Ամերիաբանկը 2016 թվականին 19% ավելացրել է մանրածախ ավանդների ծավալը

Արմինֆո. Ամերիաբանկը 2016 թվականին 19% ավելացրել է մանրածախ ավանդների ծավալը, 144 մլրդ.դրամից մինչև 171 մլրդ.դրամ (ցպահանջ և ժամկետային ավանդներ, բանկի պարտատոմսերի իրացումից ստացված միջոցներ): Այս մասին մարտի 21-ին կայացած մամուլի ասուլիսում հայտարարել է Ամերիաբանկի Տնօրինության անդամ, Մանրածախ գործառնությունների գծով տնօրեն Արման Բարսեղյանը, հավելելով, որ միայն մանրածախ հաճախորդների ժամկետային ավանդների ծավալը 2016 թվականին աճել է 22%, մինչև 129 մլրդ.դրամ:

«Բանկի գործունեության սկզբում մանրածախ ավանդների ծավալների աճի տեմպերը տատանվում էին 20-30% միջակայքում: Իսկ այժմ, համեստ տնտեսական աճի պայմաններում, 19% - ը դա բավականին լուրջ և տպավորիչ ցուցանիշ է, հատկապես ավանդների տոկոսադրույքների իջեցման ֆոնին », - ասել է նա:

Ըստ ԱրմԻնֆո գործակալության` Հայաստանի Բանկերի Ֆինանսական Վարկանիշի,  2016 թվականին Ամերիաբանկի ընդհանուր պարտավորություններն աճել են 43,2%, մինչև 653.9 մլրդ դրամ կամ $ 1.4 մլրդ, ինչի շնորհիվ ցպահանջ ավանդներն աճել են 2 անգամ, մինչև 188.6 մլրդ դրամ, իսկ ժամկետային ավանդները`12%, մինչև 226.5 մլրդ դրամ: 2016 թվականին բանկն իրականացրել է պարտատոմսերի երեք թողարկում: Մասնավորապես, II եռամսյակում`$ 15 միլիոն արժողությամբ դոլարային պարտատոմսերի, իսկ IV եռամսյակում $ 5 մլն ծավալով դոլարային և 1 մլրդ դրամ ծավալով դրամային պարտատոմսերի թողարկումներ: 2016 թվականն Ամերիաբանկը եզրափակել է 6,2 մլրդ դրամ կամ $ 12.8 մլն. զուտ շահույթով, աճը`29.2%:

Նշենք, որ «Ամերիաբանկ» ՓԲԸ ունիվերսալ բանկ է, որը մատուցում է կորպորատիվ, ներդրումային և մանրածախ բանկային ծառայություններ` տրամադրելով բանկային լուծումների ամբողջական փաթեթ: Բանկը հայաստանյան շուկայում գործում է 1996 թվականի հոկտեմբերի 31-ից: Ամերիաբանկն ունի 12 մասնաճյուղ, որից 8 գտնվում է մայրաքաղաքում, իսկ 4-ը`Հայաստանի մարզերում: 2017 թվականից Բանկի բաժնետերերն են` Ameria Group CY ՍՊԸ – 65.8%, ՎԶԵԲ - 20,7%, ESPS Holding Limited - 13,5%: