Էմիրաթական «Ocean Holding»-ը նպատակ ունի 100 միլիոն ԱՄՆ դոլար ներդնել՝ Հայաստանում ֆոտովոլտային կայաններ կառուցելու նպատակով

Արմինֆո. Էմիրաթական «Ocean Holding» ընկերություն նպատակ ունի այս տարվանից սկսած Հայաստանում ներդնել 100 միլիոն ԱՄՆ դոլար՝ ֆոտովոլտային կայաններ կառուցելու և դրանք գործարկելու նպատակով, օգտագործելով ոլորտի լավագույն հասանելի տեխնոլոգիաները։ Ներդրումները տեղի կունենան մի քանի փուլով։ Այդ մասին հայտնի է դարձել մարտի 22-ին Արաբական Միացյալ Էմիրություններում անցկացված «Հայաստան-Արաբական Միացյալ Էմիրություններ» ներդրումային համաժողովի շրջանակներում: Ինչպես ԱրմԻնֆո-ին հայտնել են Հայաստանի զարգացման հիմնադրամից, այդ առնչությամբ Հայաստանի Էներգետիկ ենթակառուցվածքների և բնական պաշարների նախարարության և ԱՄԷ «Ocean Holdingե ՍՊԸ միջև ստորագրվել է փոխըմբռնման հուշագիր։ Համագործակցությունը նպատակ ունի զարգացնելու Հայաստանում վերականգնվող էներգետիկայի ենթակառուցվածքները և «Ocean Holdingե ընկերությանը մեր երկրում արևային էներգիայի նախագծերում ներդրումների հնարավորություն տալու։ 

Աղբյուրի համաձայն՝ համաժողովի շրջանակում նախատեսված են նաև գործարար հանդիպումներ (B2B) պոտենցիալ ներդրողների և գործարարների միջև՝ ուղղված Հայաստանի և արաբական երկրների հետագա առևտրային համագործակցության զարգացմանը։ Համաժողովի օրակարգում ընդգրկված են շնորհանդեսներ գյուղատնտեսության և անասնաբուծության, էներգետիկայի, առողջապահության և դեղագործության, ՏՏ, զբոսաշրջության, անշարժ գույքի ոլորտների, Հայաստանում գործող օտարերկրյա ընկերությունների պատմությունների մասին, ներդրումային մի շարք նախագծեր։ Շնորհանդես է պատրաստել նաև Հայ-էմիրաթական գործարար ասոցիացիան։

Համաժողովի անցկացման վերաբերյալ պայմանավորվածություն էր ձեռք բերվել անցյալ տարեվերջին ՀՀ Նախագահի` ԱՄԷ պաշտոնական այցի ժամանակ: Այն նպատակ ունի խթանելու Հայաստանի և արաբական երկրների տնտեսական կապերի ակտիվացումը, քննարկելու առևտրային հոսքերի առաջիկա տեսլականը և ներդրումային նախագծեր ներկայացնելու արաբ գործարարներին: Աբու Դաբիում համաժողովը մեկնարկել է ՀՀ նախագահ Սերժ Սարգսյանի մասնակցությամբ: «Հայաստան-ԱՄԷ 2017ե-ը համախմբել է շուրջ 300 մասնակցի, այդ թվում՝ պետական պաշտոնյաներ, հիմնադրամների ղեկավարներ, վերազգային ընկերությունների, միջազգային կազմակերպությունների, Հայաստանում օտարերկրյա ներդրումների հաջող փորձ ունեցող ընկերությունների ներկայացուցիչներ։

Հայաստանում էներգետիկ քաղաքականության, էլեկտրաէներգիայի արտադրության կառուցվածքի, ոլորտի կանոնակարգերի և ինստիտուցիոնալ միջավայրի մասին շնորհանդեսով հանդես է եկել ՀՀ էներգետիկ ենթակառուցվածքների և բնական պաշարների փոխնախարար Հայկ Հարությունյանը։ Ներկայացվել է 50 մեգավատ հզորությամբ «Մասրիկ 1ե արևային էլեկտրակայանի նախագիծը։ Մասնագետները կարծում են, որ համագործակցության լայն հնարավորություններ են առկա էներգետիկայի ոլորտում։ Լինելով նավթի հարուստ պաշարներ ունեցող երկիր`  Էմիրություններն սկսել է հետաքրքրություն ցուցաբերել արևային և այլընտրանքային էներգետիկ ուղղություններով, որտեղ Հայաստանն ունի ﬔծ ներուժ։ «Հայաստանը վերականգնվող էներգետիկայի համար բարենպաստ պայմաններ է ստեղծել: Պետությունը ներդրել է իր ունեցած ամբողջ գործիքակազմը՝ ոլորտը խրախուսելու համար: ՀՀ կառավարությունը շարունակում է փնտրել նոր հնարավորություններ բարձրացնելու էներգետիկ անվտանգության մակարդակը՝ մատակարարման, էներգետիկ արդյունավետության, նոր ներդրումների, նոր տեխնոլոգիաների, տարածաշրջանային համագործակցության, ինչպես նաև կայուն ենթակառուցվածքների ապահովման նպատակովե,- նշվել է էներգետիկ ոլորտին առնչվող զեկույցում:

Հիշեցնենք, որ կառավարությունը հավանություն է տվել արևային ֆոտովոլտային կայանների կառուցման ներդրումային ծրագրին, որի ներդրումային ընդհանուր գինը գնահատվում է շուրջ 129 մլն դոլար։ Ծրագրի շրջանակներում նախատեսվում է Հայաստանի տարբեր բնակավայրերում կառուցել մինչև 110 մեգավատ հզորությամբ արդյունաբերական մասշտաբի կայաններ։ Արևային ֆոտովոլտային կայանների կառուցման համար ընտրված վեց տեղանքներից երկուսի համար իսպանական «Արիես Ինժեներիաե խորհրդատվական ընկերությունն արդեն իրականացրել և ներկայացրել է տեխնիկատնտեսական հիմնավորումները։ Դրանք վերաբերում են Գեղարքունիքի և Արագածոտնի մարզերի վարչական սահմաններում գտնվող «Մասրիկե և «Դաշտադեմե տեղանքներին։ Մրցույթի հիմնական պայմաններից մեկը լինելու է առաջարկվող սակագինը։ Այլ կերպ ասած, առավելությունը տրվելու է նվազագույն սակագնային առաջարկությանը։  Այլընտրանքային էներգետիկայի զարգացման կլիմայական ներդրումային հիմնադրամը Հայաստանին տրամադրել է 28 մլն.դոլար, որից 2 մլն.դոլարը կլինի դրամաշնորհի, իսկ 26 մլն.դոլարը` վարկի տեսքով: Վարկի պայմանները շատ ձեռնտու են՝ տարեկան 0.25%, 40 տարի մարման ժամկետով և առաջին 20 տարիների համար արտոնյալ ժամանակահատվածով: Դրամաշնորհային միջոցներով կկատարվեն տեղի հետազոտման աշխատանքները, ինչպես նաև նախագծի տեխնիկա-տնտեսական հիմնավորման մշակումը, որը նախատեսվում է 100-120 մեգավատ հզորությամբ կայանի համար: ՀՀ Ազգային վիճակագրական ծառայության տվյալներով, Հայաստանի և ԱՄԷ միջև արտաքին առևտրաշրջանառությունը  2016 թ. կազմել է $119.3 մլն՝ տարեկան կտրվածքով աճելով 2.3 անգամ: Մասնավորապես, արտահանումն աճել է 7 անգամ՝ մինչև $63.8 մլն, իսկ ներմուծումն ավելացել է 27,4%-ով՝ մինչև $55.5 մլն: