Արմինֆո. Վարչապետ Կարեն Կարապետյանն ընդունել է Վերակառուցման և զարգացման եվրոպական բանկի և «Ամբեր Կապիտալ» ընկերության ներկայացուցիչներին:
Ինչպես ԱրմԻնֆո գործակալությունը տեղեկացվել է ՀՀ կառավարության մամուլի ծառայությունից, հանդիպմանը քննարկվել են Հայաստանի Հանրապետության և Վերակառուցման և զարգացման եվրոպական բանկի (ՎԶԵԲ-ի) կողմից ստեղծվող մասնավոր բաժնեմասնակցային ֆոնդի գործունեությանը վերաբերող հարցեր, որի կառավարչի ընտրության համար հայտարարված նախնական մրցույթի արդյունքներով հաղթող է ճանաչվել «Ամբեր Կապիտալ» ընկերությունը: Մասնավորապես, անդրադարձ է կատարվել ֆոնդի կողմից ֆինանսավորվելիք առաջնային ներդրումային ծրագրերի ուղղություններին և դրանց ժամանակացույցին:
ՎԶԵԲ փոխնախագահ Բետսի Նելսոնը նշել է, որ ֆոնդի աշխատանքների համար պետք են ծրագրեր՝ միտված հանրային կառավարման զարգացմանը, փոքր և միջին բիզնեսի խթանմանը, ՓՄՁ ներկայացուցիչների համար ուսումնական ծրագրերի կազմակերպմանը՝ կորպորատիվ կառավարման թափանցիկության բարձրացման, ինչպես նաև ֆինանսների և բրենդների կառավարման ու այլ ուղղություններով: «Ծրագրերի իրականացմամբ մեր նպատակն է ներգրավել ներդրումներ Հայաստանի փոքր և միջին բիզնեսում, ցույց տալ, որ Հայաստանում հնարավոր է կյանքի կոչել արդյունավետ ներդրումային ծրագրեր»,- ասել է Բետսի Նելսոնը:
Վարչապետ Կարապետյանը շնորհակալություն է հայտնել համագործակցության համար, կարևորել ֆոնդի գործունեությունը շուտափույթ ծավալելու անհրաժեշտությունը և ընդգծել, որ ՀՀ կառավարությունը վճռական է իրականացնելու բարեփոխումներ բոլոր ոլորտներում: «Վստահ եմ, որ մեզ ոչինչ չի պակասում, որպեսզի կառուցենք բարվոք պետություն: Կարևորում ենք նման ֆոնդի ստեղծումը, որը բացի տնտեսական արդյունք ապահովելուց՝ կնպաստի մեր երկրում կորպորատիվ կառավարման նոր մշակույթի ներդրմանը, ՓՄՁ-ների գործունեության բարելավմանը»,- ասել է վարչապետը և կարևորել ՓՄՁ-ների համար արդյունավետությունը և արտադրողականությունը բարձրացնող կրթական ծրագրերի կազմակերպումը: Կարեն Կարապետյանը նշել է, որ գործարար միջավայրի բարելավման, նոր մշակույթի, նորագույն տեխնոլոգիաների կիրառման համար էական է լինելու ֆոնդի և Ռազմավարական նախաձեռնությունների կենտրոնի միջև համագործակցությունը:
Նշենք, որ հաղորդագրության մեջ մասնավոր բաժնեմասնակցային ֆոնդի ու դրա կապիտալի ֆինանսական պարամետրերի, ինչպես նաև կառավարության հետ համատեղ գործելու սկզբունքների մասին որևէ հստակ տեղեկատվություն չկա: ՀՀ տնտեսական զարգացման և ներդրումների նախարարությունում նույնպես ֆոնդի մասին որևէ տեղեկություն չունեն: ԱրմԻնֆո-ի թղթակցին չի հաջողվել նաև հեռախոսակապի մեջ մտնել ՎԶԵԲ երևանյան գրասենյակի հետ: ՎԶԵԲ հետ համատեղ մասնավոր բաժնեմասնակցային ֆոնդի ստեղծման մասին չէր հայտարարվել նաև ավելի վաղ:
Ըստ աղբյուրների, «Ամբեր Կապիտալ» ընկերությունը հրապարակային ձեռնարկություն է, որը հովանավորում է 2005 թվականին Նյու Յորքում ստեղծված հեջավորման ֆոնդերը: «Ամբեր Կապիտալ»-ը մատուցում է համատեղելի գործիքներով ներդրման ծառայություններ: Ընկերությունը մասնագիտանում է Եվրոպայի, Լատինական Ամերիկայի և Հյուսիսային Ամերիկայի հրապարակային բաժնեմասային կապիտալներում և այլընտրանքայն ներդրումյաին շուկաներում ներդրումներ կատարելու ոլորտում: Ներդրումային պորտֆելի ձևավորման ընթացքում ընկերությունը հենվում է ֆունդամենտալ վերլուծության վրա, «վարից-վեր» բենչմարկետինգային տեխնոլոգիայով: Ընկերության գլխավոր տնօրենն է Ժոզեֆ Ուգուրլյանը:
Արամ Սարգսյան. Հայաստանի զարգացման գրավականը համընդհանուր դիվերսիֆիկացումն է
ACBA Բանկ. հրապարակայնություն եւ զարգացման նոր պարադիգմ
Պետությունը հակաճգնաժամային 15-րդ միջոցառման շրջանակներում 1000 ժամանակավոր աշխատատեղ կստեղծի