Հինգշաբթի, 19 Հունվարի 2017 19:30

Արմինֆո. Վանաձորի քիմկոմբինատի աշխատողների աշխատավարձի գծով պարտքերը մարվել են:

Ինչպես ԱրմԻնֆո գործակալությանը տեղեկացվել է ՀՀ կառավարության մամուլի ծառայությունից, Լոռու մարզ կատարած այցի ընթացքում վարչապետ Կարապետյանը հանդիպել է նաև Վանաձորի տեխնոլոգիական կենտրոնի շենքի առջև հավաքված Վանաձորի քիմիական գործարանի աշխատակիցներին, ովքեր շնորհակալություն են հայտնել կառավարության ղեկավարին՝ իրենց աշխատավարձերի խնդրին լուծում տալու համար: Վճարվել է 166 մլն դրամ ամբողջ աշխատավարձերի և դրանց հավասարեցված վճարների պարտքը 2016 թվականի դեկտեմբերի 31-ի դրությամբ: 

Անդրադառնալով քիմիական ձեռնարկության հետագա գործունեությանը և ԽՍՀՄ տարիներին աշխատանքի հաջող փորձի մասին հարցին՝ Կարեն Կարապետյանը նշել է. «Այն նախկինում եղել է մեծ երկրի մի հատված, երբ չկար մատակարարման, շուկայի սպառման խնդիր: Այդ պարագայում ձեռնարկությունն ունեցել է գործունեության բնականոն ռեժիմ: Անկախությունից հետո մենք կանգնել ենք այլ խնդիրների առջև, բազմաթիվ փորձեր են արվել, որպեսզի ներդրողը գա, կարողանա այդ բիզնեսը կազմակերպել և հասկանալի է, որ նա պետք է կարողանա այդ ապրանքը վաճառել:Այս ներդրողի մոտ անհաջող օրինակ է ստացվել և' օբյեկտիվ, և' սուբյեկտիվ պատճառներով: Այս պահին գործարանում սնանկացման գործընթաց է, ինչը չի կանգնեցնում ներդրող ներգրավելու պրոցեսը: Եթե ներդրողը գա, առաջարկություն ներկայացնի, մենք հասկանանք, որ այդ ներդրումը տրամաբանական է, հերթական ռիսկեր չենք ունենալու, մենք ծրագրերը կքննարկենք»: Կարեն Կարապետյանը գործարանի աշխատակիցներին և մասնագետներին ևս հորդորել է ներկայացնել առաջարկություններ:

1929 թվականին հիմնադրվված Վանաձորի քիմիական գործարանն արտադրում էր կրաքար: Այնուհետև արտադրությունն ընդլայնվեց, սկսվեց արտադրվել նաև ամոնիակ, մելամին, սինթետիկ կորունդ, զանազան բյուրեղներ, իսկ վերջերս`պարարտանյութեր: 1999 թվականին «Վանաձոր քիմիական գործարանի» և «Վանաձորի քիմիական մանրաթելերի գործարանի» հիման վրա ստեղծվեց «Պրոմեթևս Քիմպրոմ» ընկերությունը, որն արտադրում էր կարբիդ, կորունդ, ալյումինի օքսիդ, ամոնիակ, ացետատային ժապավեն, ացետատային մանրաթել, մելամին և այլն