Ամերիաբանկն իր բանկոմատները հագեցնում է պաշտպանության ինտելեկտուալ համակարգերով

Արմինֆո. Ամերիաբանկը ներկայումս իր բանկոմատներում տեղադրում է թղթադրամների չեզոքացման ինտելեկտուալ համակարգեր՝ բանկոմատը ֆիզիկապես վնասելու միջոցով  թղթադրամների հափշտակումը կանխելու նպատակով: Ներդրվող համակարգը համարվում է ժամանակակից արդյունավետ միջոցներից մեկը:

Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, բանկոմատների վրա հարձակման փորձի դեպքում այս համակարգերն անհրաժեշտ պահին գունավորում են բանկոմատում առկա բոլոր թղթադրամները չլվացվող թանաքով:

Համակարգերի տեղադրումն իրականացվում է երկու փուլով: Այժմ համակարգերն առաջնահերթ տեղադրվում են Ամերիաբանկի այն բանկոմատներում, որոնք գտնվում են առավել ռիսկային տարածքներում, իսկ երկրորդ փուլում տեղադրվելու են Ամերիաբանկի մնացած բոլոր բանկոմատներում` անկախ գտնվելու վայրից:

Համակարգերի տեղադրման աշխատանքների հետ կապված` հնարավոր է որոշ բանկոմատների աշխատանքի կարճաժամկետ դադար, որի համար Ամերիաբանկը հայցում է հաճախորդների ներողամտությունը:

Ըստ ԱրմԻնֆո գործակալության` «Հայաստանի բանկերը քարտային բիզնեսում» վերլուծական տեղեկագրի, բանկոմատների թվով Ամերիաբանկը գտնվում է լավագույն հնգյակում, 2016 թվականի հոկտեմբերի 1-ին ունենալով 108 բանկոմատ, որից 87 ը գտնվում է Երևանում, իսկ 21-ը`մարզերում: Բանկի քարտերով բանկոմատային տրանսակցիաների ծավալը տարեկան կտրվածքով ավելացել է 21%, կազմելով ավելի քան 63 մլրդ դրամ (2016-ի 9 ամիսներին): Բանկը թողարկում և սպասարկում է ինչպես տեղական ArCa, այնպես էլ միջազգային Visa և MasterCard քարտեր: Բանկի ակտիվ քարտերի ընդհանուր թվում, որոնք անցնում են 70 հազարից, առյուծի բաժինն ընկնում է Visa քարտերին – մոտ 52 հազար քարտ:

«Ամերիաբանկ» ՓԲԸ Հայաստանի դինամիկ զարգացող բանկերից է և դասվում է երկրի ամենակայուն և խոշոր ֆինանսական հաստատությունների շարքին: Այն Հայաստանում առաջին ներդրումային բանկն է և սկսած 2007թ-ից` տրամադրում է նորարարական բանկային ծառայությունների լայն տեսականի: «Ամերիաբանկ» ՓԲԸ ունիվերսալ բանկ է, որը մատուցում է կորպորատիվ, ներդրումային և մանրածախ բանկային ծառայություններ` տրամադրելով բանկային լուծումների ամբողջական փաթեթ: ԱՄերիաբանկի բաժնետերերն են`Америя Групп CY Ltd - 79,3% և EBRD - 20,7% մասնակցությամբ: