Հինգշաբթի, 12 Հունվարի 2017 13:13

Արմինֆո. Հայաստանի կառավարությունը 2017 թվականին ակնկալում է առնվազն 2016 թվականի մակարդակի արտահանման և ներդրումների աճի տեմպեր: Հունվարի 12-ին կառավարության նիստից հետո լրագրողներին այդ մասին հայտարարել է տնտեսական զարգացման և ներդրումների նախարար Սուրեն Կարայանը:

Բացի այդ, ինչպես հայտարարել է նախարարը, Հայաստանն ակնկալում է գերազանցել նախորդ տարվա ցուցանիշները: «Մենք նաև ակնկալում ենք 2017 թվականին ներդրումների աճ, քանի որ բավականաչափ աշխատանք ենք իրականցրել այդ ուղղությամբ 2016 թվականի վերջին եռամսյակում` նախապատրաստելու անհրաժեշտ դաշտ: Ուստի 2017 թվականին ակնկալում ենք երկրի տնտեսական ակտիվության լուրջ աճ», - ասել է Կարայանը:

Ինչպես պարզաբանել է նախարարը, 2016 թվականին վերանայվել է Հայաստանի տնտեսական զարգացման մոդելը: Ուսումնասիրությունների արդյունքում շեշտադրում է կատարվել արտահանման աճի հիման վրա տնտեսության արագացմանը:

Հիշեցնենք, որ 2016 թվականի դեկտեմբերի 28-ին տարվա արդյունքներն ամփոփելիս տնտեսական զարգացման և ներդրումների նախարար Սուրեն Կարայանը հայտարարել էր, թե Հայաստանի տնտեսությունում ներդրումների ծավալը կմնա շատ ցածր մակարդակում: Նախարարի ասելով, 2016 թվականի 9 ամվա արդյունքում Հայաստանի  տնտեսության իրական հատվածում օտարերկրյա ուղիղ ներդրումների զուտ ներհոսը կազմել է 92 մլն դոլար կամ ՀՆԱ 1,3%: «ՕՈՒՆ այդ մակարդակը բավարար չէ երկրի տնտեսության կայուն զարգացում ապահովելու համար: Միջնաժամկետ հեռանկարում մենք այդ ծավալները պետք է ավելացնենք 5 անգամ», - հայտարարել է նախարարը: Միևնույն ժամանակ, տնտեսական զարգացման և ներդրումների նախարարն ակնկալում է 2017 թվականին ՕՈՒՆ մինչև150-200 մլն դոլարի աճ: Այդ համատեքստում, ինչպես կարծում է գերատեսչության ղեկավարը, Հայաստանը բոլոր ներդրողների համար պետք է ապահովի ելք դեպի մեծ շուկաներ` հաշվի առնելով ներքին շուկայի փոքր ծավալները: Էկոնոմիկայի նախարարության տվյալներով, 2016 թվականին Հայաստանն արձանագրել է արտահանման ռեկորդային ցուցանիշներ: «2016 թվականի արդյունքում Հայաստանը կարձանագրի նախորդ տարվա համեմատ արտահանման ռեկորդային 21% աճ, իսկ անցնող տարվա վերջին եռամսյալում այդ ցուցանիշը կաճի առնվազն 25%-ով», - նշել էր Կարայանը ամփոփիչ մամուլի ասուլիսում: Այդուհանդերձ, նախարարի ասելով, այդ ցուցանիշները չի կարելի համարել բավարար, քանի որ երկրի ՀՆԱ-ում արտահանման ծավալը կազմում է ընդամենը 30%: Մինչդեռ, Կարայանի կարծիքով, կայուն տնտեսական զարգացում ապահովելու առումով իրական արդյունք արձանագրելու համար արտահանումը պատք է կազմի ՀՆԱ առնվազն 40-50%: