ՀՀ ԿԲ իջեցրել է վերաֆինանսավորման տոկոսադրույքը`6.5%-ից մինչև 6.25%

Արմինֆո. ՀՀ Կենտրոնական բանկը իջեցրել է վերաֆինանսավորման տոկոսադրույքը`6.5%-իվ մինչև 6.25%: Ինչպես ԱրմԻնֆո գործակալությանը տեղեկացվել է ՀՀ ԿԲ մամուլի ծառայությունից, վերաֆինանսավորման տոկոսադրույքը 0.25 տոկոսային կետով իջեցնելու մասին որոշումն ընդունվել է դեկտեմբերի 27-ին, ԿԲ Խորհրդի նիստում:

Միևնույն ժամանակ, լոմբարդային ռեպոների և բանկերից ներգրավվող միջոցների տոկոսադրույքները սահմանվել են համապատասխանաբար 7.75 % և 4.75 %:

Աղբյուրի համաձայն, 2016 թ. նոյեմբերին արձանագրվել է 1.0% գնաճ՝ նախորդ տարվա նույն ամսվա 0.6%-ի դիմաց, որի պարագայում 12-ամսյա գնանկումը շարունակել է մեղմվել՝ կազմելով 0.6%: Այնուամենայնիվ, ԿԲ գնահատումների համաձայն մոտակա ամիսներին գնանկումային միջավայրը դեռևս կպահպանվի:

Արտաքին հատվածում պահպանվել են համաշխարհային տնտեսության աճի դանդաղ տեմպերը, իսկ միջազգային ապրանքային շուկաներում շարունակել են արձանագրվել գնաճային զարգացումներ: ԿԲ խորհուրդը գնահատում է, որ առաջիկա ամիսներին արտաքին հատվածից էական գնաճային ազդեցություններ դեռևս չեն ակնկալվում: Այդուհանդերձ, առկա են որոշակի գնաճային ռիսկեր՝ կապված ԱՄՆ Դաշնային պահուստային համակարգի կողմից տոկոսադրույքի բարձրացման ընթացքի և զարգացող երկրների վրա դրա ազդեցության հետ:

Խորհուրդն արձանագրում է, որ տնտեսական ակտիվության տեմպերը շարունակում են դանդաղել՝ հիմնականում պայմանավորված առաջարկի գործոններով, մասնավորապես՝ գյուղատնտեսության ճյուղի՝ սպասվածի համեմատ առավել խորը նվազմամբ: Աստիճանաբար շարունակվում է նաև ներքին պահանջարկի վերականգնումը՝ առավելապես ի հաշիվ 2015-2016 թթ-ի ընթացքում իրականացված խթանող դրամավարկային և հարկաբյուջետային քաղաքականությունների: Այդուհանդերձ, Դրամավարկային քաղաքականության չորրորդ եռամսյակի ծրագրով նախանշված որոշ գնանկումային ռիսկեր դառնում են ավելի առարկայական, այդ թվում՝ գնաճային սպասումների նվազումը և փետրվարին ակնկալվող էլեկտրաէներգիայի սակագնի իջեցումը, որոնք առավել հավանական են դարձնում 2017 թ. համար  նախանշված գնաճի՝ կանխատեսման միջակայքի ստորին հատվածում պահպանվելը: Այս պարագայում, ԿԲ խորհուրդը նպատակահարմար է գտնում հերթական անգամ թուլացնել դրամավարկային պայմանները:

Խորհուրդը կարծում է, որ իրականացված դրամավարկային քաղաքականությունը բավարար խթաններ է ձևավորել 2017 թ. գնանկումային միջավայրը հաղթահարելու և կանխատեսվող հորիզոնում գնաճի նպատակի իրագործման համար:

Միևնույն ժամանակ ԿԲ Խորհուրդը գնահատում է, որ տոկոսադրույքները բավականին նվազել են և ավանդական դրամավարկային քաղաքականության հնարավորությունները ներկայումս սահմանափակված են, սակայն ԿԲ-ն հավատարիմ է մնում գների կայունությունն ապահովելու իր գլխավոր նպատակին և անհրաժեշտության դեպքում իր ողջ գործիքակազմով համարժեքորեն կարձագանքի՝ միջնաժամկետ հատվածում ապահովելով գնաճի նպատակի իրագործումը:

Տոկոսադրույքի մակարդակի որոշման հիմքում ընկած մանրամասն տեղեկատվությանը կարող եք ծանոթանալ մինչև 2017թ. հունվարի 13-ը հրապարակվելիք Մամլո հաղորդագրությունում (Տոկոսադրույքի արձանագրություն):

Նշենք, որ վերաֆինանսավորման տոկոսադրույքի նախորդ վերանայումը տեղի էր ունեցել նոյեմբերի 15-ին – 6.75%-ից մինչև 6.5%, որի զուգահեռ իջեցվեցին նաև լոմբարդային ռեպոների և բանկերից ներգրավվող միջոցների տոկոսադրույքները համապատասխանաբար սահմանելով`8 % և 5 %: Մինչ այդ վերաֆինանսավորման տոկոսադրույքն իջեցվել էր`սեպտեմբերի 27-ին` 7.25%-ից մինչև 6.75%, իսկ դրան զուգահեռ իջեցվեցին նաև լոմբարդային ռեպոների և բանկերից ներգրավվող միջոցների տոկոսադրույքները համապատասխանաբար սահմանելով`8.25 % և 5.25 %: Իսկ մինչ այդ տոկոսադրույքի վերանայում էր տեղի ունեցել օգոստոսի 16-ին`7,5%-ից մինչև 7,25%, միաժամանակ լոմբարդային ռեպոների և բանկերից ներգրավվող միջոցների տոկոսադրույքները համապատասխանաբար սահմանելով`8.75 % և 5.75 %: Դրանից առաջ, հունիսի 28-ին վերաֆինանսավորման տոկոսադրույքը 7.75%-ից իջեցվեց մինչև 7.5%, միաժամանակ նվազեցնելով լոմբարդային ռեպո-ները և բանկերից ներգրավված միջոցները`9.25%-ից մինչև 6.25% և 9%-ից մինչև 6%: Իսկ մինչ այդ, 2016 թվականի մայիսի 17-ի նիստում, վերաֆինանսավորման տոկոսադրույքը 8.25%-ից իջեցվեց մինչև 7.75%, իսկ լոմբարդային ռեպոների և բանկերից ներգրավվող միջոցների տոկոսադրույքները սահմանվեցին`9.25% և 6.25%, նախկին` 9.75% և 6.75% փոխարեն: Վերաֆինանսավորման տոկոսադրույքի նախորդ փոփոխությունը տեղի էր ունեցել 2016 թվականի մարտի 29-ին, երբ վերաֆինանսավորման տոկոսադրույքը 8.5%-ից իջեցվեց մինչև 8.25%, իսկ լոմբարդային ռեպոների և բանկերից ներգրավվող միջոցների տոկոսադրույքները համապատասխանաբար սահմանվեցին`9.75% և 6.75%, նախկին` 10% և 7% փոխարեն: 2016 թվականի առաջին ոփոխությունը տեղի է ունեցել փետրվարի 16-ին՝ 8.75%-ից իջեցվել էր մինչև 8.25%, իսկ լոմբարդային ռեպոների և բանկերից ներգրավվող միջոցների տոկոսադրույքները համապատասխանաբար սահմանվել էին`10% և 7%,: Մինչ այդ վերաֆինանսավորման տոկոսադրույքի իջեցում տեղի էր ունեցել 2015 թվականի նոյեմբերի 10-ին`10,25-ից մինչև 9,75%, երբ լոմբարդային ռեպոների տոկոսադրույքերը 11.75%-ից նվազեցվել էր մինչև 11.25%, իսկ ներգրավվող ավանդների տոկոսադրույքերը` 8.75%-ից մինչև 8.25%: