Երկուշաբթի, 27 Փետրվարի 2017 18:26

Արմինֆո. Ամերիաբանկը «Global Finance» հեղինակավոր ամսագրի կողմից արժանացել է Հայաստանի «Լավագույն ներդրումային բանկ 2017» մրցանակին: «Global Finance»-ի մրացնակներին Ամերիաբանկն արժանացել էր նաև 2012, 2013, 2015 և 2016 թվականներին:

Ինչպես ԱրմԻնֆո գործակալությանը տեղեկացվել է Բանկի մամուլի ծառայությունից, ամսագրի խմբագիրների կողմից հաղթողները որոշվել են մի շարք չափանիշներով, որոնցում ներկայացված են շուկայի մասնաբաժինը, գործարքների քանակը և ծավալը, սպասարկման որակը, մատուցվող խորհրդատվությունը, գործարքների կառուցվածքը, նորարարությունը, գնագոյացումը և այլն:

Ռուսաստանից լավագույն ներդրումային բանկ անվանակարգում հաղթողներն են` ՎՏԲ Կապիտալ, Վրաստանից`Galt & Taggart, Մեծ Բրիտանիայից`HSBC, Չինաստանից`China International Capital, Ավստրիայից`Raffeisen Bank International, Բելգիայից`Barclays, Ֆրանսիայից`BNP Paribas, Շվեյցարիայից`UBS, Նիդեռլանդներից`Goldman Sachs, Գերմանիայից`Deutsche Bank, ԱՄՆ-ից`JP Morgan բանկերը:

«Global Finance»-ի վարկածով, աշխարհի 2017 թվականի լավագույն ներդրումային բանկ «Best Investment Bank» հաղթողներն են`UBS (Շվեյցարիա), որը լավագույնն է ճանաչվել նաև «Best M&A Bank» անվանակարգում: «Best Equity Bank» և «Best Debt Bank» անվանակարգերում լավագույնն է ճանաչվել J.P. Morgan-ը: Զարգացող շուկաներից «Best in Emerging Markets» լավագույնն է ճանաչվել Standard Bank-ը: «Best Bank for IPOs» անվանակարգ - Morgan Stanley, «Best Bank for Securitization» և  «Best in Frontier Markets» անվանակարգերում - Citi. Կենտրոնական և Արևելյան Եվրոպայում «Best Investment Bank, «Best Debt Bank» և «Best M&A Bank» անվանակարգերում - VTB Capital (Ռուսատսան):, իսկ Արևմտյան Եվրոպայում «Best Debt Bank» անվանակարգում – HSBC (Մեծ Բրիտանիա):

Ըստ ԱրմԻնֆո գործակալության` Հայաստանի Բանկերի Ֆինանսական Վարկանիշի, 2016 թվականին Ամերիաբանկի ակտիվներն աճել են 39.2%  մինչև 718.3 մլրդ դրամ կամ $ 1.5 մլրդ, վարկային պորտֆելի 61.4% աճի և պետական պարտատոմսերում կատարված 44.2% ներդրումների հաշվին: Արդյունքում, բանկի վարկավորման ծավալը հասավ 511.6 մլրդ դրամի կամ $ 1.1 մլրդ-ի, իսկ ներդրումները պետական ​​պարտատոմսերում հասան 47.5 մլրդ դրամի կամ $ 98.1 մլն-ի, ընդհանուր կապիտալն աճեց 8.6%, մինչև 64.4 մլրդ դրամ, կամ $ 133,1 մլն, հիմնականում կուտակված շահույթի 23.4% աճի, մինչև 24.3 մլրդ դրամ կամ $ 50.1 մլն: 2016 թվականն Ամերիաբանկը եզրափակել է 6,2 մլրդ դրամ կամ $ 12.8 մլն. զուտ շահույթով, աճը`29.2%: Ամերիաբանկի նորմատիվային ընդհանուր կապիտալը հասել է 81.9 մլրդ դրամի, ինչը գրեթե 3 անգամ գերազանցում է պահանջվող նվազագույն նորմատիվը (30 մլրդ դրամ): Կապիտալի համարժեքության նորմատիվը 2016 թվականի արդյունքներով կազմել է 15.87% (պահանջվող նորմատիվը`12%), իսկ ընդհանուր իրացվելիությունը`31,23% (պահանջվողը`15%), ընթացիկ իրացվելիությունը`133,17% (պահանջվողը`60 %), նախորդ տարվա, համապատասխանաբար, 15.07%, 29.91% և 151.26% փոխարեն:

Նշենք, որ «Ամերիաբանկ» ՓԲԸ ունիվերսալ բանկ է, որը մատուցում է կորպորատիվ, ներդրումային և մանրածախ բանկային ծառայություններ` տրամադրելով բանկային լուծումների ամբողջական փաթեթ: Բանկը հայաստանյան շուկայում գործում է 1996 թվականի հոկտեմբերի 31-ից: Ամերիաբանկն ունի 12 մասնաճյուղ, որից 8 գտնվում է մայրաքաղաքում, իսկ 4-ը`Հայաստանի մարզերում: Բանկի բաժնետիրական կապիտալում 2015 թվականի դեկտեմբերից Վերակառուցման և Զարգացման Եվրոպական Բանկի մասնակցոթյամբ փոփոխվեցին բաժնետերերի մասնաբաժինները, մասնավորապես, Ameria Group CY ՍՊԸ - 79,3%, իսկ ՎԶԵԲ - 20,7%:

Հիշեցնենք, որ «Global Finance Magazine» ամենամսյա ամսագիրը, որը հրատարակվում է 1987 թվականից, այսօր ունի ավելի քան 50 հազ. բաժանորդ 163 երկրներում: Հրապարակման միջոցով վերլուծվում են հիմնական ֆինանսական ցուցանիշներն ավելի քան 192 երկրներում: Ամսագրի թիրախային լսարանը խոշոր մասնավոր և պետական ֆինանսական հաստատությունների ղեկավարներն ու ներկայացուցիչներն են: Արդեն 17 տարի Global Finance-ն ընտրում և պարգևատրում է հաղթող բանկերին զարգացող երկրներում: Ամսագրի հրապարակումները վերաբերում է Լատինական Ամերիկայի, Կենտրոնական և Արևելյան Եվրոպայի, Ասիա-Խաղաղօվկիանոսյան տարածաշրջանի, Մերձավոր Արեւելքի և Աֆրիկայի լավագույն բանկերին: