«Ռոսատոմը» բանակցություններ է վարում Հայաստան կոնտեյներային փոքր ՀԷԿ-ի մատակարարման շուրջ

Արմինֆո. «Ռոսատոմ միջազգային ցանցեր» ընկերությունը բանակցություններ է վարում Հայաստան, Ինդոնեզիա, Ղազախստան, Ուզբեկստան, Լատինական Ամերիկայի, Աֆրիկայի և այլ երկրներ կոնտեյներային փոքր ՀԷԿ-երի մատակարարման շուրջ:

Ինչպես նշվում է ընկերության հաղորդագրությունում, «Ռոսատոմի մեքենաշինական դիվիզիոնում ընդգրկված հունգարական Ganz EEM ընկերությունը կնքել է կոնտեյներային փոքր ՀԷԿ-ի մատակարարման առաջին պայմանագիրը: Որպես պատվիրատու հանդես է գալիս վրացական International Energy Company, LTD-ն, որը զարգացնում է հիդրոէներգետիկ ուղղությունը:

Աղբյուրի համաձայն, Ganz ընկերության արտադրած փոքր ՀԷԿ-ը պարզ և խնայողական լուծում է, որը կարող է կիրառվել այն տարածաշրջաններում, որտեղ հնարավոր չէ կենտրոնացված էլեկտրամատակարարում իրակաանցնել` ֆինանսական կամ տեխնիկական տեսանկյունից: Այն կարող է լինել ինչպես էլեկտրաէներգիայի ինքնուրույն աղբյուր, այնպես էլ այլընտրանք` էներգիայի ոչ խնայողական և ոչ էկոլոգիական աղբյուրների նկատմամբ: Այդ լուծումը չի պահանջում ամբարտակների կառուցում և չի խախտում գետերի և մյուս ջրամբարների էկոլոգիան: Կայանն իրենից ներկայացնում է տուրբին և օժանդակ սարքավորման հավաքակազմ` տեղադրված կոնտեյներում: Կոնտեյներային լուծումը թույլ է տալիս էապես կրճատել գործարկման ժամկետը և մի քանի անգամ նվազեցնել շինարարական աշխատանքների արժեքը: Փոքր ՀԷԿ-ի հիմնական առավելությունն էլեկտրաէներգիայի ցածր ինքնարժեքն է, սարքավորման փոխադրման սեղմ ժամկետը, պարզ ու արագ մոնտաժը: Տեղադրումից և ջուրը տուրբինին միացնելուց հետո էլեկտրաէներգիայի արտադրությունը կարող է սկսվել մեկ ամսվա ընթացքում: Մյուս առավելությունը  բջջային հեռախոսի կամ ինտերնետային կապի միջոցով հեռակառավարման հնարավորությունն է: