Չորեքշաբթի, 8 Փետրվարի 2017 14:08

Արմինֆո. ՀՀ տնտեսական զարգացման և ներդրումների նախարար Սուրեն Կարայանն ընդունել է Հայաստանում  Չինաստանի արտակարգ և լիազոր դեսպան Թիան Էրլունին։

 

Նախարարը դեսպանի հետ քննարկել է Հայաստանի ներդրումային միջավայրը, ներդրողների համար նպաստավոր պայմանները՝ Եվրասիական տնտեսական միության շուկան, ԵՄ կողմից Հայաստանին տրամադրվող GSP+ համակարգը, ԱՄՆ-ի, Կանադայի, Շվեյցարիայի, Ճապոնիայի և Նորվեգիայի կողմից տրամադրվող GSP համակարգը, ինչպես նաև այն բոլոր գործոնները, որոնք Հայաստանը գրավիչ ներդրումային միջավայր են դարձնում։ Նախարար Սուրեն Կարայանը դեսպանին տեղեկացրել է մշակված ներդրումային ծրագրերի մասին, որոնք կարող ենք հետաքրքրել չինացի ներդրողներին:

 

Դեսպան Թիան Էրլունը նշել է, որ Հայաստանը Չինաստանի համար կարևոր տնտեսական գործընկեր է։ Դեսպանն առաջարկել է խորացնել տնտեսական համագործակցությունը հատկապես ներդրումային ոլորտում, որտեղ կա ներուժ և անելիք։ Դեսպանը նշել է, որ ներդրումային ծրագրերը կփոխանցվեն պոտենցիալ ներդրողներին։ Դեսպան Թիան Էրլունը նախարար Սուրեն Կարայանին է փոխանցել մայիսին Պեկինում կայանալիք «Մեկ գոտի, մեկ ճանապարհե միջազգային համագործակցության ֆորումին մասնակցության հրավերը։ ախարարը և դեսպանը մտքեր են փոխանակել Իրանի սահմանակից գոտում ստեղծվող ազատ տնտեսական գոտում չինացի գործարարների և ներդրողների մասնակցության, ինչպես պղնձաձուլարանի հիմնման հեռանկարների վերաբերյալ:

 

Ավելի վաղ հաղորդվել էր, որ Հայաստանի և Չինաստանի միջև գործարար նախաձեռնությունների ակտիվացման և առևտրատնտեսական համագործակցության ընդլայնման նպատակով կառավարությունը փետրվարի 2-ի նիստում ընդունել է որոշում, որով Չինաստանի Ժողովրդական Հանրապետությունում նախատեսվում է ստեղծել ՀՀ առևտրական կցորդի հաստիք: ՉԺՀ-ում ՀՀ առևտրական կցորդի հաստիքի ստեղծումը թույլ կտա առավել արդյունավետ ներկայացնել Հայաստանի տնտեսական շահերն առևտրին և տնտեսական համագործակցության այլ ձևերին առնչվող բոլոր ոլորտներում, կդյուրացնի հայկական և չինական տնտեսվարող սուբյեկտների կողմից առևտրական, տնտեսական և գիտատեխնիկական համագործակցության բնագավառում գործարքների իրականացումը  և կօժանդակի միմյանց միջև կապերի ստեղծմանը: 2016 թվականի հունվար-դեկտեմբեր ամիսներին Հայաստանի առևտրային շրջանառությունը կազմել է 5 մլրդ 75 մլն 349,9 հազար դոլար` նախորդ տարվա համեմատ ավելանալով 7,7%-ով: Վերը նշված ժամանակաշրջանում Հայաստանից արտահանումը կազմել է 1 մլրդ 782 մլն 924,7 հազար դոլար: Ինչպես հաղորդում է Հայաստանի ազգային վիճակագրական ծառայությունը, արտահանման աճը 2015 թվականի համեմատ կազմել է 20%: Միևնույն ժամանակ, Հայաստան ներմուծումը 2016 թվականին ավելացել է 1,6%-ով և կազմել 3 մլրդ 292 մլն 425,3 հազար դոլար: Ռուսաստանը շարունակում է պահպանել իր դիրքերը որպես Հայաստանի առաջատար օտարերկրյա գործընկեր: Հայաստանի և Ռուսաստանի միջև առևտրային շրջանառությունը 2016 թվականին կազմել է 1 մլրդ 366 մլն 974,7 հազար դոլար` ավելանալով 15,1%-ով: Չինաստանն զբաղեցնում է երկրորդ տեղը: Երկկողմ առևտրի ծավալը կազմել է 454 մլն 36,4 հազար դոլար` նվազելով 5,7%-ով: