Չորեքշաբթի, 18 Հունվարի 2017 17:29

Արմինֆո.Վրաստանի նախագահ Գեորգի Մերգվելաշվիլին գտնում է, որ վրացական տարածքով Հայաստան գազի տարանցման մոնետիզացիայի շուրջ ռուսական «Գազպրոմի» հետ համաձայնագիրը կվնասի երկրին: Այդ մասին նախօրեն ճեպազրույցի ժամանակ հայտարարել է պետության ղեկավարի մամուլի խոսնակ Էկա Միշվելաձեն:

Նրա խոսքով, այդ պայմանագրի ստորագրմամբ վատթարացել է իրավիճակը երկրի էներգետիկ հատվածում, վնաս է հասցվել երկրի տնտեսական և քաղաքական շահերին: «Արդյունքում ունեցանք բոլոր ուղղություններով վիճակի վատթարացում, ինչին հետագայում կարող են հետևել մի շարք խնդիրներ»,- հայտարարել է Միշվելաձեն, հայտնում է «Բիզնես Գրուզիան»: 

Հունվարի 11-ին Վրաստանի էներգետիկայի նախարար Կախա Կալաձեն հայտարարել էր, որ Վրաստանի կառավարությունը և ռուսական «Գազպրոմ էքսպորտ» ընկերությունը եկել են համաձայնության, համաձայն որի՝  դեպի Հայաստան ռուսական գազի տարանցման դիմաց Վրաստանը կստանա դրամական փոխհատուցում: Հունվարի 13-ին «Գազպրոմ էքսպորտը» հայտնել է, որ պայմանավորվածությունների համաձայն, ռուսական կողմը երաշխավորում է

2017-2018 թթ. Վրաստանի տարածքով Հայաստան տարեկան 2-2,2 մլրդ խմ ծավալով գազի տեղափոխման վճարումը, ինչպես նաև Վրաստան գազի մատակարարումը հազար խմ դիմաց $185 գնով:

Միշվելաձեի խոսքով, նախագահը կոչ է արել խորհրդարանին՝ կատարել իր սահմանադրական պարտավորությունը և ուժեղացնել կառավարության գործունեության նկատմամբ հսկողության գործառույթը, ինչպես նաեւ առաջարկել ծրագիր, թե ինչպես հաղթահարել եւ նվազագույնի հասցնել սպասվող ռիսկերն ու սպառնալիքները՝ կապված ռուսական կողմի հետ համաձայնագրի ստորագրման հետ:

Նշենք նաև, որ վրացական լրատվամիջոցների համաձայն, 80 ոչ կառավարական կազմակերպություն ուղերձով դիմել է Վրաստանի կառավարությանը, որում պահանջում են հրապարակել ռուսական «Գազպրոմ» ընկերության հետ Վրաստանով Հայաստան գազի տարանցման վերաբերյալ պայմանագրի մանրամասները: «Վրաստանի և Ռուսաստանի միջև նման պայմանագրի հարցը չի կարող դիտարկվել միայն կոմերցիայի շրջանակներում, քանի որ Ռուսաստանն օկուպացրել է մեր երկիրը»,- հայտարարել է Տնտեսական քաղաքականության հետազոտական կենտրոնի տնօրեն Նինո Էվգենիձեն «Ռուսթավի-2» հեռուստաընկերությանը տված հարցազրույցում:«Անհասկանալի է, երբ մեզ ասում են, որ այդ պայմանագիրը կոմերցիոն գաղտնիք է, այն դեպքում, երբ Ռուսաստանն օկուպանտ երկիր է: Դա կապիտուլյանտական համաձայնագիր է, որը վնասում է Վրաստանին»,- լրագրողներին հայտարարել է Արևելյան գործընկերության քաղաքացիական հասարակական ֆորումի ազգային պլատֆորմի նախագահ Լաշա Տուգուշին: