Նովրուզ Բայրամին դեպի Հայաստան մեծ ուղևորահոսք է ակնկալվում

Արմինֆո. Իրանական մի շարք ավիաընկերություններ Նովրուզ Բայրամ տոնին ընդառաջ, որի ժամանակ Իրանի Իսլամական Հանրապետությունից դեպի Հայաստանի Հանրապետություն մեծ ուղևորահոսք է ակնկալվում, զգալիորեն ավելացնում են թռիչքների քանակը: Այդ մասին տեղեկացնում է ՀՀ կառավարությանն  առընթեր Քաղաքացիական ավիացիայի գլխավոր վարչությունը:

Աղբյուրի համաձայն, մարտի 15-ից ապրիլի 4-ն իրանական ավիաընկերությունները Սարիից, Մաշադից, Թավրիզից և Թեհրանից 67 կանոնավոր և ոչ կանոնավոր չվերթ կիրականացնեն դեպի Հայաստանի Հանրապետություն: Վերոնշյալ ժամանակահատվածում իրանական ավիաընկերությունների կողմից շաբաթական միջինը 22 չվերթ կիրականացվի:

«Սպասվող ուղևորահոսքն իր դրական ազդեցությունը կունենա զբոսաշրջության և տնտեսության զարգացման գործում»,- ասվում է ՀՀ ՔԱԳՎ հաղորդագրությունում:

Փետրվարի 10-ին մամուլի ասուլիսի ժամանակ Զբոսաշրջության պետական ​​կոմիտեի նախագահ Զարմինե Զեյթունցյանը հայտնել էր, որ 2016 թ. արդյունքներով հանրապետություն է ժամանել 2.867 մլն օտարերկրացի, որից 1.259 մլն-ը` զբոսաշրջության նպատակով: Ըստ նրա, Հայաստանում զբոսաշրջության աճի առումով առավել կարևոր դեր են խաղում Ռուսաստանը, Իրանը, Միացյալ Արաբական Էմիրությունները, Չինաստանը և այլ  երկրներ: Ընդ որում, Զ.Զեյթունցյանն ընդգծել էր, որ իրանցի զբոսաշրջիկների թիվը 2016-ին աճել է 30%, իսկ ռուս զբոսաշրջիկների թիվը`2.3%-ով: