Արմինֆո. Տնտեսական ազատության 2017 թվականի ինդեքսով Հայաստանը 70.3 միավորով զբաղեցնում է 33-րդ տեղը 180 գնահատված երկրների շարքում, ընդգրկվելով Առավելապես ազատ երկրների խմբում: Սա Հայստանի լավագուն ցուցանիշն է վարկանիշում գտնվելու տարիների ընթացքում:
Ինչպես ԱրմԻնֆո գործակալությանը տեղեկացվել է Տնտեսական զարգացման և ներդրումների նախարարության մամուլի ծառայությունից, նախորդ տարվա արդյունքների համեմատ դիրքը բարելավվել է 21 տեղով, ինչը համադրելի է երկրի կողմից արձանագրված պատմական լավագույն արդյունքին: Եվրոպայի խմբում ընդգրկված 45 երկրների ցանկում Հայաստանը զբաղեցնում է 19-րդ տեղը, միևնույն ժամանակ պահպանելով առաջատար դիրքեր ԱՊՀ երկրների շարքում: Հարևան երկրներից Հայստանից առաջ է անցել միայն Վրաստանը (13-րդ դիրքը): Թուրքիան, Ադրբեջանը և Իրանը համապատասխանաբար գտնվում են 60, 68 և 155 դիրքերում: ԱՊՀ երկրների շարքում, Հայաստանն առաջատարն է, իրենից ետ թողնելով Ղազախստանին (42 տեղ), Ղրղզստանին (89), Բելառուսին (104) և Ռուսաստանին (114 տեղ): 45 եվրոպական երկրների շարքում Հայաստանն զբաղեցրել է 19 դիրքը:
Ինդեքսի միջին համաշխարհային ցուցանիշը կազմում է 60.9, ինչը նախորդ տարվա ցուցանիշից բարձր է 0.2 կետով: Առաջատարների հնգյակում են` Հոնգ Կոնգը, Սինգապուրը, Նոր Զելանդիան, Շվեյցարիան և Ավստրալիան, ընդ որում, այս կազմը մեկ տարվա ընթացքում չի փոխվել:
Աղբյուրի համաձայն, տնտեսական ազատության ինդեքսում կտրուկ առաջընթացը պայմանավորված է հիմնականում Օրենքի գերակայություն և Կարգավորման ազդեցություն հենասյուների մասով նշանակալի աճով: Մասնավորապես` Սեփականության իրավունքների բաղադրիչով արձանագրվել է միավորի 35.5-ով առաջընթաց, իսկ Կառավարության ինտեգրվածության մակարդակով` 6.4-ով, ինչը լավագույն արդյունքն է ԱՊՀ երկրների ցանկում: Ներդրումային, գործարար, ֆինանսական ազատությունների բաղադրիչներով ևս Հայաստանը գլխավորում է ԱՊՀ երկրների ցանկը:
Նշենք, որ տնտեսական ազատության ինդեքսը (IEF - Index of Economic Freedom) ամեն տարի, սկսած 1995 թվականից, սահմանում են`ամերիկյան The Heritage Foundation հետազոտական ինստիտուտը և The Wall Street Journal ամերիկյան ազդեցիկ թերթը: Վարկանիշում առաջին տեղն ավանդաբար զբաղեցնում է Հոնկ Կոնգը: