Կենտրոնական բանկի նախագահը Ֆրանկֆուրտում կմասնակցի Գերմանա-հայկական հիմնադրամի ծրագրերի դիտորդ խորհրդի հերթական նիստին

Արմինֆո. Կենտրոնական բանկի նախագահ Արթուր Ջավադյանը մեկնել է Ֆրանկֆուրտ, որտեղ մասնակցելու է Գերմանա-հայկական հիմնադրամի (GAF) ծրագրերի դիտորդ խորհրդի հերթական նիստին:

Ինչպես ԱրմԻնֆո-ին հաղորդեցին ԿԲ հասարակայնության հետ կապերի ծառայությունից, նիստի ժամանակ քննարկվելու են KfW բանկի հետ համատեղ իրականացվող ծրագրերի իրականացման ընթացքը, ֆինանսական ոլորտում գերմանա-հայկական գործակցության այլ հարցեր: Արթուր Ջավադյանը հանդիպումներ կունենա մի շարք գործընկեր կառույցների ղեկավարների հետ:

Հիշեցնենք, որ այսօրվա դրությամբ Հայաստանում իրագործվում են մանր և փոքր ձեռներեցության վարկավորմանը, վերարտադրվող էներգիայի զարգացմանը, Հայաստանի գյուտնտեսական հատվածի ֆինանսավորմանն առնչվող GAF ծրագրեր: KfW ֆինանսավորմամբ իրագործվում է մի քանի նախագիծ, որոնց թվում են «Էլեկտրահաղորդման կովկասյան ցանց 1» ծրագիրը (վերարտադրվող էներգետիկա և էներգախնայողություն), «Համայնքային ենթակառուցվածքների ծրագիր», «Հիփոթեկային վարկավորման շուկայի կայուն զարգացում» ծրագիրը, «Կովկաս-Հայաստան հատուկ պահպանվող տարածքներին աջակցության ծրագիր» (կենսաբազմազանության ոլորտի նախագծեր` Զանգեզուրի կենսոլորտային համալիր, Տաթև ազգային պարկ, «Սատանի կամուրջ» բնական հուշարձան):