Անելիք Բանկն անցնում է աճի հաճախորդակենտրոն մոդելին

Արմինֆո. Անելիք Բանկն անցնում է աճի հաճախորդակենտրոն մոդելին: Այս մասին դեկտեմբերի 20-ին կայացած մամուլի ասուլսում հայտարարել է Անելիք Բանկի Խորհրդի նախագահ Վարդան Դիլանյանը:

«Մենք, անկասկած, առաջին հերթին ցանկանում ենք կայուն իմիջով և բավականին պահպանողական քաղաքականություն ունեցող Բանկին շրջել դեմքով դեպի հաճախորդը: Հաճախորդների հարմարավետությունը, պրոդուկտների բազմազանությունը և դրանք ստանալու թեթևությունը, բանկային մենեջեմենտի պահպանողական բոլոր նորմերի պահպանմամբ, հանդիսանում է այն մրցակցային առավելությունը, առանցքային մոմենտը, որի շուրջ մենք պետք է կառուցենք աճի մեր հաճախորդակենտրոն մոդելը»,-ասել է նա: Ըստ Դիլանյանի, ժամանակակից պայմաններում, ապագայի հեռանկարով, Հայաստանում կա հնարավորություն, որպեսզի Անելիք Բանկը դառնա առաջատար ֆինանսական հաստատություն: «Մենք ունենք հավակնոտ պլաններ, մենք լավատեսորեն ենք նայում ապագային և հիմա մշակում ենք ռազմավարական զարգացման մանրակրկիտ պլանը»,-նկատել է նա:

Նրա խոսքով, նոր ռազմավարությամբ նախատեսվում է բանկային ծառայությունների շարքի ընդլայնում, որպեսզի երիտասարդները և պրոգրեսիվ գործարարները շրջվեն դեպի Բանկը: «Մենք կողմնորոշվում ենք դեպի հայ հանրության պրոգրեսիվ մասը»,-ընդգծել է նա: Միևնույն ժամանակ, Դիլանյանը տեղեկացրել է, որ միջնաժամկետ և երկարաժամկետ խնդիրների շրջանակներում նախատեսվում է ժամանակակից ՏՏ-տեխնոլոգիաների ներդրում: «Մեր խնդիրը կայանում է նրանում, որպեսզի հայկական բանկային շուկայում ներդրվի լավագույն միջազգային փորձը»,-ասել է նա: Երկարաժամկետ խնդիրների շարքում նա նաև նշել է Անելիք Բանկի վերածումը մի կենտրոնի, որը կսպասարկի հայկական սփյուռքի հոսքերը, այդ թվում նաև Ռուսաստանից և ԱՄՆ-ից:

Անելիք Բանկի բաժնետեր դառնալու մասին որոշումը Դիլանյանը բացատրել է մի շարք գործոններով, մասնավորապես, բանկի որակով և բաժնետերերի հետ բանակցություններով: «Արտասահմանյան բաժնետիրոջ առկայությունն արդեն խոսում է այն մասին, որ բանկը կողմ է կառավարման պահպանաողկան մեթոդներին, իսկ դա ինձ համար կարևոր գործոն է»,-հավելել է նա: Միևնույն ժամանակ, իր կողմից Հայաստանի բանկային համակարգում ներդրումներ կատարելուն նպաստել է նաև ՀՀ Կենտրոնական բանկի քաղաքականությունը, որն ուղղված է բանկային համակարգի կայունությանը, նշել է Դիլանյանը:

«Կարծում եմ, որ մենք կարող ենք այստեղ կառուցել աճի երկարաժամկետ մոդել: Բանկի խնդիրը հավակնոտ է, բայց 50 մլն.դոլարի ներդրումների շնորհիվ մենք բանկը կդարձնենք պրոգրեսիվ և հաճախորդակենտրոն մի ֆինանսական կառույց, որն ուղղված է դեպի երկարաժամկետ և հաջող զարգացում»,-ընդգծել է Դիլանյանը: Հիշեցնենք, որ 2016 թվականի դեկտեմբերի սկզբին Անելիք Բանկն ավարտեց լրացուցիչ բաժնետոմսերի թողարկման գործընթացը: Բոլոր 405.511 բաժնետոմսերը տեղաբաշխվել են փակ բաժանորդագրությամբ: Համալրումն իրականացվել է բանկի նոր բաժնետիրոջ կողմից, ինչի արդյունքում Բանկի կանոնադրական կապիտալն ավելացրել է 21.8 մլրդ ՀՀ դրամով, հասցնելով 39 մլրդ.դրամի: Արդյունքում, բանկի ընդհանուր կապիտալը կազմել է 36.7 մլրդ.դրամ, գերազանցելով ՀՀ ԿԲ նորմատիվը: Բանկի բաժնետոմսերը ձեռք է բերել կիպրոսյան FISTOCO LTD ընկերությունը, որի մասնաբաժինը բանկի կապիտալում կազմեց 59.68%, իսկ նախկին սեփականատիրոջ, լիբանանյան CreditBank S.A.L-ի մասնաբաժինը կազմեց 42.32%: Բանկի անուղղակի մեծամասնական բաժնետերերն են ֆիզիկական անձինք` Tarek J. Khalefe (CreditBank S.A.L) և Վարդան Դիլանյանը (FISTOCO LTD): Բանկի բաժնետերերի կողմից ձևավորվել է Բանկի նոր Խորհուրդ, որում ընդգրկվել են բանկային համակարգում բազմամյա փորձ ունեցող մասնագետներ: Բանկի Խորհրդի նախագահն է դարձել Վարդան Դիլանյանը (Accenture PLC խորհրդատվական ընկերություն): Բանկի Վարչության ղեկավարը չի փոխվել, այն կշարունակի ղեկավարել Ներսես Կարամանուկյանը: