոստանջյանը սուր քննադատութնան է ենթարկել նաև նոր Հարկային օրենսգիրքը, անվանելով այն Հայաստանի համար բացասական գործոն, հատկապես տնտեսվարողների համար: Ըստ Բոստանջյանի, այն թելադրված է միջազգային կառույցների կողմից, ինչպես նաև նրանց կողմից ֆինանսավորված: «Նոր Հարկային օրենսգիրքը, չնայած պարունակում է դրական միտումներ և շեշտադրում է կատարում համակարգայնության վրա, սպառնում է բիզնեսին: Ես հանդես եմ գալիս նման երևույթներին դեմ, և իմ համոզմամբ, փաստաթուղթն անհրաժեշտ է փոխել»,-եզրափակել է նա:

Նշենք, որ ԱՄՀ նորացված կանխատեսմամբ, Հայաստանի ՀՆԱ-ի աճը 2016 թ. բարելավվել է մինչև 3.2% (նախկինում կանխատեսումը`2,25-2,5%), արագանալով 2017 թվականին մինչև 3.4%: Բացի այդ, ԱՄՀ-ն իր զեկույցում Հայաստանը դիտում է որպես գների դինամիկայի առաջատար, 2016 թվականի արդյունքներով կանխատեսելով ոչ թե գների աճ, այլ 0,5% անկում: ՎԶԵԲ-ը Հայաստանի համար 2016-ին կանխատեսում է 2% տնտեսական աճ: Ըստ պետբյուջեի, 2016-ին գնաճը Հայաստանում նախատեսվում է 4% (+/- 1,5%), իսկ ՀՆԱ աճը`2,2%, 2017-ին արագանալով մինչև 3,2%: Ըստ ՀՀ ԿԲ կանխատեսումների, ՀՆԱ-ի աճը 2016-ին վերանայվել է դեպի դանդաղում`մինչև 2.8-3.4%, նախորդ`2.7-3.6% փոխարեն:

Ըստ ՀՀ ֆինանսների նախարարության տվյալների, իր հիմնական ցուցանիշներով բյուջեի պատկերը հետևյալն է: Տնտեսական աճը կկազմի մոտ 3.2%, ինդեքս-դեֆլյատորը` 1.7 (այս տարի կկազմի, ըստ ֆինանսների նախարարության, մոտ 2.4%), դեֆիցիտը կկազմի 150, 1 մլրդ դրամ: Մինչև տարեվերջ ՀՆԱ դեֆլյատորը նախատեսված չէ, իսկ 2017 թ.-ին այս ցուցանիշը կլինի մոտ 101.7%: Հայաստանի պետբյուջեի եկամտային մասն առաջարկվում է բարձրացնել 27 մլրդ դրամով, մինչև 1 210 մլրդ.դրամ, ծախսային մասը կրճատել մոտ 13 մլրդ.դրամով, մինչև 1 360 մլրդ դրամ (ներկայիս փոխարժեքով`մոտ $ 2.87 մլրդ): (եկամուտներ/ՀՆԱ հարաբերակցությունը` 22,4%)): 2016 թվականի բյուջեով ամրագրված էր 1 տրլն 186.3 մլրդ դրամ (եկամուտներ/ ՀՆԱ հարաբերակցությունը`21.8%): Եկամուտների կառուցվածքում հարկային եկամուտները և պետական ​​տուրքերը կկազմեն 1 135 մլրդ դրամ (2016 թ.`1065 մլրդ դրամ):