Արմինֆո. Հայաստանի Հանրապետությունը դիմել է Ասիական զարգացման բանկին (ԱԶԲ)՝ ֆինանսավորելու Մ6` Վանաձոր-Ալավերդի-Վրաստանի սահման միջպետական ճանապարհի հիմնանորոգման և վերականգնման ծրագիրը:
Այդ ֆինանսավորման մի մասը կօգտագործվի վերոնշյալ ճանապարհի երեք հատվածների հիմնանորոգման և վերականգնման շինարարական աշխատանքների դիմաց վճարումներ կատարելու նպատակով:
Մրցույթը բաց է մրցութային փաստաթղթերով սահմանված ԱԶԲ-ի իրավասու երկրների ծագում ունեցող բոլոր հայտատուների համար, ովքեր իրավասու են և ունեն համապատասխան որակավորում նշված աշխատանքներն իրականացնելու համար:
ՀՀ տրանսպորտի, կապի և տեղեկատվական տեխնոլոգիաների նախարարության «Տրանսպորտի ծրագրերի իրականացման գրասենյակե պետական հիմնարկը (ՏԾԻԳ) նշված աշխատանքներն իրականացնելու նպատակով հրավիրում է իրավասու հայտատուներին ներկայացնել փակված/սոսնձված հայտեր: Հայտատուները կարող են դիմել ինչպես մեկ, այնպես էլ մի քանի լոտերի համար:
Մրցույթը կիրականացվի ԱԶԲ-ի կողմից ընդունված «Մեկ փուլ՝ երկու ծրարե սահմանված գործընթացի կազմակերպմամբ՝ միջազգային մրցակցային մրցույթի եղանակով:
Հիշեցնենք, որ ավելի վաղ վավերացված համաձայնագրի համաձայն՝ Հայաստանը 102 մլն եվրո կստանա Եվրոպական ներդրումային բանկից՝ Վանաձորից մինչև Վրաստանի սահման ավտոճանապարհի վերանորոգման նպատակով: Ծրագիրը ֆինանսավորվելու է Եվրոպական ներդրումային բանկի և Ասիական զարգացման բանկի կողմից համատեղ: Եվրոպական ներդրումային բանկի և Հայաստանի Հանրապետության միջև 2016թ հունվարին ստորագրվել է «Հայաստանի Մ6 միջպետական ճանապարհե ֆինանսական պայմանագիրը: Ծրագրի նպատակն է վերականգնել Մ6 միջպետական ճանապարհի՝ Հայաստանի կենտրոնական հատվածում գտնվող Վանաձոր քաղաքի և Վրաստանի հյուսիսարևելյան սահմանին գտնվող Բագրատաշենի միջև ընկած մոտ 90 կիլոմետր երկարությամբ հատվածը:
2014-2018 թթ. ռազմավարության համաձայն, Ասիական զարգացման բանկը մտադիր է Հայաստանին շուրջ 500 մլն դոլարի ֆինանսական աջակցություն ցուցաբերել: Միջոցներն ուղղված են էներգետիկայի և սոցիալական ծառայությունների ոլորտներում երկրի ճկուն, համապարփակ և կայուն զարգացմանն օժանդակությանը: Տրանսպորտի ոլորտում ԱԶԲ–ն կշարունակի օժանդակություն ցուցաբերել Հյուսիս–Հարավ տրանսպորտային միջանցքի շինարարական աշխատանքների իրականացման, ինչպես նաև բարձր աղքատության քաղաքների միջև տրանսպորտային կապերի ամրապնդման հարցում։ Երկրի տարածաշրջանային համագործակցության և ինտեգրման համար ԱԶԲ–ն կաջակցի նաև հարևան Վրաստանի հետ Հայաստանը կապող ճանապարհների զարգացմանը։ Բացի այդ, ԱԶԲ–ն կաջակցի բարձր աղքատությամբ քաղաքների կայուն զարգացմանը` օգնելով տեղական կառավարման մարմիններին համակարգված ծրագրերի մշակման հարցում և տրամադրելով ենթակառուցվածքների արդիականացման համար անհրաժեշտ ներդրումներ` ներառյալ ջրամատակարարումը, ինչպես նաև քաղաքային ճանապարհների և կոշտ թափոնների կառավարման ոլորտները։ Հայաստանի էլեկտրաէներգետիկ մաշված ենթակառուցվածքները և հանքային վառելիքի ներկրումից խիստ կախվածությունը թուլացնում են երկրի էներգետիկ անվտանգությունը։ ԱԶԲ–ն օգնություն կցուցաբերի այդ խնդրի լուծման հարցում` աջակցելով էներգիայի վերականգնվող աղբյուրների զարգացմանը, ինչպես նաև էներգետիկ ենթակառուցվածքների վերականգնմանը և արդիականցմանը: