Հինգշաբթի, 15 Դեկտեմբերի 2016 14:51

Արմինֆո. Ռուս-վրացական սահմանի «Վերին Լարս» անցակետում 700 բեռնատար է կուտակվել, որոնցից 400-ը ճանապարհվել էր դեպի Հայաստան կամ` Հայաստանից: Այդ մասին լրագրողներին պատմել է տրանսպորտի նախարար Վահան Մարտիրոսյանը կառավարության հերթական նիստից հետո, որում վարչապետ Կարեն Կարապետյանը հանձնարարել է ուշադիր հետևել և մշտապես վերահսկել իրավիճակը:

 

Նախարարի ասելով, ինքը հասցրել է լինել անցակետում, շփվել վարորդների հետ: «Վրացի գործընկերներն ամեն ջանք գործադրում են ճանապարհը ձնից արագ մաքրելու համար: Դժբախտաբար, բնության դեմ մենք անզոր ենք: Այսքան առատ ձյուն վաղուց չէր եղել: Սպասենք եղանակային պայմանների բարելավմանը», - նշել է Մարտիրոսյանը: Նրա ասելով, իրավիճակն անցակետում միանշանակ չէ, կան դժգոհողներ, կան նաև այնպիսիք, ովքեր գոհ են պետակն կառույցների ներկայացուցիչների վարքագծից: Տրանսպորտային ֆիրմաների մեծ մասն այնտեղ ունեն ներկայացուցիչներ, որոնք ձգտում են հնարավորինս թեթևացնել անցակետում գտնվող մարդկանց վիճակը:

 

Պատասխանելով Ռազմավիրական ճանապարհի շրջանցմամբ Հարավային Օսիայով դեպի Ռուսաստան այլընտրանքային ճանապարհ բացելու ուղղությամբ Վրաստանի գործընկերների հետ Հայաստանի տրանսպորտի նախարարության` դեռ հունիսի վերջին մեկնարկած բանակցությունների արդյունքին առնչվող ԱրմԻնֆո-ի թղթակցի հարցին` Մարտիրոսյանը հավաստիացրել է, որ բանակցային գործընթացը շարունակվում է` այն համարելով « հուսադրող, սակայն ոչ վերջնական»:

 

Ուշագրավ է, որ «Վերին Լարս» անցակետը, որով նախորդ դարի 90-ական թվականներից անցնում է Հայաստանի և Ռուսաստանի միջև միակ ցամաքային ճանապարհը, ձմռան շրջանում պարբերաբար փակվում էձյան առատ տեղումների, իսկ գրանանը` սելավների պատճառով, չնայած այն հանգամանքին, որ վրացական կողմը մեծ աշխատանք է տարել ճանապարհի արդիականացման և երթևեկության անվտանգության ապահովման նպատակով:

 

Տրանսպորտի և կապի նախկին  նախարար Գագիկ Բեգլարյանը դեռ ամռանն ասում էր, որ հնարավոր է ճանապարհ բացել Հարավային Օսիայի տարածքով, «ճանապարհը լավ վիճակում է, զուգահեռ բանակցություններ են վարվում ինչպես Թբիլիսիի, այնպես էլ Մոսկվայի հետ, բայց այս դեպքում Հայաստանից  շատ քիչ բան է կախված»: