Արմինֆո. Փետրվարի 21-23-ը Գերմանիայի միջազգային համագործակցության ընկերության (GIZ) և Գերմանիայի Դաշնային հանրապետության չափագիտության ազգային ինստիտուտի (PTB) նախաձեռնությամբ Երևանում անցկացվել է«Փորձարկի՛ր արժեշղթան» սննդամթերքի փորձարկմանն առնչվող արժեշղթայի որակային հատկանիշների քննարկմանը նվիրված եռօրյա աշխատաժողովը:
Աշխատաժողովի ընթացքում քննարկվել են գինու արտադրության, ձկնարտադրության և չորամրգերի ու բնական հյութերի արտադրության արժեշղթայի որակային հատկանիշները: Աշխատաժողովին մասնակցել են ներկայացուցիչներ ՀՀ պետական տարբեր գերատեսչություններից, որակի ենթակառուցվածքի համակարգի կազմակերպություններից, այլ շահագրգիռ կառույցներից, միջազգային կազմակերպությունների և մասնավոր հատվածի ներկայացուցիչներ, գինու, չորամրգերի, բնական հյութերի և ձկնարտադրության ոլորտի ներկայացուցիչներ:
Ինչպես ԱրմԻնֆո-ին հայտնել են ՀՀ տնտեսական զարգացման և ներդրումների նախարարությունում, աշխատաժողովի բացմանը մասնակցել և ողջունի խոսքով հանդես է եկել ՀՀ տնտեսական զարգացման և ներդրումների նախարարի տեղակալ Էմիլ Տարասյանը: Նախարարի տեղակալը կարևորել է նման միջոցառումների անցկացումը, ներկայացրել առևտրի և որակի ենթակառուցվածքային քաղաքականությունը Հայաստանում և աշխատաժողովի մասնակիցներին մաղթել արդյունավետ աշխատանք: ԳՄՀԸ (GIZ) «Մասնավոր հատվածի զարգացում Հարավային Կովկասում» ծրագրի հայաստանյան բաղադրիչի ղեկավար Վիլհելմ Հուգոն ներկայացրել է Հայաստանում իրականացվող իրենց ծրագիրը՝ նշելով, որ այն ապրիլից թևակոխելու է նոր եռամյա փուլ:ԳԴՀ չափագիտության ազգային ինստիտուտի (PTB) գործունեությունը և ծրագրի նպատակներն ու գործունեության ոլորտները Հարավային Կովկասում ներկայացրել է ծրագրի համակարգող Մորից Աքերմանը:
Աշխատաժողովի ընթացքում ելույթ են ունեցել մի շարք միջազգային փորձագետներ: Միջազգային գինեգործ և փորձագետ Յոզեֆ Վացլը ներկայացրել է իր փորձառությունը գինեգործության ոլորտում, գինու արտադրության կազմակերպումը արևմտյան երկրներում և Հայաստանում գինեգործության ոլորտում կիրառվող մոտեցումները, խնդիրները, համեմատությունները, ինչպես նաև լաբորատորիաների տրամաչափարկման, ծառայությունների պրոֆիլավորման ու տեղաբաշխման տեսլականներ: PTB ընկերության փորձագետ Դոկտոր Քրիստին Ֆրոզեն իր հերթին խոսել է ձկնարտադրության, չորամրգերի և բնական հյութերի արտադրության բնագավառում եվրոպական փորձի մասին:
ՀՀ տնտեսական զարգացման և ներդրումների նախարարության ստանդարտացման, չափագիտության և տեխնիկական կանոնակարգման վարչության աշխատակիցների կողմից ներկայացվել է «Որակի ենթակառուցվածքը ՀՀ-ում» թեմայով շնորհանդեսը` աշխատաժողովի մասնակիցներին տեղեկացնելով ստանդարտացման, չափագիտության, հավատարմագրման և տեխնիկական կանոնակարգման ոլորտներում առկա իրավիճակի, ներկայումս համապատասխան ոլորտներում գործող իրավական դաշտում նախատեսվող օրենսդրական փոփոխությունների, ինչպես նաև միջազգային համագործակցության ուղղություններով կատարված և կատարվելիք աշխատանքների վերաբերյալ:
Փորձարկման լաբորատորիաների, մասնավորապես՝ «Ստանդարտ-Դիալոգ»-ի և
«Տոնուս-Լես»-ի ներկայացուցիչները ներկայացրել են իրենց գործունեությունը և փորձը տվյալ ոլորտներում:
Աշխատաժողովի ընթացքում քննարկվել են հարցեր՝ կապված Հայաստանում գինու, բնական հյութերի, չորամրգերի և ձկնարտադրության ոլորտներում կիրառվող քաղաքականության, ԵՄ-Հայաստան առևտրային կապերի, արտադրության միջազգայնորեն հավատարմագրված մեթոդների, արտահանման հնարավորությունների և մի շարք այլ հարցերի վերաբերյալ:
Սարգիս Խաչատրյան. Մեր գործունեությունն ուղղված է լինելու հաճախորդների փորձառության բարելավմանը
Բիզնեսի թվայնացման հիմնախնդիրը, ո՞ր հանգրվանում է Հայաստանը
Գևորգ Մանթաշյան. Բարձր տեխնոլոգիական արդյունաբերության նախարարությունը հետևողական աշխատանք է տանում Հայաստանում ստարտափների կայացման ուղղությամբ
Bank of Georgia-ն հայտարարել է 303.6 մլն դոլարով "Ամերիաբանկի" ձեռք բերման շուրջ նախնական համաձայնության մասին
Նախկին պատգամավորը՝ Հայաստանի տնտեսական իրավիճակի մասին. այն, ինչը ջուրն է բերում, ջուրն էլ տանում է
Bank of Georgia Group PLC-ն հաղորդել է "Ամերիաբանկ" ՓԲԸ-ի ձեռք բերման հնարավոր գործարքի մասին